30~31/5 止跌回升熊命危

期指結算日港股洗倉式下挫.低開低收呈陰燭, 大舉屠牛趙完鬆, 反彈在望

30000大關失而復得, 反彈阻力30500, 關鍵大位30800

30/5 周三恒指收報30056, 大跌427點(最多下跌520點)

國指收報11769, 大跌190點(最多下跌236點), 國指跑輸恒指

5月期指結算價為30053
5月國指期貨結算價為11760
6月份恒指期貨的大户加權平均開倉水平為30259​
6月份國指期貨的大户加權平均開倉水平為11907

昨晚美股急挫累街坊, 內地股市大瀉, 上証6連跌並以全日最低位收, 超樣衰反而係好事, 股市暴跌觸動阿爺神經有望逼到阿爺出手護盤, 上証收3041, 大跌79點(-2.53%), A股明日入摩指, 代表內地股市變天, 以今日收市水平來看, 上証的上升空間比下跌大, 只要上証守住3000~3050，重上3100, 好友就可借勢推高港股

今晚美元及10年期債息雙雙回落，有助紓緩港股的壓力，油價急彈亦利好, 按照月尾3升3跌的慣性走勢(而家係2升3跌, 尚欠1升)，即係明日港股將會反彈, 要留意尾市執位會有異動, 成交會大增

未來兩日港股都會受A股納入MSCI及港股成份股調動所牽動, 反彈阻力在30500, 肥熊在30600, 係多條平均線密集阻力區, 沽空連日急增, 都有誘因上攻挾淡, 當向上擴大波動空間受阻, 就要再落去繼續尋底, 上落市好淡通殺格局不變, 不會單邊升或跌, 因為單邊升就會益左好友, 單邊跌就會益左淡友, 急升急跌, 急跌急彈, 令股民無所適從企錯邊, 大鱷大媽才能獲得最大利潤

~~~~~~~~~~~~~~~~~~~~~~~~~~~~~~~~~~~~

重倉牛死.肥熊命危

如明日上証止跌回升有助推動港股向上, 受AH差價牽引, 只要A股升, 就會推動H股向上, 從而推高港股, 中港股市通常係同步見底頂, 如上証今日見底, 港股亦會跟隨止跌, 恐慌性拋售急挫後大市例彈, 明日A股入摩成份股調動, 只要趁大成交收陽收升就可畫一幅見底圖來穩住大局, 引股民入局

從陰謀論來看, 今日急瀉夾硬插穿30000根本就喺為了屠牛，29964~30500肥牛一鋪清袋秒殺趙完鬆, 殺左3505張相對期指對沖張數牛証, 所以當大鱷食飽，大市就彈番上30000收, 昨日牛熊分佈嚴重失衡導致港股今日急挫殺牛，甚麼歐債危機只喺大鱷殺跌屠牛的藉口，港股升跌根本係由大鱷話事,  以大鱷大媽的能力, 單日升跌500點係好濕碎, 升跌都不能盡信, 並非真方向, 當低位收夠貨或者食飽牛牛又會踢番大市上去屠熊, 當牛牛再養肥又會再插過, 不斷以溫水煮蛙方式來蠶食股民的血汗錢

大鱷今日開大餐後牛熊分佈嚴重失衡情況已紓緩, 下殺誘因大減, 今日港股急瀉夠驚嚇, 未死的遠近牛都嚇到走鬼, 大鱷賺到笑，就算食唔到29900樓下牛牛都要震到佢地止蝕, 大鱷食飽牛牛震走牛牛, 港股即係彈得啦!

港股連日大跌插穿30000大關, 多位淡友瘦青.沈大C.經仔通梁蛇.少毛石全面看淡後市, 瘦青及沈大C唱雙簧話而家係歐債危機的翻版, 講到好似股災一樣, 唔少技術派/圖表派都唱到落250天線甚至更低, 你估大鱷會點做? 港股牌面利淡我亦同意, 但一眾高手似乎忘了港股有無形之手護盤, 守住30000來溫水煮蛙式派貨, 唔想嚇到雞飛狗走冇人入市接火棒, 大鱷亦會耐不耐推番大市上去殺熊熊及挾淡來搵食

~~~~~~~~~~~~~~~~~~~~~~~~~~~~~~~~~~~~

大成交急挫利轉向

反正今個月的月波幅已達標，連本周波幅都已達標, 明日冇必要隊穿今日低位29964, 而且5月份亦已超標食夠牛熊交數, 屠牛追數亦告一段落, 大鱷或會俾港股彈番上去, 再養牛熊, 部署下一場殺戮, 現時29800水平的牛不多, 未食得, 要再養肥才能開餐, 明日係5月最後一個交易日, 大鱷亦要推高大市來畫月線，基金要埋月結, 亦有黑期結算, 以往插穿30000例牌抝腰, 就算收穿亦不會收29xxx超過3天,

