9~12/7 見頂回落尋底格

港股連升兩天.高開高走呈陽燭.一升到尾大舉屠熊.貼價熊命危

9/7 周一恒指收報28688, 大升372點(最多上升506點), 重上10天線

國指收報10768, 升145點(最多上升245點), 國指小幅跑贏恒指

尾市港股升幅收窄, 睇股份表現仍會再上沖屠熊, 下一站挑戰29000, 阿爺救市, A股急升成為港股的後盾, 成也A股.敗也A股, 回顧29/6上証爆升60點翌日就反艇, 預示明日內地股市將會受壓, 亦會拖累港股, 加上今次技術性反彈目標在29000, 以及反彈跌幅的0.382倍黃金比率29240, 估計阻力會好大, 因為獲利盤會出籠, 打開逃生門必定會惹來沽壓

大媽今日掃貨係港股的升市功臣, 港股能走多遠就要睇大媽會否趁反彈又走貨, 另外亦要留意貿易戰新消息, 大市隨時會轉向下走, 燈神經仔通梁蛇看好入貨買上係利淡訊號,

3/7開局由28955插近千點低見27990, 暴跌根本係為了屠牛殺好友及逼人止蝕斬倉, 點跌落黎就點上番去, 一定會收復失地，今次彈上去目的亦喺為了開餐，熊熊命危, 如大市見頂回落, 就要插穿前底27830來擴大月波幅

上周果然係轉向的時間窗口, 按照劇本今個星期埋單會收升, 收高過28315, 不過如升抵29000即係由低位反彈近1200點, 估計獲利沽壓會出籠

中港股市通常係同步見底頂, 港股反彈何時見頂就要睇上証及QQ表現, 如上証或QQ彈完, 亦會拉住港股落山,

貿易戰對中港股市已做成了根本性的傷害, 今次只係超賣反彈, 並非重拾升軌, 牛牛正不斷大幅上移, 當大鱷食飽肥熊就會落山屠牛, 大鱷玩緊好淡通殺, 不會單邊向上, 港股跌下彈下, 正在不斷蠶食股民的血汗錢, 熊市大趨勢向下走, 當反彈完就要繼續尋底

港股反彈見頂回落呈陰燭.秒殺肥熊.恒指先高後低.單日轉向.部署下殺屠牛

10/7 周二恒指收報28682, 跌6點~收市U盤, 一度上升293點, 結束兩連升

國指收報10825, 升56點(最多上升152點), 連升3天, 國指大幅跑贏恒指

好淡通殺.熊死牛命危

今早伸多一腳上去, 恒指已由低位27830反彈1151點, 創即月新高, 呢浸升夠皮喇! 升到去28982肥熊已陣亡, 過去三日大鱷合共吃了2239張肥熊, 大鱷鍾意失驚無神變臉來殺牛熊, 又要轉口味喇! BB牛大幅上移, 28000~28700有約1800張肥牛, 有下殺誘因, 留意關鍵位28315

今日港股表現超樣衰, 唔少股份都沖高回落, 走勢差劣, 有見頂走鬼味, 只要明日大跌就可確認死貓已彈完, 如QQ失守$385, 恒指就會跌穿28500, 貿易戰壞消息頻傳, 內地股市弱勢未除, 恒指想企穩10天線殊不容易, 國指連升3日夾埋才升了約200點, 亦未上10天線, 大幅跑輸恒指, 中資股俾貿易戰打死左, 暴跌市已令股民成為驚弓之鳥, 見反彈就走貨, 令大市一彈即散, 港股慣性走勢係試完底會再沖頂, 見頂回落就會再尋底

美元及息口趨勢向上, 內地股市疲弱, 港股入熊反覆向下, 彈散居多, 博反彈要快閃, 因為高位往往係一瞬即逝

11/7 周三恒指收報28311, 跌370點, 乾跌屠牛趙完鬆, 牛死熊命危

殺牛震牛.熊多牛少利上攻: 熊7391 VS 牛4942

今早大幅低開668點見28013殺牛1794張即彈, 因為28000樓下只得瘦牛, 大鱷唔想食, 大鱷會等到有重倉牛聚集在關鍵大位才捨得插穿, 今早大插跌得好假, 成交縮乾跌, 根本就係為了屠牛而夾硬隊落山, 所以低位一瞬即逝, 彈番上去修正跌幅,

港股慣性走勢係試完底會再沖頂, 明日如繼續回補下跌裂口就要向28682進發, 如果今日係假跌, 明日就會係升市, 如果今日係真弱, 明日就會續跌, 我傾向睇反彈

按照慣性走勢, 每周恒指通常升2~3天, 而家只係升左1天, 今日的下跌裂口往後多數會回補, 即係明日高位會在28365樓上, 後市仍有望重上28500及10天線, 大鱷玩緊28500穿梭, 唔想太快破底, 亦想再挑戰29000,

