7/5 止跌回升好淡通殺

7/5 港股創即月新低大舉屠牛後轉升.結束3連跌掉頭向上.熊熊命危

恒指收29994(即月低位29791)/國指收11966(即月低位11845/11843)

踏入5月港股連跌3日, 已經食左殺左3103張相對期指對沖張數牛證, 大鱷飽到上心口, 7/5創1個月新低後倒升收市, 係利好訊號, 翌日8/5升勢持續, 未有再創新低, 反映7/5只係向下假突破, 大市已由底頂下移變成底頂上移, 代表大市已轉勢向上, 展開尋頂之旅, 港股慣性走勢係試完底會再沖頂, 即係會向31000進發, 如能上企3日, 就會以500點一級向上推進

過去一個月港股係彈散居多, 因為當時29800附近重倉牛未死, 如今肥牛已陣亡, 插水任務已完成, 肥熊不斷下移, 有誘因推升屠熊

回顧今年1月尾見頂33484後, 過去3個月恒指只係試過3次收低過30000大關, 第一次3日後彈上30500, 第二次翌日就彈番上去30500, 第三次兩日後就彈番上30200, 如今已經處於30000兩日, 預示即將會有大反彈,

世上沒有只升不跌的股市, 亦沒有只跌不升的股市, 以往港股作出大調整, 落山屠牛, 都不會一去冇回頭, 當食飽肥牛就會彈番上去再挑戰前頂, 收復平均線, 順道屠熊, 如市強就上破前頂創即月新高, 如市弱就會受阻而回, 再落番去屠牛,

港股表面上雖然走弱一路向下屠牛, 但由於樓上熊熊不斷下移, 愈來愈肥, 大鱷可以食食下牛突然轉口味衝上去屠熊, 係聲東擊西, 今日弱雞明日亦可急升, 一支大陽燭足可以扭轉跌勢, 大鱷係睇住牛熊佈局來出手

恒指3月份的月波幅有2158點, 4月份有1575點, 4月份的月波幅明顯收窄, 點穴橫行時間已足夠, 係時候爆邊, 由於7/5已向下爆邊創新低見29791, 試完底再沖頂, 即係會向上爆邊, 4月頂在31094, 如5月能升穿, 就確認爆邊, 向上突破, 會向下一個關鍵位31800進發, 再挑戰3月高位31978

我一直深信既然大鱷有能力將港股長時間點穴, 就有能力大幅抽升或殺跌, 即市500點上落已是常態, 如果碌落山是為了屠牛, 同樣地, 亦可彈番上去屠熊, 大鱷已完全操控港股, 急升暴跌再急彈是常態, 港股30000/12000係有無形之手睇場

~~~~~~~~~~~~~~~~~~~~~~~~~~~~~~~~~~~~~~~