PACO名人會
PACO名人會
PACO名人會

相隔6年再開個唱 劉浩龍秘練樂器 跳舞製驚喜

2018/03/19 12:02:05 網誌分類: 生活
19 Mar
         歌手出身的劉浩龍(師兄)近年主力拍電影,近作有《追龍》和《臥底巨星》。曾打算放棄唱歌的他,早前推出新歌《不一定》和《Feel So Right》,下月27日更會在旺角麥花臣舉行《Action Speaks Lauder Concert 2018》。相隔6年再有機會與歌迷近距離見面,師兄感到興奮又期待,他透露個唱除了會唱不同曲風的歌,亦會秘密練樂器和跳舞。現時做運動積極減30磅,如成績理想到時可考慮騷肌,他坦言觀眾一定會有驚喜。

         原定個唱是去年10月舉行,但因為師兄太多戲拍,才延至下月底舉行。為了這個演唱會,去年推出慢歌《不一定》,最近就有快歌《Feel So Right》,師兄話嚟緊仲會出多首新歌,他坦言:「咁耐冇開騷,除咗新歌,仲揀咗好多大家都鍾意嘅歌,包括:《思覺失調》、《記得》、《二等天使》同《斷尾》等,我仲會唱兩隻人哋嘅歌。」他續稱演唱會大約唱二十幾首歌,由於想留多啲時間會歌迷,所以不會請嘉賓了。

        不同環節新嘗試

          至於演唱會的Rundown,師兄表明會分不同的環節,他透露:「其實都度咗好耐,因為我會將自己嘅歌去改編一啲我從來未唱過嘅曲風嘅歌,當然有啲大家好鍾意嘅歌,我係唔會做任何嘅arrangement,希望大家聽到後有番當時嘅感覺。」此外師兄仲會有其他新嘗試,他開心表示:「會有跳舞環節,下月初就開始練舞;亦有一part會比較嘈啲,因為會玩吓搖滾。」他還秘密練樂器作表演,至於甚麼樂器?他神神秘秘說:「唔話畀大家知,要保密,到時嚟睇咪知囉!」

        每日操練兩小時

          現時師兄為準備個唱積極操練,他說:「不知不覺操咗個幾月,每日要跑8公里,加埋一個鐘頭做Gym,練唔同部份如背、胸、腹、手同腳等不能盡錄。其實o依家嘅成績都唔錯,已經減咗20幾磅,希望3月尾完全搞掂個身體先,唔想去到演唱會前仲刻苦緊,因為始終仲要練聲、食番啲嘢,等有氣有力唱歌。」而飲食配合都好重要,師兄表示現時只有四樣嘢可以食,分別是菜、雞胸肉、海鮮類和蛋白,「其實呢兩個月仲可以食到有味嘅嘢,可以有鹽又有油,都好好啦!」

        出碟做稱職歌手

          師兄表示,他已很習慣減肥呢個動作,「其實操練同減食對我嚟講唔係太辛苦,因為每年拍戲都可能有咁嘅需要,所以我會時肥時瘦,希望今次盡量操到一副好嘅body畀大家睇,至於到時會唔會除衫騷肌就未諗。」不過可以肯定的是,師兄在演唱會之後會繼續派歌,希望派多4至5首,然後出碟,他坦言:「希望今年可以努力做番個稱職嘅歌手之餘,繼續去拍電影,爭取多啲唔同類型嘅角色去做。」

        主持 : 黃柏高 統籌 : 林永匡

        攝影 : 袁東亮、謝民光 協力 : 李佩儀

        場地 : 紫 Dining at Murasaki (電話:28178383)

        黃柏高

        
■Paco預祝劉浩龍演唱會成功,今年唱更多好歌給歌迷聽。
 ■Paco預祝劉浩龍演唱會成功,今年唱更多好歌給歌迷聽。 
■劉浩龍以滿面鬍鬚的造型拍攝演唱會海報,十分特別。
 ■劉浩龍以滿面鬍鬚的造型拍攝演唱會海報,十分特別。 
■劉浩龍早前與多位性感ladies拍攝快歌《Feel So Right》的MV。
 ■劉浩龍早前與多位性感ladies拍攝快歌《Feel So Right》的MV。 
■劉浩龍(左)近年專注拍戲,但仍會唱歌,去年曾與周國賢在音樂會合唱。p/  
 ■劉浩龍(左)近年專注拍戲,但仍會唱歌,去年曾與周國賢在音樂會合唱。

   

■劉浩龍在電影《臥底巨星》中教陳奕迅打功夫好搞笑,他希望嚟緊可以拍多啲笑片。
 ■劉浩龍在電影《臥底巨星》中教陳奕迅打功夫好搞笑,他希望嚟緊可以拍多啲笑片。 
■劉浩龍希望操到副好body,在演唱會騷畀大家睇。
 ■劉浩龍希望操到副好body,在演唱會騷畀大家睇。 
■劉浩龍與王晶和甄子丹曾在電影《追龍》合作過,今年三人會在另一部戲再碰頭。
 ■劉浩龍與王晶和甄子丹曾在電影《追龍》合作過,今年三人會在另一部戲再碰頭。 
回應 (0)
我要發表
user