6~9/8 大舉屠熊趙完鬆

6~7/8 熊市死貓彈，港股止跌回升熊命危

肥牛陣亡已清場.轉勢向上.部署上攻屠肥熊:

~ 2018年水星逆行(26/7 ~ 19/8)危機重重, 恒指創新低27578, 由29/1高位33484回吐至2/8低位27578, 年波幅5906點, 仍未達標(2017年波幅8316點, 就算打個八折今年都未見大底啦!), 估計今年大底仍未出現, 不過大市超賣, 要先作出技術性反彈, 沖頂回落才會再繼續尋底, 大鱷會上山屠熊, 養牛, 留待日後的殺戮

~ 2/8恒指暴跌創新低27578, 大鱷食飽肥牛趙完鬆, 拗腰上攻, 向28300.28500.28800....進發, 部署屠熊

~ 不要低估大鱷操控港股的能力, 大鱷愛玩好淡通殺, 既然大鱷有能力夾硬隊穿27800屠牛, 當然亦有能力爆番上去屠熊, 大鱷係追住牛熊來殺, 只要有肥熊, 就有上攻誘因, 有肥牛就會落地獄, 港股升跌由大鱷話事

~ 7/8 轉節氣立秋(立抽=立即抽升), 果然轉勢向上大幅上升, 收復28000關鍵大位, 每500點一級向上移, 下一站28500

~ 今次恒指插穿28000, 單日暴跌762點擺明係大鱷借貿易戰及A股下挫借勢殺好友牛牛, 逼人止蝕/斬倉來做成暴跌的目的

~ 當大鱷係低位收夠貨, 就會殺番上去屠熊, 高位再派貨出街, 食飽肥熊就會再插落去屠牛, 好淡通殺, 牛熊都要死

~ 港股走勢非常被動, 跟住上証及人民幣飛天遁地, 升跌都不可盡信(請重溫18/7困局待變網誌, 留意大鱷早前在30000~31000炒波幅及玩爆時是操控大市的手法)

~ 按照慣性走勢, 連升後會插水, 連跌後會彈高, 上周連跌, 預示本周恒指會反彈高收, 但過去5個月都係升一周就會再跌過, 即係6~10/8全周埋單收升, 但13~17/8全周埋單就收跌, 14/8破日, 15/8 QQ公佈業績, 都係高危日子

~ 現時港股似處於熊市二期反彈浪中, 雖然向下會插穿前底27578, 但大方向會重上29000, 先挑戰28800阻力大位, 不過未必係一步到位, 唔知幾時才上, 小心當山上的肥熊陣亡, 牛牛上移, 就係見頂之時, 港股到時就會突然大跌

~ 一直深信內地股市破位而下, 阿爺不會坐視不理, 結果近日真係密密出招救市, 中港股市通常係同步見底頂, 只要上証止跌回升, 好友就會借勢反擊, 大鱷就可好淡通殺, 但要留意的是, 上証升勢往往係花一現, 急升後就會急跌

~ 連友邦.恒生.QQ等強股都倒下, 通常連強股都插就係洗倉洗到尾聲, 代表大市會有死貓彈, 消化超賣後再跌過

~ 今次大跌浪恒指創10個月新低, 但國指冇創新低, 國指表現具啟示作用, 只要國指不死, 就會撐住恒指

~ 一般來說, 當屠牛殺好倉任務完成, 大鱷就會趙完鬆, 彈上去屠熊, 以及再養過新一批牛熊, 再擇肥而噬,

~ 恒指到目前為止高低位27578~28772, 往後一定要爆邊才夠月波幅, 一係兩邊都爆, 亦可以爆單邊, 升穿28772或跌穿27578, 試完底再沖頂,  正路應先上攻28772, 破唔到再插過, 因為慣性走勢係試完底就會再沖頂, 如沖頂打回頭就要再試底

~ 港股去年的大牛市在今年1月見頂33484後步入熊市, 量度跌幅可見27676水平, 2/8低見27578已到第一個目標, 理應有淡友食胡, 因為若以黃金比率去計算, 調整0.382目標為27676, 調整0.5目標為25881, 3/8剛好收27676, 絕不會是巧合

