2~7/8 插水屠牛後拗腰連升

港股破位而下.洗倉式急瀉創新低.低開低走.一跌到尾呈大陰燭.大舉屠牛

2/8 周四恒指收報27714, 大跌626點(最多下跌762點),

國指收報10733, 大跌239點(最多下跌337點), 失守10及20天線, 國指跑贏恒指

大插創新低.屠牛趙完鬆.醞釀反彈

港股危機未除: 2018年水星逆行利淡: 26/7 ~ 19/8

今個月恒指一般周波幅係800~1000點, 而今個星期恒指周波幅高達1261點, 已超標, 夠晒水位俾大鱷轉身, 唔該留番多些水位俾下周, 27800及28000係關鍵大位, 不會一去冇回頭, 點都會有吻別, 下周二轉節氣立秋(立抽=立即抽升), 預示本周收跌屠牛後, 下周有望彈上28000

按照慣性走勢, 港股好少全周單邊日日升或日日跌, 今個星期已經跌左4日喇! 如明日續跌就打破了慣性走勢, 希望彈下啦! 而家就寄望阿爺生生性性, 幫手穩住港股

近日多隻強股例如友邦.恒生.QQ都倒下, 希望大鱷洗埋強股乾乾凈凈清左倉就收下手啦! 因為連強股都插就係洗倉洗到水尾, 反彈在望

內地股市俾特朗普打殘, 資金轉投國債, 上証連跌兩天, 收2768(低見2726), 內銀內險資源商品A股全面大跌, 拖累相關H股, 港股大成交急瀉, 恒指創10個月新低, 不過奇怪的是, 國指冇創新低, 收市U盤跌幅進一步收窄, 拋離20天線不遠, 有冇吻別呢?

其實外圍股市表現唔算差, 連弱雞的納指亦止跌回升, 彈左兩日, 港股單日暴跌762點實在過份, 似係借貿易戰及A股下挫借勢殺好友牛牛, 逼人止蝕/斬倉來做成暴跌的目的, 亦有可能因為聯儲局議息後資金流有變, 美元走強上沖95水平, 歐元英鎊人民幣下跌, 港元亦進一步走弱, 人民幣資產遭離棄, 走資拖累港股暴跌

今日低見27578, 接近關鍵大位27500, 內地股市連插兩日, 淡友亦要慎防阿爺護盤, 今日大鱷殺左3849張相對期指對沖張數牛證, 日前曾說大鱷每次插穿28000都要殺起碼3000張肥牛, 今日真係食到飽才肯停

恒指月波幅未達標, 慣性走勢全周高低位亦不會再2日內見齊, 即係往後一定會爆邊, 高低位27578~28772, 往後一係兩邊都爆來擴大月波幅, 亦可以爆單邊, 升穿28772或跌穿27578, 今日拗腰彈上27700樓上收, 本來27000~27500只得不足2000張牛牛, 今日扮守得住磨多半日, 就引左約2400張BB牛入局, 即係合共有超過四千張牛牛

成也大媽.敗也大媽, 內地股市有災味, 大媽繼續班資返回祖國救亡, 港股通(滬深)齊齊出現資金凈流出, 大媽大舉沽出QQ, 去年北水湧港係23000水平, 所以大媽於現水平走貨仍有利可圖, QQ當時係$200, 今日收$345

大媽大舉沽出港股, 最大鑊係狂沽權重的QQ, 大媽繼續走鬼, 拖累恒指創10個月新低, 好友燈神經仔通梁蛇見今日跌就轉口風唱淡, 仲話反彈都過唔到27745, 我就話以周波幅計, 往後點都會再上27800, 加上唔少股份都超賣, 技術上都不會只跌不升, 希望燈神看淡, 發揮相反指標的威力啦!

肥牛陣亡已清場.反彈在望:

