話之你冧樓

我要趕工程

你哋咪詐型

放大芝麻事

賺得眼矎矎

造價千億亦係世界上最昂貴嘅「沙中鱔」地龍工程龍筋被斬都唔止、仲要事故頻生、真係唔知因乜解究。嗱、原來地龍工程獲得豁免權、無須接受建築條例規管。因此工程令到附近地區出現沉降62毫米、比上限29.2毫米超出一倍有多、但公家部門卻不得依牙鬆槓。即使街坊投許其住所受到沉降影響導致牆壁出現裂縫、地龍工公司卻處之泰然繼續施工。地龍公司發言人話沉降好平常、就算地下暗流移位都會出現沉降嘅、樓宇結構受到沉降影響可以灌獎加箇、若然出現傾斜就利用撐架頂住。嘩、阿哥、家陣講緊嘅係你哋個工程影響緊人家棟樓嘅安全、人命攸關架、點可以等閒視之架？由此可見、地龍工司嘅特權真係大過人權。𠲖、點解垃圾會班尊貴今次人人閉嘴、個個噤聲嘅、吓？！

雖然話工程引至沉降並唔係新鮮事、但總應該有個標準嘅。今次沉降超標一倍有多、連地下煤氣管都受影響而泄漏煤氣、而煤氣公司亦證實有四處地方嘅沉降此較嚴重、擔心會對煤氣管涉氣、所以要加強巡查頻率。咁即係話、並唔係街坊蛇𠺌啦！係嘛？！之但係、地龍公司卻保持一貫死雞撐飯蓋嘅作風、實行一撐到底、而身為大股東嘅公家又冇企出來作任何表示。喂、既然公家已經知到沉降超標一倍有多、係咪應該派人去認認真真咁跟進、以釋除街坊嘅憂慮呢？嗱、我並唔係靠嚇、三江大橋和速龍除咗方便街坊之外、對國家安全上嘅大戰略亦占據重要地位、若將之與地龍和輕龍近來被踢爆嘅所有事故連串在一起來睇、並唔似係坊間流傳「小事放大」咁簡單。如果公家繼續盡其則膊之能事嘅話、遲早都會鬧出大事來。信不信由你！