~ 睇買賣盤路市場已在28000找到平衡點, 大鱷食飽牛牛就會推番大市上28000~29000主波動區, 磨下派下貨, 養牛熊, 然後再等消息爆邊,

~ 8月份有多隻大藍籌除息, 期指會呈低水

~ 超賣+企業回購+淡友回補空倉+阿爺不斷出招救市都有助推動大市向上, 港股能走多遠就要睇上証, 因為要A股升, H股才有力上, 當上証急挫, 亦會拖低港股

~ 牛熊分佈係熊多牛少利上攻, 近日沽空急增, 都有挾淡誘因, 向上阻力28500.28800

~ 恒指自從創新低後VHSI恒指恐慌指數連日下跌, 唔驚啵! 代表下殺危機暫時解除, 大市正處反彈勢頭, 當VHSI急升就要小心大市見頂

~ 上周五收市後燈神經仔通梁蛇預測港股本周會反艇, 結果本周就日日飛升, 梁蛇係技術派高手, 代表本周淡友已中伏, 俾大鱷騙了入局, 要逼到淡友投降, 大鱷才會俾大市下跌

~ 恒指由1月高位33484回吐至8月低位27578, 累計下跌5906點, 下跌幅度足夠支持一個大反彈, 估計反彈幅度及力度會遜於上次的1338點(27745~29083), 打個八折就會升約1100點見28700, 28800係超級關鍵位, 阻力非輕

~ 美元回軟, 人民幣連日上升, 港元拆息回落, 上証兩度跌穿2700大關後都拗腰上企, 見阿爺護盤手影

~ 人行上調外匯風險準備金率至20%, 目的是遏制資本外流, 逼使做淡人民幣的平倉收手, 措施的確令人民幣暫時回穩, 不過人民幣貶值趨勢已形成, 人幣資產遭離棄, 走資拖累中港股市表現

~ 內地股市觸底反彈, 美股連日上升, 亦增強了投資者博反彈的信心, 不過相信只係短線投機者入場, 熊市好難連升, 如果連升多數係有陰謀, 目的係屠熊及挾淡, 連升後多數冇好下場, 唔好俾大鱷牽住鼻子走, 大升都唔好信

~ 國指已率先收復20天線, 具啟示作用, 預示恒指亦會跟隨, 但收復不難, 企穩不易

~ 港股雖然連日上升, 但其實有暗湧, 唔少股份都係一彈就惹來沽壓, 熊市沽壓不容忽視

~ 去年大媽狂掃港股, 今年大媽食胡, 狂沽港股, 港股通(滬深)頻頻出現資金凈流出, 大媽密密沽出QQ, 去年北水湧港係23000水平, 所以大媽於現水平走貨仍有利可圖, QQ當時係$200, 近日在$360穿梭, 上周QQ暴跌除了是為了操控大市上落外, 其中一個原因係大鱷想殺QQ好倉, 近日QQ彈高, 當然亦係為了殺淡倉, 食飽又會再插過, 15/8 QQ將會公佈業績, 到時港股又會有大龍鳳

~ 成也大媽.敗也大媽, 上周港股跌到阿媽都唔認得, 創新低27578, 皆因大媽狂沽港股, 上周北水淨賣出75億港元股票, 以單一星期計為有紀錄以來第三大撤資, 本周港股得以反彈, 亦係因為大媽沽盤略為收斂, 凈賣出縮減,

大媽勁聰明, 唔鍾意賤價而沽, 所以並非單邊沽出, 係撩高才走貨, 常見即市大媽愛股急升, 其實大媽係暗地裡出貨, 每當見到股份無啦啦飛天, 多數係大媽所為, 大鱷大媽合謀操控港股已到了無法無天的地步, 唔好以為大媽掃貨就係看好後市,

~ 股市和經濟表現密不可分, 美國經濟強勁, 企業前景好業績佳, 美元強勢, 資金流入美國, 美股插完都識得彈, 餐餐都死唔去, 中國經濟增長放緩, 貿易戰下企業前景及業績不妙, 人民幣弱雞, 一彈即散, 資金流走, 中港股市頂部下移, 屢創新低不無道理

~ 基金經理及唔少投資者都慨嘆港股由北水大媽主導, 亦跟住上証無啦啦急升暴跌, 無路可捉, 已炒到心灰意冷, 唔想再浪費精神炒中港股市, 因而紛紛走貨離場, 所以港股往往只係細成交乾升的技術性反彈, 彈完又插, 俾大鱷舞高弄低, 好淡通殺, 無法吸引資金大舉入市

