12~27/6 股災式下殺屠牛

15/6周五收市~貿易戰+匯市波動利淡港股.繼續尋底屠牛之旅, 向29129進發

假期前後例牌大龍鳳.港股洗倉式下挫.恒指三連跌收30309, 跌130點, 形勢不妙

港股連跌3日, 後知後覺慢3拍的vhsi恒指波幅(恐慌)指數終於上升0.57%, 識驚喇! 大戶可能認為世界盃期間港股仍走不出主波動區間30000~31000, 似乎看輕了貿易戰及世界盃的殺傷力

港股連日下跌, 恒指收30309, 跌130點, 指數仍在30000~31000主區間內只係假象, 刻意在波動區間底部游走, 扮跌唔落, 引股民入市接火棒, 大鱷係溫水煮蛙式派貨, 其實唔少指標股已經跌到走樣, 係洗倉式下挫, 指數有大鱷托住來養牛熊, 但股份卻是破位而下, 跌穿波動區間底部, 走鬼格, 真係似趕住沽貨埋數然後去睇波, 國指已是連續兩天收200天線之下, 災味甚濃, 250天線在11707, 真係危危乎

今日收30309, 現時29700~30300有6棍雪花肥牛，29500樓下有瘦牛，前底在29129, 如果係股災就唔好估底, 低位缺乏承接力, 基金經理收爐的話, 誰會接貨?

無論周波幅抑或月波幅，6月下旬都要插穿30000，假期前後例牌大龍鳳, 下周4日市要做晒平時5天的波幅, 真係冇眼睇, 由於貼價有肥牛，所以應先下殺，如先上攻就會放生肥牛，所以要置諸死地而後生，

5月恒指的月波幅係1800點, 今個月落到29700就做夠月波幅(31521頂-1800波幅=29721，但在世界盃及貿易戰下，有可能要插深d, 即係做超過1800點月波幅, 二三月股災式下挫, 恒指月波幅就高達2150~2700點, 即係有機會下探前底29129(31521-2700=28800), 按照慣性走勢, 下周恒指會收跌

~~~~~~~~~~~~~~~~~~~~~~~~~~~~~~~~

部署下殺屠牛

昨日恒指進一步失守50及60天線, 早前被大鱷騙入局博反彈的牛牛嚇到腳軟, 千多張牛牛慌忙止蝕逃命, 所以今日大鱷特登咬住30200想再引番多些BB牛入局, 約千隻BB牛真係飛撲入市, 中伏了, 要買定官才喇!

今日港股續瀉, 收30309, 本周恒指波幅有983點, 過去兩個多月恒指升一周跟住就會跌3周，6月第一周升咗，第二周跌，根據呢個慣性走勢即喺未跌夠，仲未見底, 大鱷習性係尋底市裂口下殺碌落山, 唔俾牛牛逃生

成個股災劇本正在上演, 窒窒步跌係養牛引好友入局, 利淡港股的因素多到不得了, 貿易戰升溫, 半年結內地流動性緊絀, 大媽沽港股撤資, 美國加息步伐加快, 內地經濟以及信貸皆放緩, A股破位而下, 新股招股抽走市場資金, 美元強爆, 貨幣危機亦升溫, 土耳其里拉、墨西哥披索、阿根廷披索及巴西雷亞爾等國家貨幣大幅貶值, 市場已出現恐慌, 憂慮金融風暴重臨

賤美攪屎棍，狂人日日發癲，股匯風雲變色，美國聯儲局加息0.25厘, 並預期今年的加息步伐會加快, 強勢的美匯午後突破95水平,  為去年11月以來首次,單日升幅高達1.5%, 歐元顯著下挫, 跌至1.155水平, 人民幣兌美元挫245點子, 跌至兩周新低，道期大跌, 怪不得港股午後跌勢加劇, 港股底頂下移, 貼價牛牛好友食完端午粽就要去見屈原喇! 上証跌穿3100, 恒指失守31000, 如上証跌穿3000, 恒指就會失守30000, 由於今年恒指的年波幅仍未達標, 要擴大年波幅, 今次跌浪就要插穿前底29129, 向28000進發

港股低開低收呈大陰燭創即月新低, 股災式暴跌, 一舉失守30000.29800及29500, 大舉屠牛

19/6 周二恒指收報29468, 暴跌841點(最多下跌977點), 失守200天線

國指收報11492, 暴跌377點(最多下跌472點), 失守250天線, 國指大幅跑輸恒指

大鱷食左5540隻肥牛, 飽到上心口, 抖下啦! 今年試過一次4連跌, 一次5連跌, 按照慣性走勢明日恒指會有反彈, 只要淡友補空倉或上証止跌回升, 就可推動大市向上, 中港股市通常係同步見底頂, 上証拗腰的話, 港股就會跟升

今日港股大成交插水, 係恐慌性拋售, 相信今日低位29332不是大底(今年目標係插穿前底29129落地獄), 但可能係短底, 會有死貓彈, 回顧二三月恒指股災式大瀉, 月波幅係2150~2700點, 而恒指由高位31521插到今日低位29332, 月波幅2189點, 已進入達標範圍, 如果跟足二月最大波幅, 就會見28800

上周見港股連日下挫已醞釀反彈, 但還欠一棍, 今日大插插已出現, 大鱷唔鍾意玩單邊, 因為唔想俾股民捉到路, 所以大市通常係跌下彈下來派貨及養牛熊, 唔會日日跌, 大鱷就可好淡通殺, 後日轉節氣夏至, 持倉過夜小心企錯邊, 

