入行20年首度在港開個唱 孫耀威揚言睇到觀眾嘩嘩叫
2018/09/24 18:04:51 網誌分類: 生活
Eric表示大學時因參加了台灣舉辦的歌唱比賽，結果被當地唱片公司賞識簽約成為歌手，當時他在兩岸三地人氣高企，但換來的代價是在香港發展的時間不多。他慨歎說：「當時我好想返香港做嘢，但公司成日捉我去日本、台灣工作。」孫耀威今年轉了新唱片公司，老闆問他想做甚麼時，他二話不說想搞騷，「其實騷嘅Rundown一直喺我腦入面，之前我無聊到喺電腦整咗個Power Point，再加啲相落去，好似人哋見工啲proposal咁，所以再唔開就似便秘冇得痾一樣。」
坐過山車
他表示演唱會會唱好多舊歌，做到原汁原味的同時又會加入一些新元素，希望大家感受到孫耀威現有的音樂感覺。至於舞台設計方面，他說：「演唱會名稱叫Hysteric life，即係好歇斯底里嘅一個life，喺視覺上想有一啲勁爆嘅效果，觀眾會睇到『嘩』一聲再問發生咩事，跟住突然間會大笑、被嚇親或好感動，而我好想喺演唱會做番真正嘅自己，好瘋狂、好貪玩又好認真。我希望觀眾同我一齊好似坐過山車咁，情緒一路係上上落落。」
日夜狂練
為了演唱會，他首先要操fit自己，「好多人問我六嚿腹肌練成點？係咪要騷肌呀？我就話我哋唔可以咁膚淺，其實腹肌對我哋唱歌用丹田好有用，當然如果大家嗌得大聲咪騷囉！」今次他還很積極去練滾軸溜冰，他解釋：「因為我細個時好鍾意呢項運動，記得喺台灣首個騷出場時就係踩住roller跳溜冰舞，如果唔係踩住對roller鞋，我諗我會一直腳震，所以我想喺香港Show重現呢一幕。」現時他每日要健身三小時，夜晚再去維園練習滾軸溜冰，因為他已二十年冇踩過。
先甜後苦
在飲食方面，他笑言：「如果講精神上嘅充實，就一定係亂食嘢，但要令身體充實，就乜都唔可以食。」他稱現時是建肌階段，所以要食多啲，例如牛扒之類，有時油膩的炸雞髀他都照食；但每日六點後，碳水化合物、油炸食物和甜品要全部戒掉。他續稱完成建肌期到減脂期先最慘，「到時要食白烚雞肉，鹽都唔准落多粒，汽水就更加唔使諗。」幸好太太陳美詩會弄杯超級有energy的飲品給他，「裏面有藜麥、氨基酸、鈣同各種維他命，飲一杯可以頂肚餓同有能量，太太話係super drink要飲晒佢，但就好難飲。」他笑言會盡力而為做到最好。
主持：黃柏高 統籌：林永匡
協力：宋家旋、李佩儀
攝影：袁東亮、謝民光
化妝：江中平@江中平化妝室
髮型：Lobo@ hiar corner
場地：享福（灣仔軒尼詩道33號重悅酒店地庫LG2）
黃柏高
■孫耀威入行20年，今年11月首度在港開兩場個唱。
■演唱會因反應好加開一場，孫耀威感興奮。
■孫耀威初出道時，常被外界將他跟「小旋風」林志穎（左）比較。
■Eric晚上到維園練滾軸溜冰，練完基本動作再練花式。
Find the best Custom Nursing Writing Services Provider for all your Nursing Research Paper Services and Nursing Essay Writing Services?
https://www.meldaresearch.com/nursing-writing-services/