PACO名人會
PACO名人會
PACO名人會

50集《誇世代》賀TVB金禧台慶 田蕊妮吳業坤蔣家旻戲裏戲外一樣搞笑

2017/12/18 12:31:06 網誌分類: 生活
18 Dec
          為慶祝無線50周年炮製的50集台慶劇《誇世代》,故事主要講歐陽震華(Bobby)飾演事業有成銀行家同吳業坤(坤哥)演的廢青交換靈魂,兩代人對調身份搞出連場笑料。演Bobby「老婆」的田蕊妮呢日率領坤哥和蔣家旻齊齊講拍攝感受,他們話雖然夏天着住冬天衫拍戲特別辛苦,但一班演員相處融洽,加上是喜劇,所以戲裏戲外氣氛一樣咁搞笑,這天都爆出唔少笑料㗎!

         阿田和家旻都有好耐無見,而吳業坤則是首次認識,估唔到獲阿田賜名「坤哥」的他,甫見面已經有笑位。阿田說:「佢嗰時參加歌唱比賽,我係MC,佢梗係無大無細㗎啦!(咁大膽?)(坤哥:嗰時未敢嘅!)嗰時見佢戇吓戇吓,日日返到嚟綵排唱歌都係咁,咪叫佢阿哥,叫吓叫吓就變咗坤哥囉!點知佢真係以為自己係阿哥!」坤哥就扮認真話:「真係以為係,娛樂圈係個大染缸嚟嘛!」

        阿田自認怕老公

          搞完笑阿田就爆料話,除了有Bobby同坤哥靈魂調轉外,原來她一樣有同其他角色交換靈魂,「中間我又會突然間同張繼聰靈魂調轉㗎!(個編劇好出色喎!)即係調嚟調去,佢唔亂嗰吓勁嘛!我喺入面演個小女人『凌潔茹』,係個奴性好強嘅老婆,老公話一就一話二就二,聽晒老公點。(咁非常好喎!)對我嚟講係一個新嘗試嚟。(但係你本身係咁㗎!)你真係了解我呀!哈哈!我同個個講冇人信我呀!(我梗係知啦!)你就知啦!不過要我做番我自己都好難㗎!哈哈!」家旻就介紹自己演的「楊紫惠」貪慕虛榮,「坤哥佢有追我,但我當佢係兵,我個人比較鍾意走捷徑,見有錢仔就溝,其中一個係張繼聰。」

        坤哥怕抽離唔到

          至於坤哥就笑指劇中Bobby用他演的「包豹」身體去溝阿田,「阿田要幻想係我去做,都應該幾辛苦嘅,又去食燭光晚餐,又好sweet咁睇戲,仲望住講情深說話。如果我真係要我去演,我真係驚戲假情真囉!(阿田:係呀!對住我做戲好難抽離!)我對上嗰幾部戲都抽離唔到呀!(咁投入呀!)其實由《巨聲》開始都抽離唔到。(阿田:對上嗰部戲佢喺天台度,我搣佢啲手指整死佢嘅,佢一路抽離唔到,日日上天台跳落嚟呀!)講我死咗會纏住你!(阿田:所以你O依家纏住我呀!)」

        感動劇情大爆料

          談到最深刻的劇情,阿田首推明日一集(本周二)跟「老公」真身重遇的一刻,她拍時也很感動,「我一路以嚟眼見係坤哥嚟,但其實個靈魂係Bobby嘛!但我老公失蹤咗咁耐,突然喺我面前出現喎!我好感動之餘,我又喺咁打佢喎!因為接受唔到呢件事,佢走咗咁耐,突然話返嚟就返嚟,嗰段時間好辛苦㗎嘛又裝備好自己,又學識點樣獨立,所以呢場戲心情係好複雜幾得意嘅,希望觀眾都可以留意吓(你演技唔使講啦!)都唔係㗎!我拍時自己都好感動呀!」而坤哥亦爆有場同麥明詩的感情戲,要被對方狂打,「佢真係拳拳到肉咁打落嚟,都打咗4、5個Shot,可能佢畀咗錢導演啦!」

        協力:杜淑霞 攝影:袁東亮、謝民光

        場地:鹽澤鐵板燒 電話: 2402 3318

        地址:銅鑼灣耀華街38號Zing!28-29樓

        主持:黃柏高 統籌:林永匡

        黃柏高

        
■阿田、坤哥和家旻都是首次拍攝50集長劇,大家對足9個月,因而變得好熟絡。
 ■阿田、坤哥和家旻都是首次拍攝50集長劇,大家對足9個月,因而變得好熟絡。 
■單是講阿田賜名「坤哥」的故事,大家已笑不停。
 ■單是講阿田賜名「坤哥」的故事,大家已笑不停。 
「感情戲率先爆」「凌潔茹」在電視台重遇失蹤多時的老公「宋仲基」,既開心又激動,於是邊喊邊摑老公,但兩人跟手就攬埋一嚿。
 「感情戲率先爆」「凌潔茹」在電視台重遇失蹤多時的老公「宋仲基」,既開心又激動,於是邊喊邊摑老公,但兩人跟手就攬埋一嚿。 
  
  
■坤哥劇中跟麥明詩有感情戲,還要被女方狂打。
 ■坤哥劇中跟麥明詩有感情戲,還要被女方狂打。 
■劇中貪慕虛榮的家旻,就會愛上張繼聰。
 ■劇中貪慕虛榮的家旻,就會愛上張繼聰。 
■阿田聲稱今次角色做番自己,只是一個聽老公點的小女人喎!
 ■阿田聲稱今次角色做番自己,只是一個聽老公點的小女人喎! 
■大熱天時着冬天衫開工,李佳芯都要頻頻灌水。
 ■大熱天時着冬天衫開工,李佳芯都要頻頻灌水。 
回應 (0)
我要發表
user