25/4 部署屠牛

港股低開低走呈陰燭, 失守10及20天線, 大舉屠牛, 向30000.29800進發

25/4 周三恒指收報30328, 跌308點(最多下跌392點)

國指收報12094, 跌150點(最多下跌170點), 國指跑輸恒指

臨危托沽.溫水煮蛙式派貨 ~ 港股同條咸魚有乜分別?

上升是為了下跌鋪路, 好友見港股勢色唔對, 昨日已借上証爆升乘機推高恒指424點來預留回調水位, 否則今日已插穿30000大關落地獄, 今日收30328, 好友又預留了三百幾點回吐空間, 拋離30000, 希望守住來後日結算, 不過今日港股走勢差劣, 淡友已奪回主導權, 即係會壓低收市價, 好友形勢不妙, 明日係30000/12000攻防戰, 如跌穿就會瀉

拖到明日終於到了結算前夕, 好友命懸一線, 命運就掌握在中美股市手上, 明日港股表現又會跟上証, 有五一長假期及走資沽壓效應利淡內地股市, 如上証失3100港股就會反艇, 今日大鱷將港股點穴, 在30300游走, 窒窒步跌, 扮跌唔落好明顯係想引牛入局, 牛多熊少有下殺誘因, 下一站30000, 如失, 就會向29800肥牛區進發, 如跌穿呢個關鍵位就會潛行凶間, 所以最好係秒殺肥牛即彈, 推番上去結算

日前話擔心會有驚嚇的一棍, 幾時出現呢? 時辰到喇! 明日起連續3日港股通關閉, 港股缺水喇! 下周一內地休市, 禍福難料, 昨日港股急升係受大媽掃貨所推動, 今早大媽一縮手唔吸貨, 以及內地股市回吐, 港股即瀉, 假的真不了, 早已說過大升大跌大跌都唔好信, 上落只係為了屠牛熊及挾好淡倉, 月尾要追數所以要插穿30000才夠周波幅及月波幅

國指早市跑贏恒指, 一度令大市收窄跌幅, 但午後國指沽壓加劇, 又走鬼, 成交明顯增加, 拉住恒指落山, A股內銀內險資源商品股全面反艇, 拖低H股, 上証收3118, 跌11點, 19/4上証收3100樓上只係1日就碌落去3046, 而昨日上証重上3100已是連續兩日收於其上, 未知是否受今日降準生效所支撐, 但今日權重A股走勢差劣, 上証3100想企穩殊不容易, 上次跌穿3100就推低了港股, 下周一內地假期休市, 內地股市今日已見沽貨套現壓力, 利淡港股

~~~~~~~~~~~~~~~~~~~~~~~~~

極速轉向的港股

港股慣性走勢係一日強爆翌日亦可變臉反艇, 插水後翌日亦可爆升, 貼價牛熊都要死, 大鱷用緊窄幅屠牛熊大法, 假如我係好友就唔會再夾硬推升, 拖到結算日才出手, 否則會惹來更大沽壓, 近日大鱷鍾意玩沖高插水秒殺即縮, 好淡通殺, 無論升跌都不是真方向, 月尾要追數, 大鱷通常會好癲

今個月好友想收升的話, 30/4現貨就要收30093樓上, 而4月份恒指期貨大户加權平均開倉水平在30384, 係好淡大鱷的打交位, 周五見真章

日前已經講過1~3月的統計, 每月最後6天恒指係3升3跌, 即係唔會走單邊升或跌, 本周升跌市日數都未達標, 近日港股無論向好抑或向淡, 都係好短癮, 好快就轉向, 亦符合本周的升跌日數慣性走勢, 當大鱷食飽牛熊就會轉向

~~~~~~~~~~~~~~~~~~~~~~~~~

下行趨勢明顯.30000.29800(關鍵大位不容有失).29500....

