廢波波!

2018/04/23 08:00:35 網誌分類: 時事
23 Apr

等到頸都長嘅政府選擇性派錢方案尋日終於公布申請資格,不過市民等到唔耐煩唔代表政府慢工出細貨,事關唔少市民睇完個申請資格依然一頭霧水(總之就係冇我份啦--我捱生捱死供倒個「殼」棲身就冇份、果啲寧願花錢響換手機、旅行都唔供樓嘅人就有份!但係,我有份納嘅稅就要俾「廢波」浪費響啲冇建設嘅行政費度---正一係:善財難捨、寃枉甘心),香港呢個蠢政府派錢都派到亂七八糟,硬係要搞到市民唔媽媽聲唔安樂嘅。(唔係咁:「飯民」邊有存在價值!要阿姐配合,一齊攪衰個「正苦」至得)

 

嗱,港府尋日就喺在職家庭津貼辦事處網頁公布「關愛共享計劃」申請資格,分咗「申請資格」、「居港要求」、「工作情況」同「物業情況」等六個大項,成三十一條細項去講解,但好多市民都話睇唔明。就好似攞緊在職家庭津貼或就業交通津貼嘅市民吖,究竟仲有冇資格攞錢,網頁語焉不詳,淨係叫人參考另一題目嘅答案,弊在個答案根本冇交代清楚,簡直畀佢玩死。唔止市民睇到一臉「黑人問號」,半官方嘅社區幹事都話投降,可想而知個網頁幾咁混亂、幾咁幫唔到手(諗出呢啲「屎橋」嘅人冇腦,佢下面嘅人亦唔慌有腦啦----結果係:阿蘭嫁阿瑞---累鬥累)。不過有樣嘢政府就講到好清楚喎,就係胡亂申請可能要負上刑責,都唔知係想叫市民知難而退吖,定係想叫市民博大霧呢(唔駛驚喎!香港勝在「司法覆核」冇成本、勝在「正苦」唔肯定贏嘅官司唔會同你打......所以搏大霧,絕對制得過)。

 

睇到喇,呢個政府就係咁倒行逆施,明明全民派錢,簡單易明,皆大歡喜,偏偏財爺陳茂波嘅理財新哲學就係要製造分化,添煩添亂(佢地唔係唔明,係死不認錯啫!反正啲錢又唔係響佢份糧度攞出嚟,「正苦」做錯事既唔需要問責、亦唔需要賠償,反正庫房水浸,用納稅人錢之馬)。有數得計,上次鬍鬚曾搞全民派錢六千蚊,平均每宗申請嘅行政費用約三十四元,總行政費約一億二千萬元,但今次陳茂波搞選擇性派錢,受惠嘅人數少咗唔在講,平均每宗申請嘅行政費仲要一百二十一元,總行政費更高達三億大元,係咪冇嗰樣整嗰樣吖?

 

不過咁,眾人皆醒佢獨醉,陳茂波對於呢個超級煩膠嘅派錢計劃顯得信心十足,仲話出年四月就有第一批市民收到錢,暗示政府好有辦事效率喎,真係唔知醜字點寫(對呢個「正苦」嚟講,算係有效率架啦)。喂,家陣先至係四月,即係最快要一年後至收到錢,大吉利是講句,部分老人家隨時等唔切含恨而終,你話政府係咪好帶挈吖(「正苦」望都係咁望啦)。仲有呀,整個派錢計劃又要提供稅單、又要提供物業資料畀當局審查,手續多多,關卡重重,難怪有人話衰過畀乞兒(「淋病」俾五百個大洋俾「乞兒」都唔駛人申請啦!不過,響香港行乞好似係犯法喎---算啦,香港啲法例一早明存實亡)。

 

講開又講,港產官僚出名冇效率,上次全民派錢唔使審批都搞咗一大餐,今次冇兩、三年都唔使旨意搞掂。最好笑係今次仲話設有上訴機制,唔滿意結果嘅申請者四星期內可書面上訴,簡直搵嘢嚟搞。難為波叔仲好意思話呢百幾億派得其所喎,到底係死撐定係真心膠,大家心中有數。(攪得嚟佢都下台咯)

 

都係嗰句喇,取之於民,用之於民,天經地義。港府庫房水浸,依然善財難捨,冤枉甘心,好哋哋一項派錢德政都搞到醜態百出,民怨沸騰,市民有錢收都背脊骨落,唔嬲至奇呀!(「廢波」就係希望大家縑煩唔申請!結果駛得最多係行政費。)

回應 (0)
我要發表
user

最新回應

立 冬
立 冬 2018/06/13

新版都有好處的, 至少用手機來睇會較以前方便.  你休息夠了再回來啦!   {#iconb_21}

VanYYY
VanYYY 2018/05/24
@域 流亦詩...

雖然我封舉,有空仍會拜讀你的大作!

KING.
KING. 2018/05/19

都要改啦, 以前頭條blog都唔係mobile reponsive web. 而家改左,你有冇發覺冇以前咁棘.

域 流亦詩
域 流亦詩 2018/05/18

祝你身體健康、愉快。它朝有機會再在博海相見!