保良140周年 總動員搞大巡禮 蔡李惠莉全情投入 做好青年發展
2018/07/16 04:12:31 網誌分類: 生活
保良局除了既有的賣旗日、到屋邨屋苑賣慈善獎券籌款外，還有大型慈善騷「星光熠熠耀保良」和年底舉行的慈善餐舞會等。今年適逢保良局一百四十周年，10月更會在維園舉行大型的服務巡禮，蔡主席稱：「到時會展示番保良局嘅服務，我哋有三百幾個服務單位，包括學校、安老同醫療方面，全部都會出動，有攤位、有活動同有表演，會好熱鬧O架！」
着重教育
蔡主席一直從事幼兒教育工作，自己亦有開辦幼稚園，回想當日點解會加入保良局做總理，她憶述說：「因為我參觀過保良局嘅幼稚園，仲有兒童之家，以前係啲無依無靠讀孤兒院嘅小朋友，會嚟咗我哋呢度。我記得入到去見到啲BB，有啲得幾歲，有啲讀小學，佢哋因為無父母照顧，由保良局負責照顧，供書教學同照顧佢哋日常嘅起居飲食，我好感動，戥啲小朋友開心。」
青年發展
在青年發展方面，蔡主席也很着重，她表示：「我哋喺元朗將會有一個全港最大規模嘅青年宿舍『保良局李兆基青年綠洲』，提供1,680個宿位，到時會用平租租畀年輕人；亦會鼓勵佢哋創業，以低於巿值租金提供工作空間『保良局C3青年共享空間』。」還有每年都會舉辦的北京交流團，蔡主席續說：「我哋會帶二千幾個學生去交流，順道睇吓當地嘅名勝，啲學生去完返嚟好開心，所以我哋會繼續推行。」
家人支持
保良局現時擁有百多間學校，包括幼兒園、幼稚園、小學和中學，最近亦開設了國際文憑課程小學，蔡主席說：「如果有第二個地方嚟嘅小朋友，我希望保良局都可以照顧到佢哋，呢間學校會有好好嘅師資，仲係國際化嘅。」蔡太表示自從升任主席後，真的比以前忙了很多，幸好孫仔孫女在她創辦的幼稚園讀書，所以仍能時常見面，加上每星期都有一日family day，暑假還會一家人去旅行，是給她最好的支持。
主持：黃柏高 統籌：林永匡
協力：李佩儀 攝影：袁東亮、謝民光 場地：颱風點心
黃柏高
■蔡主席加入保良局十年，她認為擔任主席是個挑戰，並相信經歷會令她畢生難忘。
■蔡主席今年其中一個大計是廣集資源，審慎理財，籌集更多的善款。
■保良局幼稚園暨幼兒園聯校藝術暨創新科技作品博覽，蔡主席大讚有創意。
■蔡主席與總理鄧萱宏雁（右一）上門探訪長者。
回應 (0)
我要發表
