瞓醒未呀？

醫療咧咁𠾍

病人又賴嘢

賞罰欠分明

圍威好過借

呢嗱、罪惡城在兩個月之內連續發生兩宗嚴重醫療事故。早前聚兵門醫院一名年長男病人在沐浴期間被人以硬物插入肛門並弄穿大腸、並於數日後身亡。前兩日女皇醫院嘅醫療團隊、誤把陰道作肛門、將應該透過肛門注射入大腸嘅顯影劑錯誤地注射在陰道內、以致一名年長女病人無辜被切去輸卵管以補其命。嗱、前一單事件已經弔詭得令人百思不得其解、而後者則更加係形同集體被鬼揞眼般的驚人聽聞。喂喂、沖涼至喎、點解要用硬物插入病人肝門架？仲有呀、造顯影檢查既有放射治療師、有醫生、亦有醫護助理在場、點解無人發現插錯窿架？究竟班友仔瞓醒未架？

話口來完、剛剛又輪到講話醫院爆出產婦妢免後會陰爆裂冇縫針、而導致當事人挨痛楚夾流濃之後才補鑊嘅畸屎。又好似幾個月前咁、一名特約大夫在造手術期間接到電話後便火速返回自己個架部替病人造手術、留下已經被劏開刀嘅病人和一群醫療人員在手術室空等幾粒鐘。事後院方發言人居然九唔搭八話、該名忽閃大夫離開並無造成大問題、仲盛讚其醫術非常高明。嗱、院方唔開聲由自可、一開聲就惹得全城鬧爆、簡直係火上添油。如是者被狂轟幾日之後、醫館局忽然放話、當忽閃大夫與院方合約期滿之後、將不會再續約喎！綜觀醫館局對放每宗出錯個案嘅態度看來、全程擺出一副犯錯無須負責嘅格局。試問咁仲憑乜嘢去驅使醫護人員打醒十二分精神來到服務大眾呢、吓？！甚麼法制建存、甚麼紀律嚴明等等、終歸都係要靠人來到實行、而非口噏當秘笈架！當下問而不責、究竟是誰之過呢、吓？！