《戒掉小薯味》

2018/09/02 12:21:18 網誌分類: 職場
02 Sep

愛情偶像劇─《命中註定我愛你》,女主角曾經自嘲:「便利貼女孩的存在,就像便利貼一樣,人人撕下來就用,但未必用過就丟,或許有人會在意記下滿滿事項的紙條最後哪裡去了,反正她完成該做的任務,就識相地消失。」,聽入耳時有點心酸但的確好真實,便利貼女孩係辦公室入面其實全情投入去工作,一收到柯打立即埋頭處理,無好好分清楚緩急輕重,忙碌不斷但奇怪一直係各方面無任何提昇,結果係其他同事和上司眼中只係一個好使好用既永恆黑洞,佢會一手包辦晒大家所有唔願意處理瑣碎又重複既工作。

正正係唔計較,唔反駁,唔想得罪人,其他人只會視你既「好心」為廉價既付出,誰在乎啊!反正無左你,又會有另一位便利貼女孩取代。唔單止新鮮人,有唔少係職場打滾左多年既打工仔經常呻苦,日日勤快主動工作,無功都有勞,點解老闆偏偏好似行過當睇佢唔到,唔肯升佢職?就係只有勞力,勞力並非升職既必需條件,咁點解要揀你呢?又問問自己,有咩過人之處係值得被欣賞?

還處處忍讓上司不公平對待?

喜歡使人唔使本既上司,除左將所有細瑣工作推倒係新人身上,更可能要求佢幫手做與工作無關既私人事情。如果係公事,佢有專業能力但大脾氣,敬而遠之,尚且可以接受並理解點解佢咁大鼻既,係自己未有能力取代到佢時唔開戰係較明智既做法。然而,又無料又偷懶既老油條總係佔大多數。

好多時老闆派job俾老油條跟,佢地總會「借啲意」直接將本身佢做既功夫丟俾下屬,仲叮囑下屬做好之後要先pass俾佢地過目,後來就知道佢地玩弄緊一個點既套路。催促下屬趕好文件,收妥後當老闆行過就係電腦螢幕將文件打開扮作自己認真做緊,過一兩日後其實不過係將下屬既成果直接呈上,而功勞當然歸自己,對下屬隻字不提。當老闆對文件有意見要修改,佢地就將原話轉達俾下屬,講句「加油!」逼人加班完成。呢個agent負責左手黎右手去,坐享其成,的確幾好做。

我地要壓抑住想爆發既情緒,唔需要係佢面前動氣,最令佢對付唔到既一招叫「扮傻」。

既然老闆唔知情,就係老油條行開時,扮傻請教老闆要更改既地方,唔覺意俾佢知道原來幕後代做既係你本人。老闆顧全大局唔會當面拆穿你上司既妙計,有懷疑亦會暗中調查下真相,我地唔需要急於講事實,往後再多幾次同樣既行動既話,佢心水清就遲早會搵你上司詳談詳談一下了,相關既工作佢就會自己pick up番,減小原來根本唔屬於你既工作量,但你有心去試做過新task老闆係會加你分。

拉近和戰友的關係

有唔少新人認為自己堂堂一個神科出身既學生,就係因為新黎新豬肉,啲老海鮮鍾意佔新人便宜咁委屈係office hour做咁多芝麻綠豆既小事,留返俾啲樓層打掃既姨姨做啦!最被人看低既茶水間姨姨,其實先係職場入門級最值得巴結既人。當你仲係未有社會經驗,未有人脈關係既新人,抵諗啲同順手做多少少,不忘同茶水間姨姨閒談,係絕對可以幫你迅速了解部門既運作,同事上司們既小習慣,甚至高層既是非八卦!

有時候早左返公司,主動開定辦公室既燈光、影印機、清一清碎紙機前一晚爆滿左既紙碎,將部門匣既信件分派放好係同事台上等等,小小付出未必有人當面讚賞你,但一定會默默拉近你與同事間既關係。

可能新人會有一種困惑,就係當花多左時間做瑣碎事,擔心出錯既機會會愈多,前輩就乘機插多兩刀批評,完全唔會顧忌到你既面子。事實上就算只做你眼中認為重要既本職,未有熟練既技巧,同樣地會出錯須要接受批評,重要既係批評令你獲得到啲咩幫助。只有逃避,就永遠無資格去管理其他人。

或者站係上司角度,唔喜歡下屬周不時出錯,但係每位老海鮮都曾經做過新人,理解新人較多犯錯,所以更睇重犯錯後既態度,而唔係選擇逃避,以為少同人接觸就唔會有人捉到痛腳。坦誠去認錯,承擔責任去改善,有問題願意向前輩和上司請教,關係融洽會更事半功倍。

咁多位小薯,要成長就必須經歷現在所憎惡既人和事,由受保護既一位小花,去成為有能力肯開放自已個心去觀察職場一切既管理級人員。

回應 (0)
我要發表
user

網誌分類

最新回應

Munna123
Munna123 2020/03/16

If you were facing a problem while installing the windows on your computer. windows 10 download iso 64 bit with crack full version Then you should visit here to know how to install the windows 10 operating system.

383383
383383 2016/06/18

小熊曾經俾男友話得太多,唔識放鬆神經,放假都唔識happy到跳跳扎,我唔想再做隻悲情小熊啊!

===

會不會大部份女生,都比較喜歡鑽牛角尖呢?

命是自己的,上班就話賣命,下班了,為何不開心做回自己?