政府會否未雨綢繆?

2018/04/08 07:55:59 網誌分類: 政治
08 Apr

區議會換屆選舉將於明年舉行,建制派及民主派已開始協調,以免出現撞區鬼打鬼情況。早前香港眾志(眾志)常委周庭報名參選立法會香港島補選,但後來因為眾志主張「民主自決」而被取消參選資格(DQ),意味眾志再參選立法會嘅機會微乎其微。不過,消息指眾志有意進軍毋須簽署確認書的區議會選舉,其中秘書長黃之鋒擬挑戰新民黨陳家珮的南區區議會海怡西議席,但當中仍存在隱憂。

 

雖然區議會較立法會層次較低(不過質素一樣---都係低低B,祇係收入差距大啫),但係入選區議員便有機會經「超級區議會」選舉進身立法會,難道到時才篩選他/她們的政治立場?因此,明年區議會選舉應與立法會選舉睇齊,一樣要簽署「有法律責任」的「確認書」。不過,依家呢個政府與別一同----會唔會先香港之憂而憂、抑或惟恐香港不亂?

 

二0一六年立法會換屆選舉前,選舉管理委員會引入新安排,要求參選人簽署確認書,聲明擁護同效忠《基本法》及香港特區,呢招撒手鐧,令當時有部分本土派參選人即使簽署確認書,但因為支持香港獨立而被DQ,而自決派同民主派參選人,就算無簽確認書都成功入閘(不過,即使有「確認書」,都要搵倒啲正常嘅「選舉主任」至得!請埋請埋姓「鄧」果啲,真係後患無窮)。直至上月立法會補選,眾志常委周庭簽署確認書後仍被DQ入唔到閘,除了意味眾志進軍立法會行人止步,亦令本土派擔心政途從此玩完。

 

其實眾志成立之後,都有發展地區事務,當中副主席袁嘉蔚、黃之鋒都係眾志嘅社區幹事,二人近年亦分別喺南區田灣及海怡半島做社區工作。有消息指袁嘉蔚計劃出戰南區區議會田灣選區,挑戰現任議員陳富明;而黃之鋒則挑戰海怡西區議員陳家珮。消息話,由於前民主黨黨員區諾軒在上月立法會香港島補選中擊敗陳家珮,加上陳在海怡西的票站失守,故民主派心雄欲再下一城攻佔陳的地區議席。

不過,眾志嘅如意算盤能否打得響,仍存在隱憂。經歷過周庭被DQ後,萬一區議會選舉又推出確認書,眾志成員幾可肯定入唔到閘,連呢幾年嘅地區工作都付之流水。除了被DQ風險,黃之鋒仍有案在身,他在佔旺藐視法庭案中被判囚三個月,現正等候上訴(如果政府仲唔採取行動,即係明益「港獨」;「阿爺」:做嘢啦)。此外,眾志另一隱憂就係有好多成員都仲讀緊書,當中包括主席羅冠聰、黃之鋒、周庭等,參與政治嘅同時會隨時忽略學業,萬一畢唔到業,參選又落敗收場,到時真係兩頭唔到岸喇!(唔駛驚:契爺響英、美!)

計我話:政府應該制訂定一份「港獨」名單供「選舉主任」參考;呢樣唔係新嘢:出入境都有份黑名單啦!否則「飯民」何故會響澳門被拒入境啫!不過,呢份名單制定需時----如果呢個政府係正常同清醒嘅,響幾年前「佔中」開始就應該著手制訂,咁就唔會有呢幾年出現嘅亂局啦!不過,我講嘅係「正常」嘅政府,依家呢個算唔算呢?

回應 (0)
我要發表
user