自從一月港股跟隨美股見大頂後, 過去3個月一直有無形之手操控大市上落, 插落去又會借好消息踢番上黎扮跌唔落, 全城分析都話30000好硬凈, 餐餐跌穿都急彈死唔去, 皆因大鱷大媽貨多, 想托住來一直派貨及養牛熊, 跌下彈下, 引人入市接火棒, 陰陰跌, 輸屎人, 十個股民十個艇

港股每次反彈都係頂部下移, 一浪低於一浪, 彈散居多, 去年大媽瘋狂掃貨造就了大媽牛市, 當時好友有大媽做後盾, 意氣風發, 但自從大媽二月起積極沽貨撤退, 好友就風光不再, 一直捱打, 輪到淡友威威, 好友節節敗退, 4月尾港股正處月波動區間下方, 反映淡友得勢, 其實多位玄學家風水師早已預測今年港股不妙, 係去年的翻轉版, 不利偏財, 跌下彈下的市況係最難搵食

恒指一月見頂後已連跌兩個月, 如果跌埋今個月就係超樣衰的連跌三個月, 所以好友必需要守住推上30093樓上收來結束月線兩連跌, 港股走弱皆因大媽愛股變成大媽棄股, 升市火車頭變成跌市元兇, 睇下早前大媽掃入的股份, 如今狂丟出街, 大媽頭號愛股QQ等科技股落地獄等如港股要潛行凶間,

過去3個星期恒指在29979~31094游走, 唔少人都短炒波幅, 但靜極思動, 冇得再磨, 係時候爆邊, 因為月尾決戰要分勝負, 港股現處波動區間下方, 代表淡友勝, 有向下爆邊的風險

唔少樂觀牛派都話有咁多利淡消息都守得住30000因而唱好後市, 信就中伏了, 相信樂觀的散戶已經買到成手蟹貨, 扮守得住30000其實係大鱷的陰謀, 咬住指數來派貨, 久守必失, 我信股份表現, 唔信指數, 指標股已率先破位而下, 跌到走樣, 向下趨勢明顯, 預示 30000唔撐得幾耐, 昨日死貓已彈完, 繼續尋底之旅, 如能守住關鍵大位29800就可以推番上去, 繼續用窄幅屠牛熊大法來好淡通殺

~~~~~~~~~~~~~~~~~~~~~~~~~

北水及熱錢撤退

未來3日港股通關閉, 冇左大媽條水喉買貨, 今日QQ潛行空間就係俾大媽的沽盤殺跌, 幾個月前有位估市奇準的超級高手話QQ唔值$400, 會逢高沽, 後來QQ一路殺上$470樓上, 睇大媽的走鬼盤, 看來$400樓上果然係虛火上升, 今日收$386.8, 我認為就算跌至$380也不會是底, 仍有下跌空間, 不過呢個係大倉位所在, 跌到呢個水平或會有反彈

下周二三(1~2/5)聯儲局議息、中美貿易戰、港美拆息升、美元強人民幣弱、加息陰霾下, 熱錢撤走, 北水湧港已成過去, 去年入場資金(大媽/大鱷/基金)於今年積極沽貨獲利鬆人, 去年港股識升唔識跌, 一頂高過一頂, 逼你高追, 但仍個個賺到笑, 隨街股神, 但而家隨街平貨任你買, 大鱷點會平貨益街坊, 散戶一買即艇, 就知唔對路

港股通（滬）2018-04-25
賣出  騰訊控股.建設銀行.中國石油股份.融創中國.北京汽車
買入  兗州煤業股份.中芯國際.中國華融.石藥集團.工商銀行

港股通（深）2018-04-25
賣出  騰訊控股.中芯國際.舜宇光學科技.北京汽車
買入  金蝶國際.碧桂園.中國國航.三生製藥.石藥集團