今日港股續瀉, 其中一個原因係內地債券收益率降至去年9月以來最低水平, 國內去槓桿及監管力度加大, 債務違約, 拖累內銀股下挫, 國指創3個半月新低, 唔少股份都破位而下, 殺跌其中一個目的係逼到股民止蝕, 連經仔通梁蛇都嚇到沽貨走鬼, 大手減倉, 亦代表其他技術派股民都投降, 大鱷奸計得逞, 低位收夠貨或趕走好友, 所以大成交下挫後通常會轉向

雖然消息面不利港股, 但港股通常係跌下彈下, 今日插穿30000亦不應太悲觀, 全城向下望反而要小心大鱷玩反手推升, 其實以月波幅來看, 6月都要重上30500來擴大波幅, 否則唔夠水位俾大鱷轉身, 熊熊亦已下移至30600水平, 在6月的波動範圍內, 只要屠熊後仍收30600樓上, 代表會挑戰30800關鍵大位

~~~~~~~~~~~~~~~~~~~~~~~~~~~~~~~~~~~~

大鱷今個月繼續玩好淡通殺, 全月計殺牛熊分別都係約萬一張, 皆因急升後就急跌, 急跌後就會急彈, 唔會走單邊, 仍在30000~31000主區間上落，兩邊爆都企唔穩, 所以好友淡友唔快閃都要死, 企得遠才能保命,

大鱷大媽鍾意玩極速變臉, 今日暴跌, 翌日亦可爆升, 明明升得好哋哋, 翌日亦可裂口大插, 股民根本冇得走, 所以我成日話一過夜就變天

金融市場立立亂, 本周係超級星期更是亂上加亂, 連日大跌恒指插咗1500點，夠晒驚嚇，以跌幅計有望作出似樣反彈, 因為恐慌性拋售的裂口通常都會回補, 今日的下跌裂口在30241~30454

今日插穿30000大關區間底部, 短炒淡友都夠水位食胡啦! 因為未來幾日有成份股調動, 禍福難料, 無論好友抑或淡友有得食梗係速閃啦! 今日暴跌至30000~31000波動區間底部, 唔少股民都博反彈, 皆因現水平短炒買上有值博率, 大鱷大媽鍾意玩跌下彈下來派貨，唔會玩大單邊

今日: 熊4125 VS 8981牛 (牛熊分佈失衡情況略為紓緩.下殺誘因降)
昨日: 熊4869 VS 10548牛 (今日殺3505張肥牛)

結算後6月開新局, 受多隻成份股除息拖累, 期指會呈大低水140點

四年一度盛事「世界盃」將於6月14日~7月15日舉行, 唔少投資者/經紀/基金經理不是申請假期, 就是每逢有賽事就趕回家中觀賞球賽, 世界盃期間成交會萎縮, 五窮已成定局, 六月又會如何? 會出現「六絕」嗎? 抑或係大鱷趁6月市靜人人看淡反手推高大市挾淡倉呢?

月結港股結束兩連跌.受MSCI納入A股推動.中港股市報復式反彈.高開高收呈陽燭

31/5 周四恒指收報30468, 升411點(最多上升477點), 挑戰30600

國指收報11978, 升209點(最多上升230點), 國指大幅跑贏恒指

點跌落黎就點上番去, 牛遠熊近利上攻: 熊6149 VS 8378牛

受MSCI納入A股的技術性買盤所推動, 今日港股爆升, 牛趁反彈食胡, 大量熊熊飛撲入市, 即係明日不會插水放生肥熊，牛熊分佈均衡, 牛在29900, 熊在30600, 熊近牛遠, 令上攻誘因增加, 即係明日會挑戰30600水平, 不過明日大鱷可能會留力, 因為本周波幅有875點已達標, 而且有周末沽壓效應及成份股調動, 立立亂, 加上今日升勢過急, 亦會令明日沽壓增加, 所以明日冇必要夾硬推升,

30600樓上是多條平均線的密集阻力區, 關鍵大位在30800, 升穿有運行, 不過大鱷可能忍忍手, 下周才闖關, 如明日收升, 觸底後兩連升係見底訊號， 以周波幅來看, 下周就會上破30600大屠殺, 向30800進發, 因為全場最重倉熊在30600及30900, 按照大鱷的習性係必吃

內地股市今日升過籠, 明日亦會有壓力, 上証收3095, 剛好去到3100阻力位, 如上証回吐亦會壓住港股, 明日係畫周線的日子, 好淡大鱷角力水平為上周五收市位30588/12047,

好友今日反敗為勝佔上風, 不會輕易放手, 如明日再度趁大成交收升, 下周就可更上一層樓, 要留意明日尾市受成份股調動影響, 成交會急增, QQ捱埋今日MSCI減比重走勢就會改善, 明日QQ增比重買盤有助推動大市向上, QQ好.港股好

股民要留意的是, 由下周一起QQ佔國指比重增加至4%, 即係分別佔恒指10%/國指4%, 舉足輕重, QQ升跌等如港股升跌, 係大鱷操控港股上落的最佳棋子, 散戶小心企錯邊冇命, 我估大鱷殺完QQ好友而家輪到推升殺淡友