~~~~~~~~~~~~~~~~~~~~~~~~~~~~~~~~~~~~~~~

國指已跌穿所有平均線, 弱到不得了, 有濃濃的股災味, 要等阿爺打救, 恒指亦跌近250天線, 但呢個係超級關鍵大位, 只要唔隊穿, 就會令人以為牛市未完, 引到股民入市接火棒及買牛牛博反彈, 我估明日大鱷會忍忍手唔隊住，會推上去派下貨, 彈上去玩下吻別, 亦可順道擴大波幅空間, 彈高亦可逼走淡友及熊熊, 如果直落, 點炒到月尾結算呀?

不要低估大鱷操控大市上落的能力, 大插後急彈亦司空見慣, 不過市弱彈散容易彈高難, 過去幾個月港股成個格局就係乒乓球式反彈, 頂部下移, 愈彈愈弱, 最終彈唔起要落地獄, 大鱷溫水煮蛙, 人人都以為30000~31000炒波幅, 靠近波動區間下方就紛紛入市掃貨, 有股民及基金竟然滿倉, 就係因為早前炒波幅試過幾次甜頭獲利, 最終遇上股災, 大市一沉不起

本周仲有3個交易日, 大鱷不會直落地獄益淡友, 港股亦好少全周日日升或跌, 會有死貓彈, 我家淡友已食胡, 即係升得啦! 等彈上去再沽過, 以往恒指收30000樓下最多三日就會彈番上去, 不過今次係股災市弱可能只係吻別, 失守大位(29800.200天線.30000)不會一去冇回頭, 不過29300樓下貼價肥牛及國指弱雞會拉住港股後腿, 彈上去亦會惹來沽壓, 好難企穩高位

大鱷操控大市的能力真係神級, 輕而易舉就插近千點, 大鱷為了屠牛乜都做得出, 今日港股跌千點, 暴跌市期指未平倉合約減少係利好訊號, 可惜減幅唔算好大, 可能只係小淡友食胡, 大淡友仍未食胡, 現水平磨下養肥牛牛再殺過都得, 今日低位29332, 前底29129及250天線都係關鍵大位, 只要養肥牛牛, 當時辰一到, 一插穿大位港股就會急瀉, 程式沽盤會拉住大市落地獄

20/6 周三恒指收報29696, 升228點

死貓彈完續尋底.一彈即散齊走鬼

今日港股沖高回落, 本來升近500點, 但嘔番超過一半即市升幅出來, 沽壓極度沉重, 吻別了29800及200天線兩個大位, 飛吻了30000大關就分手, 今日一彈就引左大量BB牛入局, 牛熊分布嚴重失衡, 29300樓下有重倉牛, 為即將插穿250天線及前底29129來陪葬, 將會死得轟烈

21/6 周四恒指收報29296, 急挫400點

等緊破底冇眼睇.股災市切勿估底

今日轉節氣夏至, 係大變日, 果然創新低, 下至, 大吉利事, 明日有周末沽壓效應, 牛牛命危, 今次跌浪唔簡單, 係去年升到你唔信的翻轉版, 係跌到你唔信, 唔好估底, 樓上已封了頂, 要跌穿首季低位29129才可擴大年波幅, 港股而家係股災, 唔好再信牛屎派,

恒指周波幅通常有800~1000點, 癲起上黎就有1100~1400點周波幅, 到目前為止本周高低位29285~30012, 波幅只得726點, 仍未達標, 即係未見底, 下一站29129.29000, 如失守29000, 再落就會係28800.28500.28000.27800.....

