商界講呢啲
商界講呢啲
商界講呢啲

今年國際發明展總冠軍 可控近視兒童鏡片 率先登陸香港

2018/07/11 04:13:03 網誌分類: 生活
11 Jul
          呢款由Hoya Vision Care同香港理工大學合作研發嘅兒童近視控制鏡片MyoSmart,喺早前瑞士日內瓦舉行第四十六屆國際發明展中,攞咗全場總冠軍、特別大獎同埋評判特別嘉許金獎三個大獎,夠晒威水,小妹聽到呢個消息都與有榮焉,而家仲話香港可以喺聽日率先買到,真係想即刻見到!

          Hoya同理大自二○一二年起合作研發,設計兒童近視控制鏡片MyoSmart,仲喺臨床實驗裏面,可有效減慢兒童近視加深速度達百分之五十九,當中更有二十一點五巴仙兒童完全停止加深,尤其八至十三歲嘅小朋友,效果顯著;而家Hoya仲將香港同中國內地列為兩大首發!

        劃時代產品 150間眼鏡分銷商率先推出

          小妹昨日都有到發布會,聽Hoya專家講,佢哋係成功設計應用近視離焦理嘅近視控制鏡片,鏡片設有用作矯正視力,包括近視同散光嘅「中心光學區」,並且圍繞呢個區伸延至鏡片周邊加入小區域離焦度數,令眼內形成「近視離焦」,喺視網膜上投射清晰影像嘅同時額外喺視網膜前方投射,令到小朋友嘅眼軸生長會趨向變短,咁就有效抑制配戴者嘅近視加深情況。

          聽唔明?唔緊要,註冊視光師鄧子誠同小妹解釋,呢款非入侵性設計嘅鏡片,畀小朋友配戴係較為安全。不過為達安全及最佳效果,Hoya挑選嘅分銷商都需完成理論同產品培訓之後先至可以賣,之後Hoya仲有回訪指引,視光師須為配戴MyoSmart嘅小朋友每半年跟進一次鏡片使用嘅情況,目前香港只有150間眼鏡分銷商出售MyoSmart,係咪嚴謹呢!

        Cally
▲(左起)註冊視光師鄧子誠、豪雅光學(Hoya Vision Care)技術研發部專家祁華博士、豪雅鏡片有限公司(Hoya Lens HK Limited)董事總經理關國強、香港理工大學眼科視光學院主任杜嗣河教授,對於能夠獲國際性獎項感到開心。
 ▲(左起)註冊視光師鄧子誠、豪雅光學(Hoya Vision Care)技術研發部專家祁華博士、豪雅鏡片有限公司(Hoya Lens HK Limited)董事總經理關國強、香港理工大學眼科視光學院主任杜嗣河教授,對於能夠獲國際性獎項感到開心。 
回應 (0)
我要發表
user