馬浚偉邀好友演《徐志摩》3.0 崑曲加水袖舞 胡定欣 : 好大挑戰
2018/06/11 04:12:28 網誌分類: 生活
全新的《偶然•徐志摩》將於6月29日開始假演藝學院歌劇院演出11場，馬仔繼續坐鎮飾演主角徐志摩外，仲搵來新面孔定欣和林敬剛(King Kong)齊齊玩。馬仔謂：「呢次3.0劇本係壓縮版，節奏更明快，舞台亦係全新設計。之前同定欣拍《深宮計》時認識深咗，發覺佢唔止演技一流，仲比早幾年成熟咗。覺得可以再合作，就親自邀請佢飾演陸小曼一角，最好彩定欣有期，才撮成好事。」
密集式苦練
馬仔更睇中定欣多才多藝，安排一場逾兩分鐘水袖舞獨腳戲予視后，定欣苦練過後都有少少壓力，她笑說：「第一次做舞台劇就要首度演崑曲，首次跳水袖舞，真係好大挑戰。雖然我有中國舞底子，但練水袖舞體力消耗好大，加上我之前要去橫店逗留兩個月拍《包青天再起風雲》，所以出發前跟趙鳳儀老師密集式上堂學崑曲。開頭好沮喪，覺得無十年學習都唔敢上台，真係好難，崑曲藝術係好高層次，好高修養嘅，唯有每日學4小時不停練，去橫店前學晒放心晒嘞，希望表現好啦！」
巴打拍住上
好情義的馬仔，call了黃澤鋒再演外，亦搵埋相識多年的好友林敬剛齊過戲癮。劇中King Kong扮演定欣的軍官丈夫王賡，獲對方指導舞功，有段大跳華爾滋的浪漫戲。對於處男做舞台劇，King Kong謂要努力背台詞，並贊成定欣睇法，站在台上需注重身體語言多過面部表情，需以另一種模式去演繹。問到馬仔與King Kong相識經過，馬仔笑說：「當年我成日和江華同關寶慧去飲嘢，有日佢兩個搵埋King Kong出嚟，點知King Kong飲多兩杯發酒癲撩我，嗰時我同佢都唔熟，有啲嬲無睬佢。之後02年拍《洛神》時同佢合作，我發覺佢工作態度好好，對佢另眼相看，之後就friend咗。」而馬仔和澤鋒更是廿幾年好兄弟，上次搵對方客串，今次就叫澤鋒飾演徐志摩表哥沈叔薇，戲裏戲外都是知心友，澤鋒說：「劇中我性格精靈又生鬼，喜劇位喺晒我度。」
主持：黃柏高 統籌：林永匡
攝影：李維隆、謝民光 協力：林書鉉
胡定欣 服裝：Acne Studios from Lane Crawford、
化妝：Cyrus Lee、髮型：Matt Chiu@Xenter
馬浚偉化妝及髮型：RickyKAZAF and Bonnie Tsang
場地提供：江南庭叙（電話：3188 2667）
黃柏高
■定欣表示一向鍾意唱歌跳舞，好恨做musical，今次處女下海，期待上台的感覺。
■近日，馬仔和定欣努力練舞，坦言拍劇後增添默契。
■馬浚偉（右二）和黃澤鋒（左二）兩度合作，今次二人飾演表兄弟。而林敬剛（左）和胡定欣就初次做舞台劇，望演出成功。
■馬浚偉完成舞台劇公演後，9月會到北京大學修讀商業管理碩士課程。
■重演的舞台劇，女主角由萬綺雯（圖）換上胡定欣。
回應 (0)
我要發表