250天線及前底29129危危乎, 呢兩日港股落到大位就特登窒窒步, 跌下彈下就引左大量牛牛喱係29300樓下, 愈養愈肥, 中伏了, 今日大鱷食左1617張牛牛, 仲未夠飽, 貼價仍有三千多張牛牛待屠, 真係要買定官才,

每次傳出阿爺救市, 大鱷就會拿拿臨下插屠牛, 以免夜長夢多, 人民幣貶值勢頭持續, 跌到走樣, 人仔資產遭離棄, 中港股市冇運行, 股災市通常係裂口殺跌級級落, 一係開市即插, 高位一瞬即逝, 唔俾好友牛牛逃生, 要食飽牛牛才會反彈

29129/29000係超級大位, 拖得一日得一日, 愈遲插穿, 扮跌唔落, 樓下牛牛就會愈肥, 企業回購.阿爺救市.養牛.預留下周波動空間.轉倉.期指結算, 都會影響港股升跌韻律, 大鱷鍾意玩跌下彈下, 即市震到失暈, 誤導股民大市已見底, 就可養牛引好友入局, 然後再插過,

昨日恒指一度由即市低位29406爆上29944, 由低位拗腰急彈538點, 真係嚇屎人, 但高位一瞬即逝, 好明顯大鱷唔想放生肥牛, 今年首季低位29129, 為大型橫行區底部, 插穿來擴大年波幅係無可避免,

騰訊係港股升跌棋子, 如QQ跌穿$395, 恒指就會插穿前底29129, 今日QQ未失$395係留番黎做隊穿29129的火車頭, 如QQ失$390, 恒指就會插穿29000, 港股有濃濃的洗倉走鬼味, 真係股災呀! 逢高沽才有活路, 內銀弱到不得了, 如內銀內險續跌, 港股就要潛行凶間, 

22/6 周五恒指收報29338, 升42點

頻頻彈散弱過鬼.大方向仍未見底

想守住29000係不可能的任務, 去年點升上黎, 今年就點落番去, 6月收跌已是毫無疑問, 底頂下移, 按照慣性走勢, 下周會有新低, 今個月反艇, 7月反而有望做好

股災重臨.洗倉走鬼.深不見底.結算在即.好友反擊

港股低開低走呈大陰燭, 大舉屠牛, 失守29000及250天線, 形勢進一步惡化

25/6 周一恒指收報28961, 大跌377點(最多下跌443點, 一度上升65點), 失守250天線

國指收報11209, 跌131點(最多下跌199點, 一度上升50點), 國指跑贏恒指

一開即插牛歸西.熊市低處未算低

港股已失守所有平均線, 成個股災格, 失守29000向下係無險可守, 一破大位就會係人踩人走鬼, 跌到你唔信, 級級落, 窒窒步養牛再瀉, 28800.28500.28300.28000.27800.....唔好估底,  市弱跌市通常係先高後低, 早市見即市高位, 午後創即市低位, 熊市對好消息冇反應, 對壞消息非常敏感, 股份洗倉式下挫, 如能先低後高, 午後創即市高位利好, 係好友反擊訊號, 後日周三結算前夕, 周四結算, 好友想反擊就要係未來兩日出手

去年港股的大牛市係狂人+大媽搞出黎, 今年的熊市亦係呢兩位孖寶搞出黎, 出得黎行, 遲早要還, 我講股災.走鬼.熊市.撤資已經講左幾個月, 亦一再強調大媽大鱷係溫水煮蛙式派貨, 臨危托沽, 港股弱勢已成, 但市場上仍有唔少分析話係牛市, 真係信者失救,

連阿爺降準恒指都閃唔到上29500, 今日高見29403, 每周基本波幅800~1000點你話會點死? 29403頂-800~1000=28603~28403(本周最低消費), 大量BB牛日日飛撲入市等同自殺, 拉住港股落地獄, 重倉牛排到落28500, 剛好在本周波幅範圍內, 當大鱷食飽肥牛大市就會彈, 只要淡友食胡補空倉, 港股就會急彈