~ 今個星期恒指周波幅高達1261點, 已超標, 多過一般的800~1000點周波幅, 夠晒水位俾大鱷轉身

~ 跌穿大位例牌後抽玩吻別, 27800/28000不會一去冇回頭

~ 下周二立秋(立抽=立即抽升), 轉節氣代表股市大變, 前後一日大市會有異動

~ 按照慣性走勢, 連升後會插水, 連跌後會彈高, 本周連跌, 預示下周會有反彈

~ 內地股市破位而下, 阿爺不會坐視不理, 一向都會耐不耐出招救市, 中港股市通常係同步見底頂, 只要上証止跌回升, 好友就會借勢反擊, 大鱷就可好淡通殺,

~ 近日連友邦.恒生.QQ等強股都倒下, 通常連強股都插就係洗倉洗到水尾, 代表大市會作出技術性反彈

~ 今日港股暴跌, 恒指創10個月新低, 但國指冇創新低, 國指表現具啟示作用, 只要國指不死, 就會撐住恒指

~ 一般來說, 當屠牛殺好倉任務完成, 大鱷就會趙完鬆, 彈上去屠熊, 以及再養過新一批牛熊, 再擇肥而噬

~ 恒指到目前為止高低位27578~28772, 往後一定會爆邊, 一係兩邊都爆來擴大月波幅, 亦可以爆單邊, 升穿28772或跌穿27578

~ 港股去年的大牛市在今年1月見頂33484後步入熊市, 量度跌幅可見27676水平(今日低位27578), 今日已達標, 跌至現水平理應有短炒淡友食胡, 因為若以黃金比率去計算, 調整0.382目標為27676, 調整0.5目標為25881

~ 市場已在28000找到平衡點, 大鱷食飽牛牛就會推番大市上28000~29000主波動區

~ 8月份有多隻大藍籌除息, 期指會呈低水, 如期指低水幅度細, 又或者呈高水, 淡友就要小心

~ 下周一(6/8)匯控.恒生.中移.港交所.銀娛.國泰等多隻大藍籌公布業績,

3/8 周五恒指收報27676, 跌38點, 阿爺救市及時雨.向27800.28000進發

今日港股指數雖然跌幅不大, 但其實有暗湧, 唔少股份都係洗倉式下挫, 整體下跌股份非常高(16%升.32%跌), 反映一彈就會惹來沽壓, 熊市沽壓不容忽視, 大媽今日雖然掃貨, 但亦趁彈上去收窄跌幅臨收市丟貨獲利, 大媽繼續走貨唔係好現象, 權重QQ沽壓未除, 亦會令港股容易彈散

7月恒指開局連跌3天後就作出反彈, 8月開波又係連跌3日, 加上今日港股冇跌穿昨日低位反映跌勢已暫時喘定, 如果跟7月的走勢, 下周一就會作出反彈, 超賣+淡友回補空倉+阿爺再救市都有助推動大市向上, 港股能走多遠就要睇上証, 因為要A股升, H股才有力上, 否則只會彈散, 而且熊遠在28700樓上, 吸引力弱, 27500樓下肥牛亦會拉住港股後腿

本來燈神經仔通梁蛇估今日港股會有反彈, 不過話就算反彈都上唔到27746, 後來見彈唔起就大大聲唱淡, 口吻喺非常淡，叫粉絲炒認沽証及熊, 連呢位好友都死心，即係港股即將會有死貓彈, 因為早前梁蛇買上追貨後港股就插水, 相反指標係下周會彈上去27800.28000, 大鱷推上去既可挾淡及派貨

