黑松露鵝潤腸

中學同學Pat移民美國，但每年兩夫婦都會回港逗留一兩個月，順道去其他地方旅遊；我地中學同學亦趁機相約聚會---竹戰加晚宴。

上個月聚會，Pat講起佢會買幾斤「黑松露鵝潤腸」送給香港親朋作手信，問我地有冇興趣一齊訂？我對腸類食品(應該係加工類食品)興趣不大，但Pat指收過禮物者事後都大讚好食喎！咁我就搭佢買少少試吓啦---我份人響「食」呢方面好open，試吓有何妨？唔好食咪下次唔買囉。

我喜歡食黑松露、亦喜食鵝肝！兩者皆不便宜。

一斤$290，有三包，每包四條。我要左一包。尋日試用嚟炒西芹，用左兩條四十幾蚊！如果好食都冇咩所謂，又唔係成日食；成日食都唔掂啦----唔係個荷包、係啲膽固醇！試後感：唔係唔好食，祇不過與食潤腸無異，我完全食唔倒黑松露嘅味！雖然黑松露價錢貴，但係味道好突出，如果連少少味都食唔出，一係根本冇黑松露、一係份量少到離譜！至於有冇鵝肝，我唔知，因為豬肝、鵝肝定雞肝質感、食味分別不大，我分唔倒！

講開都有點失禮：本地有啲咁嘅食材，我竟然唔知，反而要個住响外國嘅人告知！

今次食過，總算又長左知識咯！

一句講晒：以咁嘅價錢唔值！