父親節與薯片

2018/06/14 04:12:42 網誌分類: 生活

14 Jun

　　下星期就係父親節，如果你問我呢個做老竇嘅有冇期待，話冇都係講大話。噚晚食完飯冇耐，阿仔突然問我：「老竇，禮拜日係咪十七號呀？」我心諗：「衰仔，估唔到你真係咁有我心！」於是好開心咁答佢：「係呀！」點知佢突然話：「哦，咁呢包薯片去到禮拜日咪過期囉。」

　　嗰刻我嘅心情，就好似食食吓壽司突然食到芥末咁，不過我仍然保持冷靜：「其實養到你咁大，就算你唔記得禮拜日係咩日子，我都唔會介意嘅。」阿仔聽完之後笑咗笑：「老竇，講笑啫！我梗係記得十七號係父親節啦！」我都笑住答佢：「我都係講笑咋！」