熊市底頂下移, 但今日冇再創新低, 展開反彈浪, 不過以往阿爺出招救市, 偉哥效力都不長久, 貿易戰殺傷力驚人, 人民幣貶值已成大趨勢, 利淡後市, 本周展開業績期, 下周匯控.恒生.港交所.國泰.銀娛等多隻大藍籌陸續公佈業績, 亦會令大市波動性加劇

~~~~~~~~~~~~~~~~~~~~~~~~~~~~~

TC.史哥.元帥.雞煲及其他網友呢兩日都走熊/減熊/出絕招/博反彈, 因為大家都覺得昨日一棍創新低落到27500關鍵支持位附近, 做淡都應食胡,

今日港股理應反彈, 但點解大鱷今日壓住大市點穴唔俾彈亦唔俾插呢? 又等我用陰謀論來估下賤大鱷搞乜, 點穴的結果:

今日沽空急增至13.73%(中伏), 熊熊下移(中伏), 牛牛大舉食胡(走寶), 牛及好友見彈散唔敢入市博反彈(走寶), 見彈唔起股民買熊博下周再插(中伏)

今日港股雖然彈散, 不過亦冇跟上証插水, 極為反常已露玄機，大鱷將港股點穴奸計得逞, 淡友加倉, 好友縮手, 正正係大鱷想得到的結果

港股結束五連跌.惟沖高回落收窄升幅呈陰燭.28000得而復失.繼續尋頂

6/8 周一恒指收報27819, 升143點(最多上升398點),

國指收報10702, 升8點(最多上升158點, 一度下跌31點), 國指大幅跑輸恒指

在岸人民幣早市沖高回落, 同中港股市走勢一樣, 港股沽空比率大幅增加至14.86%, 為逾兩個月最多, 港股雖然收升, 但洗倉走鬼持續, 整體下跌股份比例非常高, 資金換馬, 轉投強勢優質股, 唔少二三線及細價股都跌到阿媽都唔認得, 但大鱷仍一直咬住27800唔放, 熊熊下移, 牛在27577 vs 熊在28611, 上攻唔使破底都有得開餐, 大鱷要屠熊就要上山

港股雖然彈散, 收窄升幅, 但冇跟上証收跌, 亦冇跟上証創新低, VHSI恒指恐慌指數大跌, 唔驚啵! 都係利好訊號, 因為如果係真死, 就會係倒跌收場, 反映好友正在部署上攻, 重返28000水平, 上周五港股彈散, 燈神經仔通梁蛇極度看淡後市, 預測本周港股會遁地, 相反指標係會飛天, 向28000.28300.28500.28800...進發

阿爺又加碼出招救市, 推養老資金入市, 希望穩住內地股市, 有助大鱷推番大市上28000~29000主區間內, 以周波幅來看, 仍有望重上28000, 真正阻力在28300, 升穿企得穩就有運行, 今日恒指吻別28000, 國指吻別20天線, 做齊晒元帥劇本的指定動作又點穴養牛熊, 俾時間好友淡友入局, 再擇肥而噬, 昨日牛熊分佈均衡, 今日磨左成日, 示人以弱, 大量熊熊飛撲入市, 牛熊分佈變成熊多牛少, 加上沽空急增, 都係殺上去的先兆

今日收27819, 企27800關鍵位之上, 代表大鱷對上攻28000之心不變, 今日港股收升, 如果跟7月初的升跌模式, 就會係升兩日才回吐, 今日小升, 明日就會大升, 明日立秋(立即抽升)喇! 能否如願就要睇上証及大媽生唔生性, 因為今日係大媽大手沽出QQ拖低大市

股市和經濟表現密不可分, 美國經濟強勁, 企業前景好業績佳, 美元強勢, 資金流入美國, 美股死唔去, 中國經濟增長放緩, 貿易戰下企業前景及業績不妙, 人民幣弱雞, 資金流走, 中港股市死下死下, 在困局中波動

多位基金經理表示趁港股反彈減磅及將資金泊入非人民幣公用板塊來避險, 以及加重美股的倉位, 基金經理及唔少投資者都慨嘆港股由北水大媽主導, 亦跟住上証無啦啦急升暴跌, 無路可捉, 已炒到心灰意冷, 唔想再浪費精神炒中港股市, 因而紛紛走貨離場, 所以港股往往只係細成交乾升的技術性反彈, 俾大鱷舞高弄低, 好淡通殺, 無法吸引資金大舉入市,

港股高開高收呈大陽燭.重上28000/10800, 向28300.28500進發

7/8 周二恒指收報28248, 升429點(最多上升447點),

國指收報10866, 升164點(最多上升192點, 一度下跌9點), 收復20天線, 國指小幅跑輸恒指

大鱷咬住28000穿梭一邊等上証止跌回升, 等阿爺再出招救市, 另一邊就養牛熊, 真係陰公豬, 大鱷已經餓左3日冇開餐, 肥熊已下移, 在屠殺範圍內至28500附近, 美元回軟, 人民幣連升兩日, 港元拆息回落, 上証第二度跌穿2700大關後作出報復式反彈, 收2779, 升74點, 收復過去4日近一半跌幅, 不過要留意以往上証每次急彈後都無以為繼, 再度重拾跌勢, 港股反彈能走多遠就要睇上証, 因為兩地股市通常係同步見頂, 國指向上關鍵阻力位在10900(10天線)/10000/11150(前頂在11176/11147),

人行昨日起上調外匯風險準備金率至20%, 目的是遏制資本外流, 逼使做淡人民幣的平倉收手, 但措施只能令人民幣暫時回穩, 大方向人仔下行壓力未除

今日港股爆升挾淡, 不過大媽仍然趁反彈走貨, 班資回祖國, 港股通(滬)繼續出現資金凈流出, 反映利淡港股的因素依然存在, 但內地股市觸底反彈, 美股連日上升, 亦增強了投資者博反彈的信心, 淡友亦補空倉, 進一步推高大市

要留意的是本周港股已連升兩日, 好少全周日日升或跌, 要預先估計邊日見頂回落, 因為過去兩個月通常升3~4日就斷纜, 試完底再沖頂, 前頂在28772

國指已率先收復20天線, 具啟示作用, 預示恒指亦會跟隨, 不過港股時常玩假突破, 要收市企穩5天才能確認, 沽空急增, 熊多牛少, 都有上攻誘因, 上周低位在27578, 反彈千點可見28578, 1/8高位在28772, 剛好接近阻力大位在28800, 大鱷通常要千點才夠水位轉身, 到時獲利盤就會出籠, 港股底頂繼續上移, 如果跟7月初的走勢, 明日會升穿今日高位, 愈接近28800, 沽壓就會愈來愈大