7/6 利淡訊號

港股連升6天大舉屠熊, 惟高位出現利淡訊號, 明日跌市高危日

7/6 周四恒指收報31512, 升253點(最多上升262點),

國指收報12407, 升124點(最多上升144點), 國指大幅跑贏恒指

急升就會急跌.點升上嚟就點落番去

今日大鱷又食熊掌, 連續四日大舉屠熊合共6936張, 食飽未呢? 大鱷推升必有所圖， 升埋今日大鱷已完成多個任務, 千點周波幅已達標, 升抵本周目標31500, 食咗1405張肥熊, 六連升平了5月的記錄, 即係明日跌得啦!

大鱷擅長營造股市氣氛，牽住市場鼻子走，所以股民要逆向思維，冷靜分析，見大升都唔好淨喺向上望，大鱷玩緊跌下彈下, 好淡通殺, 溫水煮蛙式派貨，當食飽肥熊就會部署屠牛/震牛, 插完就會急彈, 唔會玩單邊升市，連日上升引咗唔少牛牛入局, 30400~30700係重倉牛所在, 亦係4/6的上升裂口區, 喺大鱷屠殺範圍內, 不過呢個水平亦係多條平均線的密集區,

由於升穿或跌破關鍵位或平均線就會觸發程式買賣盤，大鱷就利用呢一點來抽升殺跌，玩假突破來逼好友淡友埋牆角，喺大鱷操控大市的手法，導致港股急升暴跌, 其實騰上騰落仍在大型上落區之內

~~~~~~~~~~~~~~~~~~~~~~~~~~~~~~~~~~

暗湧處處

咪見升市就以為港股好景, 港股轉向係極速, 裂口秒殺, 企錯邊的股民往往走避不及, 股民在明, 大鱷在暗, 任大鱷屠宰, 大市不斷急跌急彈再急挫, 頻頻轉向，令人無所適從, 股民入市不是坐艇就是止蝕, 大鱷呢種手法就蠶食了股民的血汗錢

港股連升六日令全城都向上望, 圖表派/睇倉位的分析師都唱到出外太空, 非常樂觀，逆向思維, 又要小心喇! 大鱷係唔會咁順灘咖!

早已說過好少全周日日升, 明日危呀! 31600~32000係港股多個頂位所在, 想向上突破殊不容易, 向下插穿31000反而不難, 大鱷不可能一直守得住31000，今個月仲有3個星期咁長，飛天遁地都得, 一係插穿1/6低位30363, 一係上破今日高位31521才夠周及月波幅，月中世界盃開鑼，大鱷/基金於6月一開局就拿拿臨推升就喺想散水，沽貨埋數然後去睇波

現水平接近5月頂31592, 即喺5月波動區頂部，誰會咁傻在高位追貨接火棒? 原來散户真喺以為港股係重拾升軌因而追入咖! 其實現水平下跌空間比上升大, 俾我就梗係沽貨撤退炒波幅啦! 過去幾天日日升, 夠皮喇! 所以我估明日係跌市, 今日已走貨, 我唔信大鱷咁好死一路推上去俾股民食胡獲利

~~~~~~~~~~~~~~~~~~~~~~~~~~~~~~~~~~~

六連升明日斷纜機會大

感覺上港股升得好假, 無啦啦連日爆升超過1500點殺淡友, 同5月一樣, 都係插穿30000突然拗腰, 靠挾淡夾硬推番大市上31000, 其實成交並不配合升勢, 只係靠成份股調動及配股才谷到千億成交

其實港股仍處於困局中, 慣性走勢係30000~31000兩邊爆都企唔穩, 見殺上31000都唔好盡信, 好難企得穩, 會俾地心吸力拉番落嚟, 玩31000穿梭都得, 多位玄學界高人都話今年港股不會飛天, 我信咖! 每次反彈都係虛火上升, 不會突破前頂，大鱷食飽熊熊就會插落去屠牛，好淡通殺

