入行26年首開個唱 溫碧霞送大家一個集體回憶
2018/06/04 04:12:29 網誌分類: 生活
Irene出道以來以演戲為主，90年代曾出過數張大碟，至近年都有出過國語專輯，她坦言：「偶然我都會去內地登台，但喺香港真係好耐冇唱歌，亦好耐冇喺舞台上同fans見面。其實今次演唱會係伍健雄構思咗海潮個名再搵我，由於我好鍾意呢個名，亦知道有好多fans鍾意，所以我希望呢個演唱會係作為送畀香港fans嘅一份禮物。」
期待跳舞
為了配合今次「海潮」主題，演唱會舞台設計會以花海為主，再配襯特別設計的服裝，營造一個浪漫的感覺。而揀歌方面，Irene都花了不少心思，「因為我要唱好多歌，除咗自己嘅歌，仲會唱人哋嘅歌，例如好經典嘅《O靚妹仔》主題曲同《停不了的愛》嘅主題曲，啲歌全部都係我嘅心聲，睇到我一路成長嘅改變，所以希望大家聽到啲memories會返番嚟。」Irene坦言演唱會亦是給大家的一個集體回憶。此外她還會跳舞，她續稱：「大家可能好少機會見到我喺舞台上跳舞，其實我自己都好期待，已經開始排練緊。」而嘉賓方面，Irene透露已邀請了剛舉行結婚派對的鍾欣潼，其他嘉賓則要賣個關子，屆時必會令大家有驚喜。
勤做運動
現時Irene除了用很多時間練歌，也忙於做運動，「其實今年年頭拍完寫真後，已經有個心態係要操fit自己，所以呢段時間都會不斷做運動。」而她最鍾意就是做瑜伽，一項好好的運動，一有時間便會做。問她飲食方面要戒口嗎？她續說：「其實我冇乜點戒口，因為我太鍾意食嘢喇，頭先做完嘢先食咗杯雪糕。」她認為keep fit之餘人都需要營養，所以她寧願多做運動去keep。
兒子捧場
問8歲兒子何國倫（Xavier）會現身演唱會捧場嗎？她笑說：「佢已經好期待，第一時間舉手話去。（佢會唔會同你一齊唱？）咁又唔會，其實佢冇聽過我嘅歌，不過佢好鍾意音樂，因為我由細到大培養佢聽好多歌，佢又鍾意跳舞，表演慾都幾強。而且佢受我影響，個人好開朗，成日都好開心。」Irene表示完騷後，將會拍部古裝劇，她的電影工作室亦會開拍一套改編自真人真事的少女成長電影。工作雖忙，但Irene表示放暑假一定會帶兒子去旅行享天倫樂，「因為平時好少時間陪佢，所以暑假已plan咗同佢去美國度假。」
主持：黃柏高 統籌：林永匡
協力：李佩儀 攝影：袁東亮、謝民光
化妝、髮型：Khaki Yan
場地：西苑酒家
黃柏高
■Paco教溫碧霞飲威士忌加暖水可以開聲，溫碧霞笑言自己酒量淺好易醉。
■溫碧霞將於本月19日在麥花臣場館開個唱。
■溫碧霞的keep fit之道就是努力做運動。
■溫碧霞與丈夫何祖光經常帶養子何國倫旅遊享天倫樂。
■溫碧霞在TVB劇集《火玫瑰》飾演「海潮」，令觀眾留下深刻印象。
■早前溫碧霞在深水埗一商場舉行演唱會記招。
■今年初，溫碧霞到番禺商演，全場爆滿。
回應 (0)
我要發表