~~~~~~~~~~~~~~~~~~~~~~~~~

QQ敗象已呈.成跌市火車頭

去年升市火車頭科技股QQ.舜宇光學.瑞聲科技今年碌落山, 變成跌市元兇, 代表去年港股上山, 今年落山, 其實唔少貿易戰受累股過去一個月沽壓沉重, 洗倉式下挫, 走勢不妙, 港股早晚會被拉落山

騰訊今日急跌2.5%，並跌穿去年12月中密集區低位$387.4, 低見$384.8, 收$386.8, 技術上出現一浪低於一浪的形態, 弱到冇朋友, 皆因美國科技股早已轉勢向下, 拉住QQ落山, 即係港股都會俾QQ累死

自從QQ大股東Naspers在$405批股, 以及美國向中國科技企業開刀, 就等如判了QQ及港股死刑, 早前QQ在$400穿梭, 我就覺得恒指理應失守30000, 但當QQ續瀉, 跌到走樣, 確認失守$400大關展開大跌浪, 大鱷竟然利用匯控.友邦.中移.平保及油股推番恒指上去30300, 連藍燈籠匯控中移都出動, 真係死得, 按此推算, 恒指企30300只係假象, 插穿30000才合理

睇大鱷點穴手法真係神級, 港股今個星期玩左3日, 今日收市位又去番上周五的水平, 但唔少股份卻慘遭洗倉, 跌到阿媽都唔認得, 其實係大鱷托住指數來派貨, QQ創今年新低皆因滬深大媽齊齊大舉走貨, 因為明日港股通關閉冇得走, 昨日大媽掃QQ我都已經話係撩高派貨, 會插穿前低位$393.4, 今日真係走鬼破底, 成也大媽, 敗也大媽

~~~~~~~~~~~~~~~~~~~~~~~~~

走鬼洗倉

昨屠熊.今屠牛.好淡通殺: 熊5830 VS 9565牛

今日收30328, 熊在30648, 肥牛在29800~30200, 牛個頭近

睇今日港股表現, 有濃濃的走鬼洗倉味, 多隻監察股都破位而下, 30200樓下牛牛命危, 好友小心, 月尾大鱷追數會好癲, 昨日港股底頂上移屠熊, 只得一日貨仔就極速變臉, 今日港股底頂下移屠牛, 最多跌392點, 低見30244即彈, 可能係受結算因素所推動, 睇走勢會插穿周一低位30184來屠牛, 本周就會係先高後低呈弱勢

今日恒指低見30244, 殺左104張相對期指對沖張數牛證, 全日咬住轉倉水平30384穿梭, 仍未嘔突昨日的升幅, 即係未跌夠, 雖然整體下跌股份非常多, 但相對美股的跌幅, 港股唔算跌得多, 可能有結算或IPO托市因素, 不過明日IPO截止喇! 唔使再托喇! 可以落地獄喇!

昨日港股大彈高屠熊, 牛牛竟然唔趁打開逃生門乘機食胡, 最要命係29800~30000牛仲再加倉, 大鱷睇到流晒口水, 牛牛要買定官才喇!

~~~~~~~~~~~~~~~~~~~~~~~~~

道指已連跌第五個交易日, 為一年以來最長跌市, 真係散水咖!

美國財長努欽將在數日內訪華, 與中國就兩國貿易爭端進行談判, 特朗普稱很可能達成協議, 唔知到時市場有乜反應,

美股受債息急升拖累大瀉, 但奇怪的是今早內地及亞太區股市跌幅都不大, 上証表面上跌幅溫和, 不過內銀內險資源商品A股全面反艇, 獲利沽壓沉重, AH差價效應下, H股亦被A股拉落山

本港一個月拆息升穿1.3厘, 續創2008年以來新高, 地產股反艇

李嘉誠繼續增持長實, 於4月24~25日分別以每股67.4423元及66.955元,增持長實, 涉資2.337億元, 李嘉誠早前於10~17日, 連續6個交易日增持長實, 累計涉資7.41億元, 兩輪增持, 合共涉資9.747億元, 企業回購窒礙港股下跌步伐