星島辯論賽聖保羅、啟新奪冠 司長妙論辯才 有助考政府工
2018/05/23 04:12:13 網誌分類: 生活
總決賽喺灣仔伊利沙伯體育館舉行，由港大李嘉誠醫學院院長梁卓偉以及語文教育及研究常務委員會主席黃嘉純分別擔任中、英文組評講。政務司司長張建宗現身撐場，佢致辭時話人才唔一定係辯才，辯才一定係人才，仲話參加辯論對CV有幫助，佢爆料話新入職嘅政務官，可能有一半讀書時都參加過辯論比賽㗎！Kelly聽聞有份擔任評判團嘅財經事務及庫務局局長政治助理楊寶蓮（Pauline），中學時就曾奪得星島第十六屆辯論比賽「最佳辯論員」獎及第十七屆英文組冠軍隊，絕對係司長口中講嘅官場人才啦！
講返比賽，聖保羅書院之前喺第三十屆星島辯論決賽失落冠軍得第二，今次捲土重來有過百人撐場，重奪冠軍超興奮；贊助商兼頒獎嘉賓之一伯恩光學首席財務官梁遠榮原來係聖保羅校友，頒獎當日特別換上聖保羅校呔以示支持！賽後兩隊冠軍隊齊齊大唱校歌慶祝，high爆全場， Kelly都被佢哋興奮心情感染！
Kelly推介大家用QR code瀏覽POPnews短片或上「星島辯論」facebook專頁，一齊感受吓總決賽嘅精采盛況！另外記得唔好錯過下周一刊登於《星島日報》嘅辯論比賽特刊呀！
Kelly Chu
■梁遠榮頒獎給中文組冠軍聖保羅書院。
■政務司司長張建宗表示參加星島辯論對搵政府工有幫助。
■香港大學李嘉誠醫學院院長梁卓偉。
■語文教育及研究常務委員會主席黃嘉純。
回應 (0)
我要發表