居屋價瘋狂

升升又升升

食完兼夾拎

睇見眼矎矎

聽落冷冰冰

早前、公家提出一藍子（未來）降低居屋售價計劃、宣傳工夫亦做到足。之但係、當下居屋價卻突破萬元一呎大關。咁即係話、公家給予嘅係遠水、當前燒着嘅係近火。呢鋪算唔算係大隻講呢？講真、大多數街坊都渴望盡速改善眼前居住環境、根本上唔想聽廢話。由本城大歸開始、每屆阿頭 “啱僧除外” 都顯示極關心基層街坊住屋問題、既有老古董提出嘅八萬五、亦有阿狼所講嘅重中重、但廿年已過還是口惠而實不至。試問怎能叫街坊去相信公家？問心嗰句、在今時今日人均收入算來、有能力出資千多萬去買一層樓嘅人、根本上冇須要公家津則。但是居屋呎價也賣到萬多元、而最近有報導指出乜山花園（居屋）呎價接近一萬九千元、簡直係人都癲啦！係嘛？難怪咁多人話、家陣嘅居屋政策係為着要晾起物業價格而設架啦！

坦白講、雖然阿頭話點樣點樣去調低居屋售價、又點樣點樣去延長出售居屋嘅年期、但這一切亦只能夠當古仔咁聽住先。眾所周知、居屋針對嘅買家本來係那些無資格申請公屋、亦無足夠銀兩去購買私家屋嘅夾心人、所以居屋絕對唔應該被放入自由物業主場買賣、即使要賣亦應該賣番畀公家、然後再由公家轉售給有須要人士。無奈公家似乎關心地產市場興旺、多於關心基層街坊利益。否則、又點會話地產市場一年比一年蓬勃、而基層街坊嘅眉頭就一年鎖得緊過一年？咪話我靠嚇、以目前形勢嚟睇、唔止會有樓宅泡沫爆破、亦會有死人冧樓嘅可能。家陣社會上有唔少學者和輿論界中人都看得出劏房嘅潛在危機係幾咁嚴重、但公家在這方面卻毫無作為、到底又應該作何解識呢？係唔係要親眼見到爆出個大頭佛出來才去鋪鑊呢？今日嘅街坊對於阿頭那套「口講無敵、做則無力」嘅爛騷早已生厭。因此、公家還是腳踏實地多做實事、少發噏風為妙！