劉偉恒新戲談等待愛情 陳茵媺
2018/05/14 04:12:23 網誌分類: 生活
劉偉恒執導的《某月某日》，是一套發生於1992年的校園愛情故事，湯怡及原島大地飾演學生，雷頌德（Mark）和陳茵媺（Aimee）就飾演嚴肅的訓導主任及和藹可親的老師。劉導演表示電影主題是關於要等的愛情，阿Mark稱劉導的作品予人純真感覺，亦是首次演戲不用搞笑，更可做番自己；而Aimee就好喜歡這類浪漫愛情小品，有場戲當她知道男朋友失約時，仲喊到收唔到聲，非常深刻。劉偉恒坦言今次再執導的壓力好大，希望能感動到觀眾。
《某月某日》講述熱愛觀星的湯怡與反叛的原島大地在海邊相遇，暗生情愫。未幾，原島大地被父親送到寄宿學校，數月後更要移民外國。二人日後難以相見，加上湯怡的母親不斷阻攔，但最終他們排除萬難，展開一段遙距戀愛，同時還要面對親人、老師和同學等各方面的挑戰和衝擊。劉偉恒表示故事是承接他執導的首部電影《王家欣》，「上一部係講尋找嘅愛情，今次就係等待嘅愛情，兩個人見唔到面，咁點呢？就係要等囉。」
鐵定男女主角
點解會搵湯怡和原島大地做男女主角？劉偉恒解釋：「當我寫呢個故仔時，我想由一個好乖嘅人去做，但唔可以扮乖，要真乖，咁我留意咗湯怡好耐，佢真係一個乖乖女嚟，約見面時佢真係好乖，佢唯一擔心係要做一個十幾歲嘅學生，但我同佢講你做到嘅。至於原島大地係隨口講嘅，因為前年喺金獎像見得佢，佢又有日本人嘅氣質，我話如果係原島大地演就好喇，跟住電影公司幫手穿針引線，即刻搵到喺日本讀緊書嘅原島，咁啱就到佢嘅暑假，就返嚟拍喇。」
首次唔使搞笑
阿Mark在戲中飾演一個好嚴厲的訓導主任，負責管教原島大地、周不時鬧他。劉偉恒笑言識阿Mark好耐，他平時好Cool又冇乜表情，便大膽問他：「我有個角色要黑口黑面你制唔制？」想不到阿Mark很快便答應，他坦言：「我拍親齣齣戲都係搞笑嘅，佢話呢部真係唔係搞笑嘅，我未試過拍一齣唔係搞笑嘅戲，今次終於可以好正經咁做一個角色，咁我即刻制囉。」加上今次演出對他來說都算容易，「其實我不嬲係咁，但O依家脾氣係好咗嘅，所以只係做番較早前嘅我、脾氣唔好嗰陣時，過程都好玩嘅。」
挑戰老土外形
Aimee飾演的英文老師與阿Mark相反，性格善良，與學生比較friend，還教原島大地怎樣追女仔。她記得電影中最深刻一場是，「當我終於知道男朋友唔會嚟，等待原來係冇用嘅，我覺得好失望、好sad，嗰場戲拍完我仲喊到收唔到聲，工作人員都行埋嚟問：Are you ok？」Aimee拍電視劇出身，原來她很喜歡拍電影，仲好想試吓演反派或精神有問題的角色，她解釋：「因為唔似自己係好大挑戰，好似我拍呢套戲時，導演話會有少少老土，唔係咁靚，跟住我話愈核突愈好，啲觀眾愈唔認得我就愈開心，愈覺得成功。」預祝電影於本月31日上映後票房大收！
主持：黃柏高 統籌：林永匡 攝影：袁東亮、謝民光
協力：李佩儀 場地：阿一海景飯店
化妝：Marsha Ma 髮型：Lorraine Lam @ Hair Culture (陳茵媺)
黃柏高
■劉偉恒（右二）大讚雷頌德（左一）和陳茵媺（右一）收到他所想表達的message，又能充份發揮出來，令他非常滿意。
■電影中，（左起）雷頌德和陳茵媺同是飾演老師，故有不少對手戲。
■雷頌德表示自己經常好Cool，在戲中做訓導主任冇難度。
■陳茵媺今次飾演外形有點老土的英文老師，她表示是好好的嘗試。
■劉偉恒為了進步，今次拍攝時畀自己好大壓力，試過去到片場感恐懼。
■30歲的湯怡今次要飾演十幾歲的學生，她表示都有壓力。
■做過童星的原島大地，這是他成年後首度回歸港產片的作品。
回應 (0)
我要發表