新興市場貨幣危機, 外圍政經貿易戰股匯債都立立亂，港股的大媽牛市名存實亡，因為大媽積極走貨撤退, 少咗大媽條水喉, 我估大鱷寧願玩29800~31600區間上落, 都唔會爆頂單邊炒上, 因為向上或向下炒單邊好易俾股民捉到路, 輸死大鱷, 31600~32000係過去4個月的頂部, 除非內地股市飛天, 否則港股好難獨自去偷歡升穿32000

港股正處於29800~31600的大型上落市中, 大鱷都唔想炒單邊, 因為風險太高, 亦要花好多子彈, 舞高弄低, 突然轉向, 急升暴跌, 震到失暈, 大鱷反而能獲得更大利潤, 好過夾硬破頂殺上去, 到時人人沽貨及做淡就輸死大鱷, 按照慣性走勢, 明日會係跌市, 但全周埋單會喺升市, 而下周埋單會收跌, 如果下周都收升, 連升兩周就打破了過去兩個月的慣性走勢

今次六連升大反彈, 表面上大鱷殺了約7000張相對期指對沖張數熊證, 其實大鱷仲殺咗大量指數及個股淡倉衍生工具, 亦震走了唔少遠熊, 嚇到佢地止蝕, 係大鱷的陰謀, 所以升市都不要太樂觀, 大鱷有能力抽升亦可殺跌, 單日升跌500點是常態, 既然一棍大陽燭令大市轉勢向上, 亦可以一棍大陰燭令大市轉勢向下, 港股升跌由大鱷話事

~~~~~~~~~~~~~~~~~~~~~~~~~~~~~~~~~~~

騰訊出現見頂訊號利淡

港股表面上大升收市, 但其實今日中港股市都出現多個利淡訊號, QQ及內地股市腳軟, 過去3日下跌的VHSI恒指恐慌指數在升市期間喺下跌，即喺唔驚，但今日港股急升，但恐慌指數亦升, 即喺升穿31500驚跌喇!

小米在港上市聆訊今日完結, 滬深大媽大手走QQ, 港股通(滬)資金凈流出急增, 連上周見插穿30000嚇到減倉走鬼的大淡友經仔通梁蛇都突然看好叫買上(牛及正股), 即喺大市即將會調整, 大獅兄及梁蛇兩位燈神都唱好喺強烈利淡訊號, 好友明日要小心噢!

國指六連升都無法收復100天線, 代表投資者認為貿易戰利淡中資股, 美元強亦利淡人民幣，因而趁反彈暗暗走貨, 壓住國指, 港股其實喺暗藏殺機, 本周連升四日, 但避險的公用股卻大受追捧, 唔喺好現象, 如果後市向好, 為何投資者將資金泊入公用板塊避險?

過去4日QQ都喺以全日最高位收, 但成交見縮減已見暗湧, 反映愈升買盤就愈縮, 而今日QQ未能以全日最高位收, 打破了過去4日的慣性走勢, 今日升穿$430但企唔穩, 有見頂味, 釋出利淡訊號, QQ喺港股強弱指標, QQ見頂, 港股就要掉頭向下,

受AH差價牽引, 中港股市相關系數非常高, 中港股市見底頂通常喺同步, 如上証見頂回落, 失守3100就會拉住港股落山, 港股亦會同步見頂, 今日港股尾市急升可能喺預留回調水位, 亦可能喺好友伸多一腳上去食胡鬆人, 因為明日有周末沽壓效應, 喺跌市高危日,

我講咗好多次，港股有個好特別的現象, 大市強爆急升, 但翌日都可突然變臉弱雞插水, 暴跌翌日亦可急升, 快速轉向係無跡可尋, 所以我成日話一過夜就變天, 我估喺短炒大鱷搞風搞雨, 夾硬抽升趙完鬆, 壓低收貨再抽升挾淡, 而家全城看好就要小心港股會反艇喇! 以周波幅計, 下周會插穿30800，以1800點月波幅計, 今個月一係升穿31800, 一係下試30000

史哥分析:6月波幅區 :

(28759)-29204-(29649)-30108-30337-(30567)-30796-31026-(31485)-31957-（32429）

~~~~~~~~~~~~~~~~~~~~~~~~~~~~~~~~~~~

升抵本周目標31500出現利淡訊號

恒指企31000, 500點一級, 上望31500, 今日高見31521已升抵本周反彈目標, 31592係前頂, 會見阻力, 因為去到上月波動區間頂29791~31592必定會有避險沽壓, 當出現見頂訊號或無法再創新高, 股民就會爭相沽貨, 形成骨牌效應, 拖低大市, 「世界盃」效應亦利淡大市, 人人都趁反彈走貨, 安心去睇波啦!

