PACO名人會
PACO名人會
PACO名人會

與鄒凱光劉翁拍住上 彭浩翔做棟篤笑玩爆料

2018/09/10 04:12:22 網誌分類: 生活
10 Sep
          導演彭浩翔與鄒凱光(灘叔)、攝影師Sunny Lau(劉翁)一向老友鬼鬼,一見面就不停吹水兼互窒,近日他們宣佈舉行《翔揸劉灘之潮潮的吹》棟篤笑,並於10月25至26日在灣仔演藝學院開騷。他們稱每人分別獨立做半小時,彭導表示會大爆兩位拍檔鮮為人知的事;灘叔就會教女性分辨壞男人,但劉翁又同佢唱反調,會教大家點做壞男人,真係令人拭目以待!主持:黃柏高 統籌:林永匡

        協力:宋家旋、李佩儀

        攝影:袁東亮、謝民光

        場地:La Serre(觀塘海濱道90號地下1號舖)

         彭浩翔拍戲就叻,做棟篤笑都是第一次,他坦言:「以前細細個睇黃子華嘅棟篤笑,一路都覺得自己應該做,但唔敢做。」直至認識兩位拍檔後,最初他們講笑,打算一齊夾份搞間上市公司先,彭浩翔憶述:「跟住我話好吖,上市都唔錯,點知佢哋後尾話上市之前不如搞咗talk show先。都好嘅,今日搞talk show,聽日就做CEO啦!」在灘叔和劉翁的積極鼓勵下,他想:「一諗到同佢哋一齊做,萬一唔好笑可以賴佢哋,我就舒服晒。」他透露今次每人會獨立talk半個鐘,並笑稱:「事前我哋完全唔夾講咩,唔洗溝通下先?完全唔好,我一講咗出嚟,我驚佢哋會抄我橋!」但在追問之下,他才說:「我主要講佢哋兩個。」

        棟篤笑上演警訊

        而今次棟篤笑搞得成,最大功臣非灘叔莫屬,因為是他推動彭浩翔下決心去做。他笑言:「因為我知道佢想做好耐,而我都做過,我覺得佢都好啱做,但欠動力,咁我咪話不如我哋一齊做,可以減輕啲壓力。我仲話:『你再諗下喎,黃子華唔做咯喎!你仲唔做?』呢下反而令佢覺得係時候要做。」灘叔更自爆今次會講兩性這主題,他坦言:「因為我唯一熟嘅係女人,但我覺得自己對女人好差,基本上我好希望女人知道一個壞男人係點樣,等佢哋可以早啲防範。」此言一出,即被劉翁揶揄是警訊。

        吹水吹到上台

        至於劉翁點解會成為今次棟篤笑的一員,他憶述:「我成日同彭導一齊游水,游完瞓喺泳池邊會講好多嘢。有一日我諗會唔會可以將講嘅嘢呈現喺舞台上呢?有灘叔嘅帶領,真係成事!」當劉翁構思楝篤笑的內容時,他直言好想將過往二十幾年的人生經歷跟大家分享,加上現時的社會好多怨氣,他續說:「我哋三個嘅性格就係即使遇到一件事有幾慘、幾唔開心都好,我哋都係搵個位笑咗先。」今次他想教大家點樣做一個成功的壞男人,他續說:「做壞男人未必係壞事嚟,當你知道壞男人應該點做嘅時候,其實身邊嘅人係會防你。」有咩好處到時就等劉翁再加以解釋啦!

        黃柏高
■(右起)劉翁、鄒凱光和彭浩翔將於10月底舉行兩場棟篤笑。
 ■(右起)劉翁、鄒凱光和彭浩翔將於10月底舉行兩場棟篤笑。 
■(右起)鄒凱光、彭浩翔和劉翁一齊做棟篤笑會各講半個鐘,話題各有不同。
 ■(右起)鄒凱光、彭浩翔和劉翁一齊做棟篤笑會各講半個鐘,話題各有不同。 
■彭浩翔拍攝電影《春嬌救志明》時,曾與楊千嬅和余文樂一齊對戲。
 ■彭浩翔拍攝電影《春嬌救志明》時,曾與楊千嬅和余文樂一齊對戲。  
■攝影師劉翁早前為劉浩龍的寫真操刀。
 ■攝影師劉翁早前為劉浩龍的寫真操刀。 
回應 (0)
我要發表
user