3~5/7 置諸死地而後生

3~4/7收市~「五窮六絕七翻身」「置諸死地而後生」

估計本周港股會插穿前低位27990/10620屠牛然後才轉向上攻屠熊, 因為:

內地股市弱到冇朋友, AH差價效應下, A股跌就會拉住H股落山, 如上証破底港股都要跟

周二低見27990就彈，只喺略為跌穿28000我嫌插得唔夠深，加上呢幾日有好多人撈底及博反彈，27800~28000有全場最重倉牛，大鱷點會益散户, 要彈都要先屠牛

周二港股插水見27990後V彈, 收復一半失地, 入市撈底的股民大唱執到寶, 人人向上望, 周三繼續掃貨, 燈神經仔通梁蛇亦掃貨及唱好, 如果大市已見底, 點會派平貨益街坊, 梗係未見底啦! 點都要震完倉嚇到好友止蝕走鬼才會有彈高吃

周二低見27990做了一隻腳, 單腳企唔穩, 起碼要有兩隻腳, 即係要再插穿28000大關創新低, 然後才會急彈上去屠熊

過去三日大鱷力守騰訊$380, 代表唔想收28000樓下, 港股會潛幾深就睇騰訊$380做指標, 27800係下一個關鍵大位, 只要守得住, 就有望再上28300.28500.... 收市如能企穩28500, 下一站會係28800.29000....港股能走多遠就要睇A股及人民幣表現

以一般月波幅1800~2000點來推算，如果唔破底隊穿27990，就要上29800收復多條平均線，好高難度啵! 梗係破底兼屠牛最爽啦! 一舉兩得, 最佳劇本係先屠牛清場, 然後等A股回升推動港股再殺番上去, 要A升, H股才有力上

就算近日跌到28000老外及大媽經滬港通仍積極沽A股及港股, 繼續走鬼, 反映港股沽壓未除, 未見底

回顧去年11及12月低位在28130左右, 跟住升到今年1月尾爆上33484見頂回落, 如今就係返回11及12月的水平, 當時係由QQ領軍推動港股飛出外太空, 係虛火上升, 嘔番晒出來係應該,

去年2月北水湧港, 由大約23000炒到上8月尾見28000, 跟住幾個月係28000糾纏左好耐才上破30000, 近日重返28000見好淡角力, 所以唔少股民係呢個水平博反彈, 連基金經理都蠢蠢欲動趁低吸納, 當愈來愈多人係呢個水平掃貨, 當築底完成, 就會推動大市向上, 大鱷亦樂得做個順水推舟, 撩上去殺淡及派貨, 然後再隊番落山

~~~~~~~~~~~~~~~~~~~~~~~~~~~~~~~~~~~~~~~

部署屠牛及養熊

今晚美股獨立日假期休市，今日港股成交急降，喺大龍鳳先兆, 冇左美股制肘, 明日港股自由行, 周四係破底高危日, 希望插多一棍就死貓彈, 因為大鱷鍾意食飽就縮手, 再養牛熊, 然後擇肥而噬, 淡友要留意本周未升過, 小心又係好似周二一插即彈, 大鱷部署牛熊通殺, 周五又彈高

港股繼續尋底, 但大鱷冇咁順灘, 會係跌下彈下, 即市震到失暈, 唔俾股民捉到路, 大鱷係度玩緊估佢唔到, 周二急瀉製造恐慌引牛熊入局, 股民紛紛企錯邊, 結果牛熊不是死, 就是震走, 點都要輸

29/6大升457點上企28800, 人人向上望, 牛牛入局, 3/7復市變臉暴跌近千點殺牛, 午後拗腰收復約一半失地, 震走熊熊, 僅跌409點, V彈令人人向上望, 牛牛入局, 4/7平開後大插低收, 買上的牛牛重創

結論係個班合家慘大鱷特登將港股舞高弄低, 無啦啦大升大跌, 幅度驚人, 令人無所適從企錯邊, 走避不及, 一過夜就變天, 上午同下午係天堂與地獄, 玩死股民, 目的係好淡通殺

半年結過後, 中港兩地水緊情況紓緩, 加上呢兩日阿爺出口(出手)維穩股匯, 人民幣守住6.7急彈(市傳阿爺底線係6.9), 大鱷有藉口推高港股, 但估計大鱷會先隊港股落去屠肥牛, 清左場然後才會推升, 要置諸死地而後生, 只要熊熊下移就會拉番大市上去, 成份股除息會拖累期指大低水二百多點, 但隨著工行及中行明日除凈, 期指大低水情況會紓緩, 有利周五作出反彈

由於28000係技術上的大位, 近日唔少分析都叫28000入貨, 加上世界盃快將完結, 買盤亦會增加, 插落27800低位可能係一瞬即勢, 玩拗腰, 散戶好易企錯邊, 當熊熊下移養肥, 就係港股轉向之時, 即係插多一棍大市就會作出反彈, 但對熊市反彈不可太樂觀

