同「阿翁」結緣二十年 向海嵐帶楊思琦「飯堂」取食經
2018/04/16 11:55:29 網誌分類: 生活
阿翁在96年創立富豪酒家，仲連續8年獲得米芝蓮一星評級，為吸納更多年輕食客，他近年尋求突破，搵來在美國修讀酒店管理的囡囡Vivian提供意見，Vivian說：「因為傳統中菜、鮑參翅肚都畀人娘娘哋嘅感覺，老人家先鍾意食。我就希望可以將中菜年輕化，所以有同爹哋傾，好似一啲菜式、甜品嘅製作，份量嘅多少、擺盤，都想做得後生啲。」因此設計出幾款新派菜，好似陳皮金瓜泥官燕、鮮果沙律金銀斑和脆皮龜苓膏及馬蹄糕等，甚有新鮮感。
O氹囡食譜變招牌菜
煮盡鮑參翅肚的阿翁，在家原來是一位廿四孝父親，曾經為遷就女兒口味而度出好受歡迎的招牌菜脆皮魚翅雞翼，於雞翼內釀入魚翅，後者吸收雞肉肉汁，外脆內juicy，成功O氹囡。Vivian說：「爹哋煮嘢好好食，但想食佢嘅手勢，就一定要去舖頭，喺屋企全部由媽咪出手。我鍾意食爹哋嘅脆皮魚翅雞翼，喺鮑參翅肚中，魚翅係我比較麻麻哋嘅食材，爹哋就諗咗呢個整法，令我食多咗魚翅。」
品牌年輕化
有Vivian為父親的經典品牌年輕化，名廚就梗係放心。阿Anne因港姐跟阿翁結緣，仲成為餐廳常客，「98年我成為港姐冠軍，其中一個獎品就係呢度嘅一圍酒席，因為咁我做咗阿翁哥嘅粉絲，呢度好多菜式嘅水準都好高，所以如果我喺香港嘅話，好多時都會嚟食飯㗎。而且早年阿翁哥有贊助過『慧妍雅集』，嗰時一個月喺度開兩次會都特別多會員嚟，因為啲嘢真係好食。」無獨有偶，阿Anne最近都有一些年輕化新搞作，「我同一位珠寶設計師朋友，創立咗一個珠寶品牌，主力以翡翠去出品首飾。我哋揀翡翠嘅原因，係因為佢嘅典雅高貴，可惜佢畀人嘅感覺好古老，所以我就想將呢種原料年輕化，加入新式設計，令人對翡翠有一個新嘅觀感。」
思琦返內地拍新片
跟好友阿Anne來歎美食的思琦，首見阿翁名廚，就能即場見識老闆炮製好啱女人食的「阿翁炒花膠」，坦言好有口福。思琦說：「我最鍾意食，唔會因為怕肥而戒口，最多之後做多啲運動。平日盡量食到7、8成飽，會健康啲。」講到工作，不時要返內地商演的思琦，下月將會去茂名逗留三星期，拍內地電影《田園時代》，新片圍繞三個不同年代的女性，致力將鄉村現代化，她飾演80年代的外來媳婦，思琦開心說：「第一次演啲鄉村、好純樸嘅角色，劇本好勵志，而且今次全程都要講普通話，所以O依家好努力睇劇本。」問到要同6歲囡囡卓穎分隔兩地，思琦都有不捨謂：「唯有日日facetime啦！所以我都想接多啲香港嘅戲，多啲留守香港陪吓囡囡。早排復活節陪完佢(囡囡)上郵輪玩，佢都有叫我抽多啲時間陪佢再去旅行。平時有啲慈善job，我都會帶囡囡一齊去，用身教教育佢去幫人。」
主持 : 黃柏高
統籌 : 林永匡
攝影 : 袁東亮、謝民光
協力 : 林書鉉
場地 : 富豪酒家
(電話：27362228)
黃柏高
■楊思琦和向海嵐今次齊齊到阿翁（翁仰光）的酒家歎阿翁千金翁文敏（右）設計的新派高級中菜，順道暢談食經。
■98年向海嵐成四料港姐冠軍，因而認識阿翁，廿年來是其酒家常客。
■向海嵐和友人合資珠寶品牌「Lagacy Lab」，主力設計翡翠首飾。
■向海嵐與楊思琦對阿翁父女的「煮意」讚口不絕。
■阿翁即場示範「阿翁炒花膠」，以印度鰵魚膠，加入羔蟹蟹王、蟹肉及金華火腿絲，於砂鍋中同炒，火候及味道掌控都極考功夫。
■日前，思琦與囡囡卓穎上郵輪歡度假期，欣賞魔術及歌舞表演。
■郵輪假期好relax，思琦不時晒靚相，身材fit爆。
■向海嵐(左)和思琦(右)兩位好友，日前獲邀做華鼎獎頒獎嘉賓。
回應 (0)
我要發表