內地股市破位而下, 阿爺已束手無策, 連老外都狂沽A股走鬼, 滬深股通出現資金凈流出, 係要錢唔要貨大舉撤退, 內銀內險資源商品A股全面急挫，AH差價效應, 拖累港股反艇, 本港拆息愈升愈有, 本周政府將會宣布一手樓空置稅, 地產股捱沽, 人民幣貶值, 內地推全國互聯網登記制, 內房股沽壓沉重

過去5個月恒指最大月波幅係二月股災的2670點, 如代入今個月, 31521頂-2670波幅=28851, 只要明日插穿呢個水平就創今年最大波幅, 唔好估底, 真係股災, 洗倉走鬼, 超賣可以再超賣, 不過周四期指結算, 睇下好友會否作出垂死掙扎

恒指急挫大舉屠牛後收窄跌幅, 部署結算位
26/6 周二恒指收報28881, 跌80點(最多下跌456點, 一度上升73點),
國指收報11118, 跌90點(最多下跌218點), 國指大幅跑輸恒指

港股連續兩日急挫, 今日落到28505明顯見買盤, 低位一瞬即逝, 可能係淡友補空倉, 即市走勢係先低後高, 大市收跌但午後冇創新低(近日跌市例牌午後見低位), VHSI恐慌指數下跌, 連升19日的一個月港元拆息今日回落, 隔夜拆息更急跌至0.9厘, 美元回落, 係今日港股跌幅收窄的主因, 可能好友唔想在28500樓下結算, 亦有可能係小米IPO維穩盤, 今日扮跌唔落當然亦係為了養牛, 重倉BB牛在28000~28500, 肥到漏油

大市超賣，周波幅已進入達標範圍，月波幅亦已超標，明日結算前夕，後日結算喇! 好友竟然冇全力反擊, 可能係慳子彈, 拖得一日得一日,

大鱷係睇住牛熊來出手，經過今早大屠殺後, 本來老肥牛已陣亡, 港股抝腰急彈是正路, 但今日港股扮死唔去就引左二千幾隻BB牛進場, 真係大鑊, 會拉住港股後腿, 因為彈高就會放生肥牛, 要大鱷食飽牛牛才能彈高

內地股市反艇, 內銀內險資源商品A股續瀉, 滬深大媽齊齊走鬼, 港股通(滬深)都出現資金凈流出, 阿爺下令唔俾斬倉, 想保住A股, 表叔大媽只好沽港股撲水, 港股多數係午後創即市新低皆因大媽多數係下午狂丟貨, 拖低大市

今早插到落28505,  重倉老牛死得七七八八, 港股隨即拗腰一度倒升, 未能收升皆因港股沽壓太大, 港股好少全周日日升或跌, 而家已連跌兩日喇! 未升過呀! 股災好友重創敗退, 死貓彈一彈就散, 人民幣弱到冇朋友, 中資股慘遭洗倉, 係拉港股落地獄的元兇, 今日港股表面上跌幅不大, 但下跌股份極多, 即係托住指數來洗倉派貨, 代表尋底之旅未完, 災味愈來愈濃

港股仍未見底, 因為恒指年波幅未達標, 只係俾結算因素及大鱷扮強養牛窒礙了下跌步伐, 公用板塊逆市急升, 代表避險情緒強烈, 資金沽出高危股換馬泊入防守性股份,

「五窮六絕七翻身」?

港股高開低走, 單日轉向呈陰燭, 明日期指結算, 靜候技術性反彈

27/6 周三恒指收報28356, 跌525點(最多下跌539點, 一度上升107點),

國指收報10879, 跌239點(最多下跌273點, 一度上升44點~開市位), 國指大幅跑輸恒指

好友節節敗退, 港股跌到阿媽都唔認得, 踏入6月下旬, 大鱷單邊下殺屠牛, 殺埋今日呢棍, 短短半個月已屠牛21068張, 仍未有見底跡象, 今次熊市殺牛仲多過一月的牛市, 一月單邊上攻屠熊, 殺熊20636張

6月中牛多熊少, 引來大鱷殺機, 推港股落山玩大屠殺, 但食埋今日呢口肥牛, 由於連日大插屠牛, 老肥牛已死得七七八八, 牛熊分布出現罕見的牛少熊多, 熊6834 VS 5524牛, 如果明早再插就會益左熊熊有胡食咖喇! 看來大鱷要炒下反彈喇!

