4月開處女紅館騷 趙學而齋賣靚聲：唱出女人心
2018/02/26 12:09:48 網誌分類: 生活
88年參加新秀出身的趙學而，演繹過無數「好女人的情歌」，如《每隔兩秒》、《尋開心》、《自欺欺人》、《我恨我是女人》等，其中與王傑合唱的《誰明浪子心》，更是K歌必選。學而94年推出首張唱片，後來入TVB做主持及重心拍劇，其中《皆大歡喜》一拍就四、五年，但對唱歌有團火的她08年大膽自資出Hi-Fi碟，靚聲惹人垂青，獲邀上紅館。學而開心分享說：「入行咁多年，從來無欲望上紅館，一切處之泰然，因為我心態上未ready去做，始終太耐無唱歌。其實好多謝主辦商，佢哋由08年開始搵我，直至16年我喺九展舉行咗「我趙學而演唱會」後，反應好好，網民又幫我集氣推我上紅館，主辦商就即刻幫我入紙申請檔期，結果等了一年才批。」結果在天時、地利人和的情況下，成就出趙學而人生首個紅館個唱。
唱前輩金曲致敬
作為人生首個紅館騷，對把聲勁有要求的學而搵來重量級班底，學而說：「音樂總監搵嚟同我合作過Hi-Fi碟嘅何秉舜，佢好熟悉我啲歌，編曲上容易啲處理。服裝就係Tang Lai，監製係Mark(雷頌德)，上年喺澳門開騷都係Mark做我監製。個唱上我唔會勁歌熱舞，不如專心啲練好啲把聲唱歌。我有好多感性慢歌，講女人對生活或感情嘅睇法，由《每隔兩秒》到《輸給戀愛的女人》，好似講緊女人成長咁，所以歌曲編排會打動少女、中女等唔同年齡層，有共鳴之餘亦可與Fans嚟個集體回憶！」大唱首本名曲外，曾翻唱歌手Hit歌大獲好評的學而亦揀了幾首前輩金典致敬，學而說：「我啱啱出道時，當時有啲當紅女歌手做人態度令我好欣賞，趁住今次個唱我揀了林憶蓮、關淑怡和王靖雯(現名王菲)嘅歌，大膽挑戰吓。」
預告性感晒腿
形象上，學而提到九十年代出道時已試過性感造型，今次踏上紅館，舞衣華麗之中亦不失性感。她說：「服裝方面，老公唔會控制我，一人做事一人當，性感對於我唔係大問題，最大難題係我太瘦，因為瞓得唔好，成日失眠，搞到咁多年嚟食極唔肥。尤其是早年情緒病好番，停咗食安眠藥後，晚晚諗嘢好難入睡，o依家除咗去旅行relax啲瞓得好，其餘時間都無覺好瞓，可能精神壓力太大啦！所以為咗個唱要好努力增肥，o依家每日食六，七餐，除咗瞓覺，無時無刻我都喺度食嘢咁滯。而且我唔使戒口，辣嘢、煎炸同肥膩嘢乜都食，粥粉麵飯我最歡喜，希望到時大家睇到我呢個小骨女露腿、騷膊等都靚啲啦！」11年跟拍拖多年的建築師男友Alan結婚，食量驚人的蘇太大爆和丈夫的飲食習慣南轅北轍，她笑說：「老公思想和胃口好西化，佢鍾意西餐；我喜歡食菜、魚、蛋等，兩公婆同枱食飯，可以佢食牛扒；我食蒸魚。平日湯水我負責，至於pasta、西餐，就老公搞掂。」學而非常感激老公幫輕家庭事，令她可以專心準備個唱。
主持 : 黃柏高
統籌 : 林永匡
攝影 : 袁東亮、謝民光
協力 : 林書鉉
黃柏高
■我最欣賞對自己歌聲好有要求的歌手，學而是其中之一，能用歌聲感動人。
■繼16年的九展「我趙學而演唱會」後，學而去年假澳門再開騷，當時狀態勁fit，她自讚「把聲靚到不得了！」
■早前，學而為紅館個唱，大膽真空上陣影宣傳海報。
■自認小骨女的趙學而，平日愛踩單車和跳繩練氣。個唱上，她希望王傑能到場合唱《誰明浪子心》。
■學而謂最喜歡和老公去泰國度假減壓，又可以狂食辣嘢。
■學而當年曾著bra top獻唱，性感又大膽。
■學而和丈夫Alan風雨同路多年，感激另一半幫輕家庭事，令她可以專心準備個唱。
■《皆大歡喜》古裝加時裝一拍七百多集，讓學而充實的過了4年。
回應 (0)
我要發表
