PACO名人會
PACO名人會
PACO名人會

夫妻檔勇闖伊朗 [email protected]驚訝:當地人好單純

2018/01/08 12:23:28 網誌分類: 生活
08 Jan
         樂隊Mr.的鼓手Tom(杜志烜),2011年僅得23歲就同20歲的「陽光妹」何思諺(Leanne)奉子成婚,翌年誕下兒子杜卓霖(Jasper),一家三口生活愜意。早前,這對90後CP(couple)被邀拍攝ViuTV的實況節目《婚姻五重奏》。二人攜手勇闖被指是烽火之地伊朗大冒險。在黃色旅遊警示下出發的Tom遊歷過後,對伊朗有另一番體會,他說:「其實當地人好簡單,只係被外界標籤成『戰亂之地』,其實都好有內在美O架!」對這個神秘國度,重新詮釋。

         《婚姻五重奏》帶出五對夫妻在五個不同國度,有五種婚姻觀,其中最young的Tom和Leanne,早婚不被外界看好,但現在恩愛如昔,囝囝杜杜已經是K3生。Tom表示:「今次攝製隊揀我哋去伊朗,係有另一個深層意思,透過我哋喺一個咁特別嘅地方生活,同我哋早婚一樣,外界都已經有晒標籤,伊朗係『戰亂之地』;我哋就係『早婚夫妻』,但現實我哋係handle到個家,實際嘅伊朗都唔似新聞報道所講咁恐怖。」

        出發前想縮沙

          兩夫婦臨行前曾想過縮沙,Tom說:「去年中出發時,德黑蘭剛發生恐怖襲擊,仲發埋黃色旅遊警示,咁屋企有小朋友,要顧慮嘅嘢多咗。不過太太鍾意去唔同嘅地方遊歷,體驗各地嘅生活。而且老婆好有責任心,唔想反口,咪頂硬上囉。」於是一行9人戰戰兢兢出發,Tom續說:「去到伊朗先發現,當地人好多都好好人,我同清真寺嘅主持人交流,發現佢哋好respect其他民族嘅文化,同外界所講嘅好唔同。」Leanne補充:「伊朗呢個地區予人感覺係好多坦克、好多AK和恐怖襲擊嘅地方。我哋親歷其境後,完全係另一回事。當地人超級nice,成日打招呼,想同你影相,覺得亞洲面孔好新奇又少見。」

        難忘飲「洗腳水」

          講到當地飲食,持續高溫又好dry,二人不停飲水,又撞正「齋戒月」無啖好食。Tom笑說:「當地人日頭唔食嘢齋飲嘢、晚上先食少少。我哋日日食好乾嘅雞,本來我想體驗埋齋戒,但係後來都同隊crew一齊食嘢。不過,我都有入鄉隨俗,試過飲當地人勁like嘅『大蒜牛奶』,係蒜茸加牛奶、乳酪同芝士,當地人當汽水咁飲,係傳統飲料。嘩!味道似足千年冇洗腳嘅『洗腳水』,一試難忘。」而平日愛飲茶的Leanne就話:「我鍾意飲茶,當地人一日就飲成十幾杯茶,所以佢哋啲茶葉係唔會出口嘅,但味道偏甜,似含住粒方糖飲茶。」

        見識夜生活

          8日旅程當中,杜氏夫婦最深刻莫過於去到伊斯法罕一個大型市集,在一間地氈舖拍攝時遇上一老翁,帶他們體驗當地男人的夜生活。Tom興奮表示:「拍攝時忽然有個八十幾歲嘅叔叔走過嚟,話帶我哋去玩,體驗伊朗人真正嘅夜生活。夜晚十點後,伊朗男人有咩夜生活吖?原來係去一個好似搏擊會嘅地方,啲參賽者全部都係大隻佬,喺個擂台上fing鐵鏈、舉盾牌、舉啞鈴等,睇落好無聊,做gym咁。但呢個活動,原來係伊朗男人發洩精力嘅地方,可以減低犯罪率,因為當地冇酒吧冇K唱,呢個已經係佢哋嘅娛樂,所以當地人其實好單純、好簡單,唔應該標籤到咁恐怖囉!」

        主持 : 黃柏高 統籌 : 林永匡 攝影 : 袁東亮、謝民光

        協力 : 林書鉉 化妝 : WENDY [email protected]'S WORKSHOP

        場地 : Cafe de Paris EST. In Korea (電話 : 6436 2181)

        黃柏高
■Tom和Leanne有份拍攝的《婚姻五重奏》,將於1月14日起逢周日晚在ViuTV播出。
 ■Tom和Leanne有份拍攝的《婚姻五重奏》,將於1月14日起逢周日晚在ViuTV播出。 
■採訪地氈舖當日,兩夫婦被老翁撩去搏擊會,大開眼界。
 ■採訪地氈舖當日,兩夫婦被老翁撩去搏擊會,大開眼界。 
■在當地要包到冚的Leanne,拍攝時才偷雞「解放」。
 ■在當地要包到冚的Leanne,拍攝時才偷雞「解放」。 
■Tom大爆兩夫婦旅程曾有少拗撬,他說:「有日我整理相機袋,發覺老婆將食剩嘅糖紙放喺袋,咪話佢兩句囉。」
 ■Tom大爆兩夫婦旅程曾有少拗撬,他說:「有日我整理相機袋,發覺老婆將食剩嘅糖紙放喺袋,咪話佢兩句囉。」 
■2011年,拍拖兩個月的Tom和Leanne奉子成婚,至今仍甜蜜蜜。
 ■2011年,拍拖兩個月的Tom和Leanne奉子成婚,至今仍甜蜜蜜。 
■兩夫婦早前成立經理人公司,Leanne更殺入幕後做廣告導演。
 ■兩夫婦早前成立經理人公司,Leanne更殺入幕後做廣告導演。 
■兒子Jasper就快6歲,同父親餅印一樣。
 ■兒子Jasper就快6歲,同父親餅印一樣。 
回應 (0)
我要發表
user