30/4 月結乾升

港股爆升畫月線收陽收升.高開高走呈陽燭.連升2日.大舉屠熊

30/4 周一恒指收報30808, 急升527點(最多上升572點), 收復10.20.50.60.100天線

國指收報12331, 急升264點(最多上升295點), 收復20.50.100天線, 國指大幅跑贏恒指

港股急升暴跌是常態.好淡通殺.假期前後例牌大龍鳳

牛熊分布非常貼價, 上落都有得開餐, 冇必要再夾硬推升, 今日港股急升, 遠牛食胡.貼價牛上移.熊進場, 300點內貼價熊有超過2000張, 肥到漏油, 但BB牛亦上移, 牛熊都在屠殺範圍內, 看來5月又係繼續玩好淡通殺,

由於今次港股係創逾3周新低29871後拗腰, 所以反彈動力比之前幾次強, 一舉突破過去兩周高位30665及30849, 高見30853, 不過今日係乾升挾淡畫月線, 消息面並不配合升勢, 反彈千點夠水位俾大鱷轉身, 上到現水平即近期波動區間上方(30000~31000)只會惹來更大沽壓, 30800升穿不難.企穩不易

港股慣性走勢係唔會走單邊, 無論升跌, 通常三兩日就轉向, 目的係好淡通殺, 如今已連升兩日, 即係即將會回吐, 或會下試關鍵位30200, 順道回補今日的上升裂口30336~30483, 點升上黎就點落番去

4/4見底29518後三扒兩撥彈番上去, 12/4見頂31094後展開跌浪, 26/4見低位29871後連彈兩日爆上30853, 從整個4月走勢來看, 係上旬見頂後一路走鬼碌落山, 4月埋單得以收升全靠呢兩日合共大升801點, 大市明明處於跌勢, 但就夾硬畫月線收陽收升, 升得好假, 其實成個月都係走貨撤退格

由於5月成份股除息大低水近200點, 所以大鱷今日就由30280抽上30808高收, 目的係將現貨大幅拋離30200, 想守住期指30000, 問題大部份成份股都係5月下旬才除息, 即係5月上旬都會一直呈大低水, 想守住30000殊不容易

假期前後例牌大龍鳳, 周三復市又要坐過山車, 港股命運就掌握在大媽及大鱷手上, 過去幾個月大媽密密走貨, 如果大媽繼續走貨就會拖低大市,

今日港股大升代表本周好友先奪得主導權, 已預留回調水位, 部署周五收30280樓上, 能否如願就要睇聯儲局議息結果及貿易戰談判, 禍福難料, 如有利淡消息, 淡友就有反擊藉口推低港股, 本周埋單就要收跌

~~~~~~~~~~~~~~~~~~~~~~~~~~~~~~~~

超級星期的陰霾

本周重頭戲係中美貿易談判, 聯儲局議息, 友邦.恒生周五(4/5)公布業績, 市場憧憬周五(4/5)匯控公布首季業績會否宣布回購, 我認為匯控強係因為QQ弱, 有大量QQ好倉及牛牛拉住QQ後腿, 大媽走QQ以及科技股俾狂人打瓜左, 大鱷想推高港股只好推匯控上山, 基金泊入匯控亦有避險作用, 匯控.友邦.恒生公布業績前炒高亦要慎防見光死, 當天亦係平安好醫生上市日, 而周六(5/5)轉節氣立夏, 預示有大變

根據慣性走勢, 通常港股一轉向就會非常急勁, 彭彭聲就升跌千點, 不過跟住又會掉頭, 唔好見港股急升就以為冇事, 其實係暗湧處處, 美元直指92，今次美元突然走強連外匯專家都跌眼鏡，而家專家預測會上93, 美債息雖然沖高回落，但仍處高水平，人民幣及港匯走弱，股匯債形勢都不利港股, 不過港股有人睇場, 每次插穿30000/12000都識得走番上黎, 可能想托住來派貨

2月及3月港股連跌兩個月, 如果4月的月線都收跌, 步入熊市機會增加, 所以呢兩日好友全力大反擊, 今日爆升就令月線收大陽收升, 一舉收復所有平均線, 暫時穩住大市

大量成份股將於5月除息, 有好息之徒買盤趁低吸納, 另外本港銀行同業拆息上升, 亦利好匯控.恒生.中銀香港等本地銀行股, 投資者沽出貿易戰受累股換馬

~~~~~~~~~~~~~~~~~~~~~~~~~~~~~~~~

窄幅困局殺牛熊

過去一個月大市主力在30000~31000主區間游走, 但大鱷鍾意玩假突破, 耐不耐玩下爆邊嚇鬼震倉殺好淡友, 上周向下爆邊低見29871, 殺牛及震走好友就拗腰急升, 至於幾時再插穿30000, 就要等養肥牛牛才隊得,

今日係月尾最後一天, 大鱷屠熊追數, 又係乾升挾淡, 成交係24/4以來最細, 並不配合升勢, 未來幾日立立亂, 今日的買盤可能係淡友補空倉, 基金經理唔似會在現水平追貨, 港股現處近期波動區間上方, 我估會走貨減磅,

由於本周係超級星期, 所以今日市前分析我係估大鱷明知後市不妙, 會推高港股來預留回調水位, 亦要畫月線及屠熊, 因為未來幾日港股會有大震盪, 加息陰霾, 內地加強金融監管, 貿易戰, 市場上充斥着大量負面因素, 普遍投資者都傾向趁反彈沽貨減磅, 亦會拖低大市

~~~~~~~~~~~~~~~~~~~~~~~~~~~~~~~~

上升是為了下跌鋪路

周一市前我估大鱷會挑戰30400~30800阻力區屠熊, 冇諗過真係夠膽死上到頂, 結果神級的大鱷就玩一步到位, 臨收市伸多一腳上30808屠熊, 超標完成任務, 點解咁心急? 大鱷驚周三大媽回歸沽盤殺到冇得升, 亦驚今明兩天老美議息反艇, 所以今日拿拿臨夾硬衝上去屠熊先, 既然衝上去是為了屠熊, 再插落去屠牛當然亦得, 30200~30418新增了256張BB牛

港股雖然收復多條平均線, 但都不可太樂觀, 港股長時間在千點內窄幅上落, 平均線癡埋一堆, 升穿或跌破的技術指標可信度下降, 大裂口升跌轉頭又回補已成常態

AH差價有個平衡點，如H股大升(例如今日)，相關A股都升就OK，如A股不肯升，H股就要落番嚟配合番A股平衡點的股價

今日大鱷踢咗H股上天, 偷步推高, 就喺想A股跟升, 以前都試過港股趁內地休市偷步上升, 結果係俾A股拉番落黎, 因為港股升並非受基本因素推動, 而係受大鱷挾淡.月結.殺熊.養牛熊等多種因素所帶動, 唔關內地股市事

2/5 周三恒指收報30723, 跌84點(最多下跌237點, 一度上升16點), 失守50.60天線

國指收報12193, 跌137點(最多下跌209點), 失守50.100天線, 國指大幅跑輸恒指

牛牛已上移至屠殺範圍, 今晚聯儲局議息, 小心明日大裂口落山屠牛