紫荊人在想啥？

信佢一成便輸清

若然躀低勿詐型

無懼眾君燒壞瓦

講數唔掂再興兵

據榕樹頭術數師傅僑小羊為黃仔提出的「先普選、後立法」卜了一掛、結果只得出一個“亂”字來。他指出、近來紅家大員人人將「打殘港毒」掛在嘴邊、顯示安全法立法確係有迫切性。前幾日、白鴿會師爺黑仔桃開腔撐一姐所發表嘅「先和諧、後立法」論調之後、僑小羊就知到葫蘆裡面裝嘅係乜嘢藥了！僑小羊指出、妖蜓在扶桑和台島散播「毒言」明明係超越咗紅家容忍底線、而且分分鐘都會為罪城街坊帶來霉運、仍然有咁多黃仔盲目撐佢、足以證明「大和諧」係偽命題嚟。是否認同僑小羊嘅講法、純屬見仁見智。但一姐依然死撐、尚未係立法時機。黃仔可以放心玩鋪大喇！

呢嗱、坊間流傳、黃仔口中嘅普選、其實係要啱佢哋心水嗰套真普選、並且堅持先普選後立法、否則就鳥蠅摟馬尾、一拍兩散。如果係咁嘅話、反民就必須要擁有以下兩個條件。第一條、有巨大民意基礎作後盾。可惜、以目前反民獲得嘅支持度來講、恐怕已無能力再號召一次五十萬人上街大遊行。第二條、就係阿藍內部再次有人陣前倒戈。問題係、你會相信紅家受過上次籠裡雞作反嘅教訓之後、仲會重蹈覆轍嗎？不過咁、世事係無絕對嘅、只要安全法立法無期、一樣可以達到一拍兩散效果。但成功與否、先要睇有冇人肯企出來孭起隻鑊、而這個人本身又有冇資格去孭這隻鑊。按照目前走勢看來、願竟孭鑊嘅人早就出現咗、並且受到西廠特別照顧。日前西廠大佬十二哥當眾爆響口、直指在整個紅家範圍內唯一冇安全法嘅地方就係罪惡城。十二哥嘅講話是意味着些甚麼、相信大家已經心中有數。在下很想知到、即使罪惡城真的滿足黃仔所有政治要求、你是否相信佢哋會停止「井水犯河水」嘅活動？