結婚5周年 連環放閃 「最佳人夫」陳豪送貴鞋 睇戲捧老婆場
2018/06/19 04:12:28
網誌分類:
娛樂
上星期，係娛圈模範夫婦「雙陳」陳豪(Mo)陳茵媺（Aimee）結婚5周年紀念嘅大日子，甜心老婆先喺網上向Honey示愛；「最佳人夫」就帶愛妻浪漫遊「直升機河」，閃到眼盲。慶祝一日又點夠呀！日前下午，呢pair恩愛夫妻撇下三名子女，拍拖外出連睇兩場戲享受二人世界。其中一套係Aimee有份演出嘅新片《某日某月》。滿分人夫仲買對過萬元閃石扣鞋冧妻，O氹到成身pink colour嘅粉紅人妻甜絲絲呢！
47歲嘅型爆人夫陳豪和37歲索爆老婆Aimee 13年6月11日喺巴黎完婚，三年抱三，兩子一女分別4歲半至兩歲，一家五口好幸福。月中，適逢「雙陳」木婚紀念日，阿Mo夫婦放下小朋友展開甜蜜之旅，Aimee喺個人網誌放咗條sweet爆短片，明顯由老公陳豪揸機，直擊坐直升機，疑似飛咗去澳門撐枱腳。
難得阿Mo未開劇有時間陪老婆，日前中午，陳氏夫婦先去太古城中心睇《某日某月》。見薄妝陳太穿上粉紅色裙配Hermes粉紅色garden party手袋，化身粉紅人妻，小鳥依人同man爆老公出街。捧完太太場，二人再拖手現身置地廣場。搞乜呢？原來前一日Aimee去咗名店Roger Vivier睇中一對白底閃石扣拖鞋，鞋上有車厘子圖案，好鬼cute，售價$11,900，由於未有貨，人妻訂鞋先，翌日拉埋老公去買，萬零蚊O氹老婆歡心，抵啦！
買完禮物，兩公婆又手拖手漫步行去ifc，見阿Mo喺戲院自助攞飛，睇多套5點半《侏羅紀世界：迷失國度》。其後，二人發現記者，阿Mo微笑打招呼；人妻就怕羞避鏡。記者問二人唔使湊小朋友，有空拍拖？阿Mo笑笑口說：「放假嘛！咪一齊去睇老婆套戲囉！」然後禮貌say bye入場，完場後就急急腳去攞車返家湊仔。
採訪 : 張詠森、李維隆
Man爆人夫 高大有型嘅陳豪一向好nice，當日喺ifc見到途人同佢say hi，人夫都會禮貌揮揮手。同記者笑晒口，亦係指定動作。
散場拖實 黑超阿Mo睇完《侏羅紀》，馬上拖實粉紅人妻。Aimee個樣好冧。
先撐老婆 當日一時許，兩公婆先喺太古城中心睇Aimee嘅新作《某日某月》。
粉紅人妻 近排好鍾意戴呢頂帽嘅Aimee，以粉紅色連身裙配Hermes粉紅色garden party手袋。
萬元小禮物 近年成日送Hermes畀愛妻嘅阿Mo，當日買過萬元鞋冧妻。
幸福一家 陳豪夫妻不時舉家出動，愛妻暫時話封肚「三個夠晒數」！
空中漫遊 上周中，「雙陳」慶祝結婚5周年，坐直升機去澳門展開甜蜜之旅。
買嘢畀小朋友 Aimee獨自出街當日，先去mothercare買咗袋嘢畀仔女，同記者禮貌打招呼。
睇定鞋 叫honey買 睇戲前一日，Aimee以同一頂帽、外套、手袋和波鞋現身中環置地廣場，試咗對$11,900嘅閃石扣拖鞋。
晒婚照示愛 Aimee喺社交網晒黑白婚照慶祝木婚，同老公示愛：「你是永遠我最喜歡的人！」
回應
(0)
我要發表
