全副身家三百蚊

在眾多騙案中，最好笑的，應該算是街頭騙案，特別是祈福黨。

試想象，一個三九唔識七的人，走埋黎同你講，你個仔今晚就會死於非命，你要拿拿林畀晒D錢我，我幫你祈福，你個仔就無事架喇。咁既騙案，居然有人會信，不單止信，仲要真係畀埋錢出黎。當日諗出呢條橋既人，一定會被同黨話：「咁既橋邊有人會信架？諗條好d既橋好唔好？認真d啦！」但勢估唔到，咁既橋，居然真係Work，世事真係好神奇。

而最神奇既係，李純恩計過條數，將被騙總額除以被騙受害人數目，得出平均每人會被騙一百萬元！一個咁蠢既人，居然可以有一百萬讓人家騙，已經係奇；而騙子隨街執一件來騙，居然可以騙到一百萬Cash，證明香港普羅市民都可以幾有錢。除非，你唔好彩遇著個領綜援的……

大埔有個阿婆，遇到祈福黨，唔知係咪六十幾歲人IQ倒退到唔夠六歲，人地話佢個仔被「狂鬼纏身」，今晚就會死，一定要「全副身家」拿出來祈福，綜援阿婆真係拿晒成副身家出黎－－三百蚊！仲好驚青咁問：「三百蚊既全副身家，有冇效架？話晒真係全副身家黎架！」結果祈福黨大小通殺，三百蚊照要，但係咁講價，要阿婆拿多d出黎，結果，拖得兩拖，被差佬拉晒。

究竟，事件中既阿婆真係蠢丫，定係查實佢知道有警察埋伏在旁，專登拖延時間等差佬call人呢？一定會有人以為「後者都唔奇呀，可能阿婆面懵心精呢！」但查實班差人真係「埋伏」，無人知佢地在旁，阿婆無理由專登拖延時間。「又或者佢口話全副身家，查實係孤寒，收埋收埋仲有好多呢？」或者啦！但無可否認的是，當班祈福黨聽到全副身家三百蚊果一下，面色一沉，真係……真係好拍戲feel。

世事如戲，就是這麼一回事。