按照慣性走勢, 港股好少全周日日升或跌, 而家已連跌3日, 未升過呀! 想推升的話, 明日結算係好友反擊的最佳時機

明日期指結算, 無論大市抑或個股都嚴重超賣, 有望作出技術性反彈, 不過好友要小心, 因為現時雖然整體牛少, 但牛近熊遠, 大鱷想開餐就要落山隊穿28300,

今日低位28342不會是浪底, 因為恒指年波幅仍未達標, 不過近日企業回購明顯增加, 加上基金粉飾櫥窗，亦會窒礙了港股下跌步伐, 28000~28500會係好淡角力的區間, 向上爆邊代表好友勝

內地股市跌勢持續, 內銀內險資源商品A股續瀉, 滬深大媽齊齊走鬼, 港股通(滬深)都出現資金凈流出, 港股今日又係午後創即市新低皆因大媽下午狂丟貨, 拖低大市,

人民幣續瀉, 將中港股市推落地獄, 今日美元再度急升, 重上95, 利淡股市, 七一長周末在即, 港股沽壓未除, 亦係近日頻頻彈散的原因之一, 不過明日有結算因素, 好友雖重創但仍力守28300來部署結算位

美股跌到走樣, 道指處於200天線之下, 連強勢的納指走勢亦已轉差, 油價急升, 好友托住油股來撐市, 中港股市幅即市走勢圖極度相似, 係上証拉住港股落山, 換句話說, 要內地股市止跌回升才可幫到港股, 否則仍要潛行凶間, 留意內銀內險QQ及地產板塊表現, 係港股升跌火車頭,

過去五個月結算日恒指走勢:

一月低開低收(收升月)

二月高開低收(收跌月)

三月低開低收(收跌月)

四月高開高收(收升月)

五月低開低收(收跌月)

六月高開?收(收跌月)~夜期大高水, 明日有望高開

(今年每個結算日競價開市都係梅花間竹~低高低高低, 所以明日輪到恒指高開, 按照慣性走勢, 結算前大插, 結算日反而表現會較佳, 因為好友會反擊來部署結算位)

大摩:「我們正在走向徹頭徹尾的熊市。」「這是一個危險的市場。」

日前我係網誌提及恒指基本周波幅800~1000點,

29403頂 - 800~1000 = 28603~28403(本周最低消費),

今日低見28342, 周波幅已達標, 但大量BB牛日日飛撲入市, 拉住港股落山, 今日再插525點, 牛牛真係累死港股，不過有半年結基金粉飾櫥窗買盤，港股有望作出反彈

港股連日急挫, 超賣多時, 昨日下試28500水平大V彈, 呢幾日全世界都掃牛博反彈, 大鱷梗係隊深d啦! 今日低見28342牛牛屍橫遍野, 好了, 好友股民死心棄牛買熊, 今日飛撲入市掃熊買跌, 你估合家慘大鱷會點做呢?

~~~~~~~~~~~~~~~~~~~~~~~~~~~~~~~

睇過去幾日港股走勢, 好友似係想明日在28500樓上結算, 就算一如史哥所說今日低見28342真係拗腰上番去, 但往後都要插穿28000才夠年波幅, 而家恒指只得約5000點年波幅, 去年都有8316點啦! 就算打個八折都係未見底, 只係大市超賣及結算在即, 窒礙了下跌步伐, 等好友反擊望到頸都長, 明日結算係最後機會, 今個月恒指波幅已遠遠多過2月股災，真喺走鬼咖!

按照慣性走勢, 世界盃期間例淡, 今次港股插水好正路, 但世界盃完結例升, 加上過去15年的七月有13次收升, 所以捱埋今次跌浪, 以月波幅來看, 七月仍有望再上29000

我都想有死貓彈, 以為拖到結算前夕, 今日好友會作出垂死掙扎, 點知尾市再俾淡友隊多一棍, 想死貓彈又要等明天, 吊頸都要抖下氣啦! 唔該彈下啦!

上周五大鱷扮跌唔落, 守住29000, 但一過左周末, 開新局即刻插穿29000, 本周會不會又係用同一招? 好友要推番大市上28500/12000才能脫險, 跌市火車頭QQ終於失守250天線, 收$377.4, 挫2.2%

中港股市災味愈來愈濃, 上証連跌3日, 收2813, 跌31點(-1.1%), 為25個月低位, 今日又係內銀內險資源商品A股急瀉拖低內地股市, 只得石化雙雄A股急升, 人民幣曾跌穿6.61關口, 跌至去年12月低位