居安思危，上月連升6日都喺升得好哋哋, 人人向上望, 唱到出外太空(今次都有唔少分析話會上破32000殺上去32600~大型上落區頂), 連日急升及唱好言論嚇到冇乜人敢做淡, 紛紛跟風買上, 但當時港股卻突然轉勢向下, 股民輸到趴街, 所以今次大升我就有戒心, 29800~31600高沽低買才有勝算, 信圖表走勢以為會爆邊出現單邊市反而會中伏

今日升抵31500本周做夠千點波幅, 已達標, 因為基本周波幅係800~1000點, 千點已足夠水位俾短炒大鱷轉身, 或會食胡鬆人, 要密切留意上証是否已見頂, 因為中港股市通常喺同步

見港股大升也不要太樂觀, 前車可鑑, 港股已連升6日, 平了二月以來連升記錄, 五月連升6日都斷纜嘔四百點, 跟住跌下彈下落山，代表升勢過急會有獲利盤出籠,

明日(周五)會有周末沽壓效應, 會喺升勢斷纜高危日, 本周一至四都喺升市, 明日要跌喇!因為港股好少全周日日升咖! 騰訊$425是強弱關鍵, 亦喺港股好淡指標，當QQ見頂或失守$425, 就代表港股反彈浪結束, 要QQ企穩$425港股才有力上沖

港股重上31000大鱷就一直咬住唔放, 因為正在尋頂以及要屠熊, 但今日出現見頂訊號, 大鱷亦殺夠肥熊, 任務完成即喺冇必要守住31000, 玩31000穿梭上落市都得

出得嚟行，遲早要還，連升扯住上通常冇好下場, 今年1月及5月都喺有一浸急升，升到你唔信, 透支了往後的升幅, 結果都喺反艇收場, 一見頂就急跌, 嘔番升幅出來,

港股已升至關鍵阻力大位, 估計淡友會在高位31600~32000攔路(可參考下列財經日誌), 升市都不要太樂觀, 港股變臉喺極速, 4/6有上升裂口在30600附近是後患, 史哥分析說如回吐, 只要守得住30750/12100代表反彈浪仍未結束

~~~~~~~~~~~~~~~~~~~~~~~~~~~~~~~~~~~~~~

財經日誌

結算後6月開新局, 受多隻成份股除息拖累, 期指會呈大低水140點, 隨著股份陸續除凈, 期指大低水幅度會逐步收窄

6月7日歐洲央行議息

6月7日內地智能手機生產商小米在港上市聆訊, 小米計劃在中港兩地上市 (內地 CDR約$234億, 本港IPO約$546億), 6月底招股,

周五(6月8日)七國集團G7峰會之前，G7財長會議率先舉行

「世界盃」將於6月14日~7月15日舉行, 假如我喺基金經理, 就會在6月初推高港股, 沽貨食胡, 提早埋半年結鬆人, 去嘆世界睇波, 過去幾日的升市好似我呢個劇本, 所以唔好以為港股會單邊向上, 我估會喺沖高回落，跌下彈下炒上落市, 不會一直企31000樓上，見頂後就會再下試30000

6月11日 匯控策略日

6月12日 美朝峰會將於新加坡舉行, 兩位絕世狂人會面

6月12~13日 美國聯儲局議息

6月基金半年結, 近日已見粉飾櫥窗盤, 可能喺想推高來沽貨提早埋半年結

6月15日 美國公布對中國徵收25%關稅相關商品