~~~~~~~~~~~~~~~~~~~~~~~~~~~~

急跌急彈是常態.牛死熊命危

港股今日底頂上移, 代表明日會升穿今日高位30533, 向上推進, 向下好友會守30300水平, 港股今日雖然大幅上升並收復昨日的失地, 但仍處於下降軌中, 亦在10.20.50.100天線之下, 要上破並企穩才脫險

本周大市在30500穿梭, 好淡通殺養牛熊, 以目前牛熊分佈來看, 升穿30600機會大, 如有利好消息, 就會進一步挑戰關鍵大位30800，向31000進發, 如果淡友攔唔住，收市上企關鍵大位就死得, 不要忘記港股30000/12000有無形之手護盤, 試完波動區間底就會再上沖挑戰前頂, 昨日一插穿30000即彈, 今日冇再跌穿係利好訊號

港股通(滬)已是連續7日出現資金凈流出, 大媽繼續沽貨走人, 狂人掀起全球貿易戰, 往後要突破31500才夠月波幅, 否則就要再插穿30000大關才夠月波幅, 但落山未係時候, 估計6月初會先向上挑戰30600~30800阻力區來擴大月波幅, 因為肥熊近在咫尺, 沽空急增, 有上攻挾淡誘因, 30600樓上有四棍合共超過2000張肥熊

港股有個慣性走勢, 就係當大市升到你唔信(例如7~14/5六連升)就會失驚無神掉頭連日大插, 跌到阿媽都唔認得, 但當跌到走樣(例如29~30/5連環插, 低見29964), 就會突然無啦啦連日爆上, 可能又會係升到彭彭聲, 會否歷史重演等下周揭盅啦!

港股呢種急升暴跌再急升的大型上落市就令股民輸到趴街, 大鱷賺到開巷, 技術派圖表派就俾大鱷舞到失暈, 插穿30000以為向下破位落地獄追沽死得, 升穿31000殺上31500以為向上突破追入買上又死埋, 擺明係好淡通殺, 大鱷最陰毒係裂口爆升或插水, 企錯邊根本冇得走, 散戶在明, 大鱷在暗, 在港股跌下彈下的過程中, 大鱷係必勝, 散戶多數走避不及被屠

A股入摩, QQ減比重本來今日QQ沽壓增加, 但卻俾大媽突然掃QQ的買盤所抵消, 港股得以脫險, 明日港股成份股執位, 今次係QQ增比重, 利好QQ及港股, 亦有助推動大市向上, 下周收市如能上企30500, 下一站30600.30800.31000.31200.31500....., 如本周恒指收跌, 就係連跌3周, 今年試過三次連跌3周後, 都會爆升反彈上關鍵大位, 淡友冇趁30/5大插食胡就命危了

恒指5月高低位29791~31592, 月波幅點1801, 而家港股在區間低位附近, 買上值博率高, 總之睇住區間來炒上落, 單日升跌500點對大鱷大媽來說係易如反掌, 睇今日港股表現就會明白技術指標弱亦可突然大陽燭爆升, 連阻力位都攔唔住

6月7日歐洲央行議息

6月7日內地智能手機生產商小米在港上市聆訊, 小米計劃在中港兩地上市 (內地 CDR約$234億, 本港IPO約$546億), 6月底招股

周五(6月8日)七國集團G7峰會之前，G7財長會議率先舉行，美國貿易保護主義成為會議焦點, 彭博資訊認為今次貿易爭端引發七國集團自上世紀 70 年代成立以來最嚴重的危機

「世界盃」將於6月14日~7月15日舉行, 假如我係基金經理, 就會在6月初推高港股, 食胡, 提早埋半年結鬆人, 去嘆世界睇波

6月11日 匯控策略日

6月12日美朝峰會於新加坡舉行, 兩位絕世狂人會面

6月12~13日美聯儲局議息

6月底基金半年結

6月15日美國公布對中國徵收25%關稅相關商品