~~~~~~~~~~~~~~~~~~~~~~~~~~~~~

向下尋底擴大月及年波幅

只要隊穿28000落27800再擴大月及年波幅, 淡友就會陸續食胡, 大市壓力就會紓緩, 就算未見今年大低，但已進入達標範圍, 只要淡友補空倉, 價值投資者趁低吸納, 大鱷低位收夠貨, 大市就會急彈, 因為無論大市抑或個股都嚴重超賣, 會有技術性反彈

恒指好少全周日日升或跌, 跌埋呢幾日周五(6/7)收升機會大增, 如肥熊下移大市就會有死貓彈, 大鱷係跟住牛熊倉位來操控港股，就算殺唔到都要震到牛熊止蝕

港股係消息市亦係政治市, 日前我曾預測7月上旬港股會創新低, 亦會係轉角的時間窗口, 近來港股走勢緊貼上証, 所以港股好被動, 會失驚無神跟住上証飛天遁地, 加上大媽一時掃貨一時走鬼, 亦會令港股波動性加劇

其實以大鱷操控大市的能力, 想守住大位毫無難度, 過去半個月大鱷特登縮手唔托市, 破位而下, 就係為了開肥牛大餐, 逼好友或基金大戶斬倉/止蝕來達到暴跌的效果, 當牛牛清左場, 大插誘因就會下降, 近日見淡友密密回補空倉, 7月冇左基金埋半年結的壓力, 加上企業回購, 都幫到大市, 首要條件係內地股市及人仔回穩

港股6月的大跌浪係俾人民幣推落山, 周三人民幣大升461點子, 阿爺呢幾日出手護盤, 擺明想守住人幣6.7水平, 人民幣止跌拗腰利好, 但大鱷點都要食埋28000樓下肥牛才會容許大市反彈, 能否守得住28000就要睇QQ能否保住$380

恒指已應驗了「五窮、六絕」的宿命, 港股能否「七翻身」呢？如果跟慣性走勢7月收升的話, 就會係7月上旬創即月新低, 如果7月打破慣性走勢收跌, 就會在7月下旬續創新低, 我傾向睇7月首周大插創新低後拗腰向上, 即係下周會係轉向的時間窗口

轉貼信報財經：統計自1980年至今(共38年)的按月數據，恒指7月份的表現相當不俗，按月平均升幅達2.8%，為一年12個月中第二佳；恒指7月份上升比例亦接近七成，38年內有26年錄得按月升幅

史哥 分析7月波幅區 :

(27108)-27527-(27947)-28379-(28812)-29244-(29677)-30122-（30567）-

港股連跌三天.低開急挫屠牛後V彈收窄跌幅呈陽燭.反彈在望

5/7 周四恒指收報28182, 跌59點(最多下跌411點, 一度上升79點)

國指收報10608, 跌104點(最多下跌262點), 國指大幅跑輸恒指

預期的破底大插果然出現, 港股做了第二隻腳創新低27830又玩拗腰, 收28182, 僅跌59點, 大鱷秒殺1577張肥牛趙完鬆, 牛牛真係死唔眼閉, 港股反彈在望喇! 我上周曾說過港股轉角市快將出現, 因28000大位買盤會增加, 今日插穿前底27990創新低27830亦見補空倉買盤, 係利好訊號, 代表港股隨時會止跌回升向上走

恒指由1月大頂33484插到今日低位27830, 由高位回吐5653點, 已是本周第二次插穿28000, 守住27800關鍵大位, 連續2日都係先插後拗腰, 收28000邊, 跌勢有喘定味道, 多隻指標股已止跌回升, 冇再創新低, 具啟示作用

本周已跌3日, 按照慣性走勢明日反彈機會大, 只要未來三日冇再創新低, 大市見短底就有望上攻屠熊, 向28300.28500.28800.29000....進發, 尋找7月頂部, 較大阻力在29300~29500, 係20及250天線所在, 以大鱷操控港股的能力, 觸底反彈閒閒地有千多點升幅