歐洲有險情

2018/08/13 08:07:00 網誌分類: 經濟

13 Aug

土耳其爆發金融危機，除了內地A股企穩之外，上週五全球股市齊齊腳軟，特別特係歐洲股市，德國股市跌2%，法國股市跌1.5%，英國跌1%，美股跌幅較細，杜指跌0.8%；標普500指數及納指齊跌0.7%。

土耳其與美國交惡，早前土耳其向俄羅斯購買導彈防禦系統，已經令美國國會非常不滿。2016年土耳其爆發流產政變，有美國傳教士因涉嫌參與策劃判亂被捕，美國總統特朗普要求放人不遂，兩國關係急促惡化。正藉土耳其里拉急跌的關口，特朗普再踩一腳，上週五表示在Twitter上以土耳其里拉大貶為由，加大對土耳其的貿易制裁，土耳其進口美國的鋼材和鋁製品關稅以原來的25%和10%大幅提高一倍至50%和20%。

消息刺激里拉兌美元上週五暴貶，由開市的1美元兌5.56里拉，一度大瀉至6.58里拉，勁跌18.3%，尾市略為反彈，收6.43里拉，仍勁貶15.6%。土耳其總統埃爾多安上週五嘗試向人民派定心丸話「美國人有美元，但土耳其有人民和他們的神！」但土耳其的神似乎都頂不住土耳其里拉的跌勢，今早再跌至6.83，與上週五收市比較，兌美元再跌6.2%，土耳其金融危機並未緩和。

里拉勁貶，亦連累歐元和歐洲股市。歐元亦大插，上週五一日內連續失守1.15、1.14美元兩大關口，最新報1.1394美元，係2015年1月中以來的低位，而反映美元兌6隻主要貨幣匯率的美元指數則大幅走升，最新收96.36，係接近15個月以來最高。

土耳其出現金融危機，點解歐元同股市會傷得特別重呢？主要係歐元區很多成員國都有大量放款給土耳其，其中西班牙就有833億美元、法國有380億美元而意大利也有約170億美元，而土耳其的金融業，有40%的債務是外國人提供的，換句話說，土耳其里拉近兩日兌美元暴貶22.8%，單係對上述三個國家的債務，以土耳其里拉計就上升了315億美元，以土耳其現在的經濟環境，如何還得起突然暴增的債務？相關的銀行還不腳仔軟。最大問題是如今美國由特朗普主導，歐洲若出現危機，佢絕對會睇住歐洲死，不會幫手救，唔踩多一腳逼歐洲打伊朗，已經俾面。

另一場歐債危機可能出現，投資者避險情緒大升，紛紛沽出風際較大的歐股和歐元，轉移到較穩陣的美元，推升美元。

美元上揚，以美元計價的大宗商品，包括石油以至黃金價格都會受壓，亦解釋了美國金融股和原材料股上週五分別跌1.2%和1.4%，係跌得最傷的板塊。

值得留意的是，由於計算美元指數的主要貨幣係歐元，佔了近58%，歐元受到土耳其危機影響，好大機會仍然走弱。另外，美國經濟不斷轉強，上週五美國公佈的7月消費者物價指數上升，且潛在趨勢繼續增強，通脹壓力穩步上升，意味著聯儲局今年再度加兩次息的勢頭已經勢不可擋。

此外，美國上週五更成功拍出其2390億美元的3個月、10年期和30年期的國債，10年期和30年期的利率分別為2.96厘和3.08厘，均高出市場的利率。

種種情況都在推高美國市場利率，令到美元及美元資產更具吸引力。所以預計美元仍會走高，事實上，睇美元指數的走勢分析圖，下一個重大阻力位是102，距目前價位很大的上升空間。美元走升，人民幣以至港元匯價都會受壓，對股市和經濟都不利，不可不防。

陸羽仁

回應 (19)

我要發表

2018/08/14 07:42:11 回覆

2018-08-13

Dow Jones Industrial Average (^DJI)

25,187.70 -125.44 (-0.50%)

前收市價	25,313.14
開市	25,327.19
成交量	219,993,413

今日波幅	25,153.93 - 25,381.39
52 週波幅	21,600.34 - 26,616.71
平均成交量	302,058,095

animal666 2018/08/14 06:52:59 回覆

教育股升得高跌得重
2018年08月14日

　　美國掀起土耳其里拉風暴，由歐洲吹到亞洲，區內股市受影響腳軟，港股自然避唔到，昨日大跌430點，失守28000點大關，連同上周五下跌，兩日已跌去之前連升五日的大部份升幅。

　　美國向土耳其連施奪命招，趁里拉急挫加大制裁力度，令土國外債急速加重，市場擔心佢還唔到錢，連歐洲銀行都中招。在亞洲時段，土耳其里拉一度跌至7.2362兌1美元，比上周五再跌12.5%，再創紀錄新低。

　　亞洲新興市場貨幣兌美元都受累下挫，包括印尼盾同越南盾，印尼央行一度出手干預。另外，俄羅斯盧布兌美元開市跌超過1%，創逾一年新低，俄羅斯股市亦低開近1%。喺風聲鶴唳下，亞洲股市基本上全部冧檔，南韓澳洲股市下插，日股急插近1.9%，可見殺傷力滲透廣泛。