港股沖高回落.收窄升幅呈陰燭.熊近牛遠利上攻.向28500.28800進發

8/8 周三恒指收報28359, 升110點(最多上升224點~競價開市位, 一度下跌24點), 收復10及20天線

國指收報10901, 升35點(最多上升74點~競價開市位, 一度下跌21點), 收復10天線, 國指小幅跑輸恒指

港股今日走勢反常, 幅即市走勢圖竟然唔跟上証, 各行各路, 唔跟上証跌, 大媽雖然大手沽出QQ, 但大鱷就掃QQ來力撐大市, QQ有持股的特斯拉（Tesla）可能私有化的消息及炒業績盤吸引投資者及大鱷掃QQ, 推動港股就連升3天, VHSI恒指恐慌指數下跌, 唔驚, 即係港股未見頂, 阿爺密密推出措施救股匯, 人民幣及港股同步連升3天

大鱷操控港股真係神級, 港股開市位已是全日高位, 走勢明明唔靚, 仍能收升, 今日好友手影明顯, 大鱷有乜陰謀? 看來明天會有大龍鳳, 貼價熊要小心, 因為大鱷想開餐只能上攻, 熊多牛少.熊近牛遠利上攻, 要肥熊清左場才會落去殺牛

約3800張肥熊在28500~28900, 大鱷等緊阿爺回氣後再上來做推升助力, 今日港股玩沖高回落收陰燭, 示人以弱, 大量熊熊飛撲入市(中伏), 貼價牛多到不得了, 牛牛見彈散就食胡(走寶)

恒指由低位27578反彈至今日高位28473, 累計約900點升幅, 不進則退, 以每日閒閒地300點即市波幅來看, 明日一係升穿28500屠熊, 一係跌穿28200, 大市可能繼續在10及20天線穿梭, 期指未平倉淨數 (NOI)大手減倉, 可能係好友食胡, 小心大市隨時會轉向, 期指低水部份原因係有大藍籌除息

本周港股雖然反彈, 重上10及20天線, 但奇怪的是, 國指卻是連續4日跑輸恒指, 有暗湧啵! 係中資股壓住大市, 受貿易戰所累, 資金沽人幣資產, 怪不得長和.新地等港企受追捧, 要留意的是, 當這些指標股見頂, 就代表港股反彈完結

今日理應上破28500屠熊, 但高見28473就回頭, 大鱷冇食牛熊, 極為反常, 已經餓左4日, 今年未試過餓5日咖! 冇理由途長路遠走左九百里路上山, 唔食肥熊就落山, 即係拖到明日就要開餐啦! 要食埋熊熊才插得

港股磨左4日, 仍然係熊熊最貼價, 只要上28500就有肥熊吃, 牛遠在27800樓下, 並不吸引, 要等牛牛上移至28000水平大鱷才會有興趣, 明日港股就要睇阿爺做人, 只要阿爺做好港股就會有彈高吃, 上証關鍵位2780/2800/2815, 以往大鱷將港股點穴就係想趕走遠牛熊, 引貼價牛熊入屠殺範圍內, 部署開大餐, 時辰到了

港股低開高收.單日轉向呈大陽燭.連升4天.大舉屠熊.惟高位沽壓加劇.後市不妙

9/8 周四恒指收報28607, 升248點(最多上升369點, 一度下跌166點)

國指收報11020, 升118點(最多上升168點, 一度下跌111點), 國指跑贏恒指

如QQ見頂.港股見頂

上証又飛天, 升50點, 收2794, 內銀內險資源商品A股急升刺激H股飆升, 推動港股向上, 按照慣性走勢今日港股回吐機會大, 但大鱷未達到目的(例如屠熊)就唔俾跌住, 港股今日低開後一插即彈, 跟住上証愈走愈高, 一如昨日所說, 大鱷最多餓4日就會開餐, 今日果然出手, 高見28728, 大舉屠殺1750張相對期指對沖張數熊證, 秒殺肥熊即回, 趙完鬆, 屠熊任務完成跌得未呢? 明日係周末, 加上已連升四日, 避險沽壓會大增, 好友小心