新醫企落筆打三更
2018/07/23 04:13:00 網誌分類: 經濟
美國總統特朗普對中國貿易立場進一步強硬，美股表現反覆，三大指數中段一度全面轉升，但其後因特朗普批評聯儲局加息速度，美股收市全線輕微下跌。道指收報25058點，跌6點，納指收報7820點，跌5點；標指收報2801點，跌2點。全星期計，道指、標指、納指分別升0.15%、0.02%和0.07%。特朗普連續第二日向聯儲局開炮，在Twitter發帖文批評加息和美元上漲削弱美國競爭力，又指責中歐等貿易夥伴操縱貨幣及壓低利率，仲話準備向逾5000億美元的所有中國進口貨品徵關稅，令市場憂慮貿易糾紛進一步擴大，美元應聲下滑，重挫超過0.7%，創3月以來最大單日跌幅。
油市連跌三周，沙特削減8月份石油出口的表態在一定程度上幫助降低市場供應過剩的擔憂情緒。原油期貨到期交收日收市升1美元，升幅1.44%，報每桶70.46美元，創一周收盤新高，但本周仍然累積錄得下跌。
港股上周就跟住內地股市同人仔波動，恒指上周五曾創逾9個月新低，見27745點。隨著內地股市高收及人仔反彈，大市收市倒升213點，恒指收市28000點關失而復得，報28224點。一周計，恒指仍累跌超過300點，國指則累跌63點。港股收市後陸續有唔少消息，包括特朗普繼續話要加強對中國貨徵稅，內地又宣佈放寬銀行理財業務，夜期表現偏穩。呢排消息滿天飛，相信投資者慢慢會對短期市況減低關注，轉向中長線去評估策略。
繼小米之後，另一隻因為港交所改例得以上市的新股歌禮製藥（1672）招股。除了市場對改制新股反應一般外，近日內地電影《我不是藥神》大賣，對呢隻新股的公眾認購都有啲影響。
最貴入場費藥股遇冷風
歌禮是本港首家無收入生物科技企業，無先例可鑑。今次安排佢招股價介乎每股12元至16元，每手1000股，一手入場費16161.23元。這個安排據說正係因為公司性質獨特，風險唔係一般人理解，所以唔想有太多散戶入場。但係招股前就傳出公司可能變陣，考慮每手股數有可能減少，但消息後來就俾投行代表否認。市場傳出呢個消息，自然令人關注包銷商係咪驚會步小米後塵，招股遇冷風。
歌禮專注研發乙型肝炎病毒（HBV）、丙型肝炎病毒（HCV）及人類免疫力缺乏症病毒（HIV，俗稱愛滋病）的創新藥物及商業化生產。公司首隻針對丙型肝炎藥物《戈諾衛》已於今年6月份上市，另一隻同樣針對丙肝病毒的拉維達韋已完成第三期臨牀試驗，計劃今年第三季提交新藥申請。公司行政總裁吳勁梓話，「戈諾衛」是國內第四隻針對丙肝病毒的藥物，其餘三隻同類功能的藥物均是美國進口。歌禮的研發獲國家十三五的「重大新藥創製」專項支持，而公司在藥物價格上，會給予國內患者一定優惠。
撞正《我不是藥神》
醫藥股本身係高風險的投資，特別係在內地暫時未有具備國際競爭力的大藥廠，不少藥股都係專注一、兩種疾病的針藥，在產品研發上無外國巨企咁穩定，所以內地醫藥股享有高估值，主要係市場龐大，但企業的穩定性不足。好似歌禮呢啲未有盈利公司，當然前景仲唔穩定。歌禮主要做的病症，都係內地有相當市場需求的類別，部份能夠成功推出臨牀試驗，唔可以話無商業價值，但就屬於概念股一類，風險相當高。呢次佢共發行約2.24億股，10%在本港公開發售，以目前招股範圍計算，歌禮的估值有機會達23.2億美元（約182億港元）。
另一個影響佢估值的突發因素，係《我不是藥神》在社會引起廣泛迴響。電影講一個不幸染上頑疾的推銷員，因為負擔唔起正價藥，唯有食印度的翻版藥，之後仲幫其他病人買藥，結果惹來官非。電影上演後觸發社會討論貴藥令病人負擔唔起的普遍現象，仲引起咗領導人關注，要求藥廠加快調低價格。呢種輿情對從事新藥研發的公司就有啲不利。
上周五歌禮開始招股，初步反應孖展似乎比小米為佳，由於藥股相對當炒，加上有小米敲冷門有錢賺的經驗，股民對是否入飛有啲心大心細。綜合咗唔同因素，估計歌禮上市唔會太熱，所以投資者唔適宜用孖展申請，由於公司有一定概念，若然想燒冷灶，咁最好就係想買幾多就申幾多。
復星有印度藥廠概念
如果講電影效應，有可能受益的或者是隻復星醫藥（2196），有報道公司會將印度藥廠Gland Pharma上市，集資5億美元（約39億港元），正在當地與顧問進行初步磋商。復星醫藥去年以11億美元（約85.8億港元），收購Gland約74%的股權。印度翻版藥或專利屆滿藥品係一個重要市場，內地雖然對藥品產權保護都好嚴，但係電影裏面，印度藥就變成又平又靚的代名詞，唔知會唔會吸引咗人走去炒隻復星。
李兆峰唔怕槍擊 移民美國
曾經喺股市好活躍，最後搞到賣盤收場的兆峰陶瓷創辦人李兆峰，最近在財經報章露面，力推他在美國搞的投資移民計劃。
李兆峰呢次返香港搵世界，約咗一班投資人見面，好似樓市投資者兼作家湯文亮、基金經理譚新強喺五星級酒店食飯。佢話o依家移民咗美國休斯頓，仲話當地想搵多個香港人都無，但就好啱創業做生意。佢又話，休斯頓充滿美國風情，即係人人都帶槍，正因為係咁，所以人人都唔會行差踏錯，所以習慣咗仲會特別覺得安全。
兆峰陶瓷係好多股民早一、二十年前沉醉過的炒股，但同時亦令好多人輸身家。當年李兆峰喺股壇活躍外，仲買咗深水灣大屋，當時造價破咗香港紀錄。後來佢財困將呢間大屋以喊欄價賣咗畀嘉道理家族，新屋拆卸再起成五間屋仔。單係呢件嘢而家都可以值十幾廿億元。當年如果撐得住唔賣，淨係一個物業都已經有排歎，仲使乜搞投資移民生意，所以好多人都話，喺香港做乜生意都係假，總之有咗第一桶金，跟住就係買地產，單靠一招已經打遍天下無敵手。
陸羽仁
回應 (0)
我要發表