只要內地股市生生性性重上2800, 就可穩住港股, 恒指關鍵位在28315, 早前說過上周見短底大市就會轉向, 本周會收升, 挑戰29000甚至29300來擴大月波幅, 第一次挑戰29000打回頭, 但7月仍有3個星期, 未絕望咖! 只要後日(周五)收於28315之上, 本周就收升, 結束4周跌勢, 代表好友正在反擊

大鱷玩緊估佢唔到, 唔想走單邊俾股民捉到路, 周一急升後今日插水, 剛好嘔晒周一的升幅, 大鱷頻頻變臉, 過夜就變天, 今日大跌明日亦可急彈, 好淡通殺, 今日淡友冇趁大插食胡就會一場歡喜一場空, 淡友最怕阿爺護盤, 而美元急升.人民幣弱雞就係淡友的後盾

特朗普政府宣佈對華2000億美元商品徵收10%關稅的清單, 清單公布後有兩個月的公開意見徵求期

內地股市急升.港股低開高走.單日轉向呈陽燭.繼續回補下跌裂口先上攻28682

12/7 周四恒指收報28480, 升169點

好淡通殺.牛死熊命危.熊多牛少利上攻: 熊8216 VS 牛5468

內地投資者半年結之後開始重新建倉, 北水突然湧港, 港股通淨流入創近5個月單日淨流入新高(要留意是否撩高走貨抑或繼續掃貨, 是港股升跌關鍵), 大媽大手掃貨, 企業密密回購, 世界盃尾聲, 阿爺出手又出口護盤, 美股打不死, 又炒業績, 推動今日港股作出反彈, 以大鱷的習性, 7月下旬會再挑戰29000, 燈神梁蛇早前見港股暴跌走鬼, 6月尾將中線持倉減到只得約6%, 近日趁低補貨, 加倉至約持有三成, 本來計畫今日再入貨, 但見大市沖高回落就縮手冇加倉

今日高見28614, 昨日的下跌裂口仲未補晒, 會殺上28682裂口頂, 如全數回補裂口後乏力再進, 就會繼續係28500玩穿梭, 殺貼價牛熊, 貿易戰消息沒完沒了, 美元強.人民幣弱, 商品價格下跌, 都不利港股, 大市只係炒反彈, 彈完就會再落山尋底

上証今日急升, 但上証每逢大升翌日例牌捱沽, 要慎防港股俾內地股市拖累, 雖然現時牛熊分布係熊多牛少, 但形勢日日變, 如牛牛上移亦會拉番大市落山, 就好似周三突然插水668點就係為了屠牛, 大鱷似乎想係28000~29000炒波幅, 好淡通殺, 貼價牛熊命危

早前曾說上周係轉向的時間窗口, 結果上周四(5/7)創新低27830後一直都守得住, 符合見底及本周轉勢收升的預測, 大鱷力守區間底部, 唔想破底, 試完底就會再沖頂, 沖頂打回頭就要再尋底

今日港股急彈上去28600回補昨日的下跌裂口, 進一步確認昨日係假跌, 目的係震倉及殺牛, 以及引熊下移, 逼人止蝕/斬倉, 牛牛清左場今日就止跌回升, 現時29000有超過1500張肥熊, 大鱷流晒口水, 愈遲上攻, 熊熊就愈肥, 牛牛亦會上移, 大鱷就可好淡通殺, 就算殺唔到, 大鱷都要嚇到佢地止蝕

昨日肥牛死後，牛熊分佈係熊多牛少, 利上攻, 昨日殺牛震牛今日就反彈， 呢班合家慘大鱷真係陰毒, 中港股市通常係同步見底頂, 上証冇再創新低, 今日急升59點重上2800, 有助推動港股向上, 港股雖然仍處弱勢當中, 但技術指標已略為改善, 港股近日走勢跟足上証, 明日港股表現睇阿爺, 如阿爺又反艇或失守2800, 港股就會彈散

感覺上而家大市在28000~29000就好似以前係30000~31000, 一路跌下彈下係度磨, 臨危托沽, 耐不耐就假突破爆邊, 嚇到雞飛狗走, 好友淡友牛熊都要死, 但爆邊往往係企唔穩又縮番入主區間內, 玩死股民, 呢種格局炒指數牛熊好難搵食, 不炒也罷, 就算炒正股都要快閃, 因為底頂下移, 沽壓大, 高位往往係一瞬即逝

小米將於明天收市後正式獲納入富時環球股票指數系列及富時中國50指數組合, 小米底頂上移續尋頂, 招股價上限係$22, 估計會見阻力