　　中港股市本來弱底，更加係在跌難逃。內地A股早段跌幅同其他市場差唔多，但午後大幅反彈，收市上證只係微跌0.3%，深成指跌0.4%，相對算係跌得少，主要係佢地早就跌到低位，病得多抵抗力都強左啲，加上有阿爺維穩態度，跌幅暫時略少。

　　內房民企再現壓力

　　港股開市無耐就插穿28000點，恒指收報27936點，跌430點；國企指數收報10766點，下滑176點，成交金額835億元。大股騰訊(700) 跌2.4%，收報361元；民企內房股壓力再現，中國恒大(3333) 急挫6%，融創中國(1918) 急跌3.8%，收報25.1元。

　　跌市中受政策衝擊的教育股慘受重創，十大跌幅嘅普通股，有八隻係教育股，跌幅最大的睿見教育(6068) 開市已經急挫，之後跌幅繼續擴大，收市插左近40%，報4.12元；排第二、三位的天立教育(1773) 同宇華教育(6169) 同樣係愈插愈多，幅度都有成37%，其餘好多都跌2、30%，成個板塊大批股份下插，災情都幾悲淒。

　　觸發教育股大屠殺的政策，係上周五國家司法部提出《中華人民共和國民辦教育促進法實施條例(修訂草案)(送審稿)》公開徵求意見的通知，當中最受資本市場關注的是第十二條：新增「實施集團化辦學的，不得通過兼併收購、加盟連鎖、協議控制等方式控制非盈利性民辦學校」條例，咁即係大型教育集團無得靠併購壯大；另外，個別省份提出要減輕中小學生課外活動負擔，要求規範各類有競爭性的課外活動。整體而言，內地關注學生操練風氣，希望糾正歪風，結果就觸發教育板塊出現股災。

　　教育股跌得咁慘，同中央政策收緊操練同教育集團發展直接有關，但背後另一個原因，同內地科網股年頭至今的大調整相似，早前這些板塊當炒，估值愈推愈高。同一時間，由於呢類股票市場受落，上市有價，變成好多公司爭相上市，甚至一如中央所關注，唔少機構以併購發大上市。喺上市公司數目不斷增多，供應逐漸由稀缺變成飽和，甚至有過剩情況，慢慢變成高處不勝寒，投資者卻唔知環境改變左，中央政策好似冷水淋落塊熱鐵之上，即時引起急劇收縮，從長遠而言，可以話好似鍊鋼咁可以提升質素，但短期滋味就好惡頂。

　　冷水淋熱鐵縮左都唔平

　　教育股普遍估值高資產少，好似跌得最勁的睿見教育，未跌前市盈率近50倍，資產只有一元，市帳率有成六倍，市值去到近百億元，即使昨日跌40%，收4.12元，市盈率仲有32倍，市帳率仍然係4.1倍，一啲都唔平。公司喺2017年頭上市，當時反應只係一般，股價以1.7元下限定價，之後反覆炒上，累積升左近三倍。今年其他強勢板塊相繼調整，教育板塊未見影響，相對就顯得更昂貴，結果一舖就插到開巷。

　　喺上落市或調整市，基金傾向保守，對概念股興趣明顯下降，呢個亦係近大半年陸羽仁提醒投資者對高估值股票要小心的原因。由於教育股份供應多估值高，O依家有小小泡沫爆破味道，政策只係點著火藥引，實際係升得高跌得重，所以就算大幅調整，估值都唔算好平，炒反彈就要好小心，想炒都要做快閃黨。

　　陸羽仁

2018/08/14 01:25:22 回覆

獸人bro，港鐵啲工程攪到啲樓沉降，雖然唔係樓價沉，但會唔會都係應驗緊你講咗無十年都有八年嘅『2018 SIGH』？ ${#icons_cat9}$

此外，你又有無膽去 all cash 買沉降單位 (both in price and in footing) 先？ ${#icons_cat2}$

2018/08/14 01:07:16 回覆

講埋啲似是而非嘅嘢… 咁啲工程上下限數據、運作準則、安全指標，要嚟做乜？

係咪 #我話ok就ok啦嘅工作文化？

【沙中線醜聞】陳智思：沉降屬正常盧偉國指不等於一超標就影響安全 ↵

做工程嘅鬼唔知前者講嘅沉降屬正常 - 前題係假如在標準以內。後者講嘅就更加係癈話，要知道一超標就已經係侵蝕入個安全系數。雖然袋鼠唔係專讀土木工程，但同其他工程系計數都大同小異，設計時啲運作數據一般係維持响個線性範圍以內，一超出咗呢個範圍就可能有幾何級數嘅改變，可大可小。

港鐵學院廣告疑寫錯物理公式 ↵

湯博士估計，設計廣告的人不懂數學公式，「純粹當它是圖案處理，所以只複製了一部分，又自行修改了」。他於facebook上載有關廣告圖片補充：「我有時都會同人講，如果你想搵啲物理公式做背景型啲，就要喺書度成條抄，唔好抄半條又抄錯咁醜怪，需知呢個世界唔係個個都好似你咁唔識睇公式，其實睇得明嘅人遠比你想像中多。」

Jacky 2018/08/13 23:08:05 回覆

美圖、招商局、協鑫⋯累死人啦⋯