9月尾見頂回落展開屠牛之旅

基金季結日獲利沽壓湧現

假期前後例牌大龍鳳.恒指沖高回落收窄升幅呈陰燭. 受制於27800~28000

28/9 周五恒指收報27788, 升72點(最多上升212點, 一度下跌43點)

國指收報11017, 升79點(最多上升139點, 一度下跌35點), 國指大幅跑贏恒指

港股今日沖高受制於昨日高位27928後跳水, 可能係受基金季結影響, 基金趁反彈沽貨鎖定利潤來埋數, 目前匯債形勢皆不妙, 美元急彈.債息高企.港美加息以及樓價下跌全面利淡, 港股開市沖高見即市高位27928後急跌, 臨收市突然止跌回升, 收市U盤黑箱作業, 伸多一腳上去擴大升幅, 不過仍收陰燭, U盤時段成交突然急增, 唔知係掃貨抑或走鬼,

今日收27788周線雖收跌(低過上周五的27953), 但收27788卻剛好高過周一開市位27783(大鱷畫圖), 令本星期周線收陽, 引到技術派一致唱好做好反而要小心大鱷挾好友, 港股9月埋單收針, 死唔去, 代表9月中低見26219淡友食胡買盤進場, 但彈到上28031淡友或會再部署下一輪殺跌, 不要忘記而家係熊市

今日港股延續昨日的沽壓, 不過大鱷又玩托沽, 溫水煮蛙式派貨, 繼續即市調整, 但地產.內房股就破位而下, 表現明顯跑輸大市, 油價破位而上, 資金換馬轉炒油股, 港股插完就拗腰小幅高收, 恒指呈陰燭, 但咬住27700來養牛熊, 結果貼價牛熊齊齊入局, 現時肥熊聚集在28000樓上, 肥牛則在27000~27500, 大鱷已經兩日冇開餐, 按照慣性走勢下周必定會出手

月尾港股反彈皆因美元回落, 不過現時匯市形勢有變, 美元彈高港股理應回落, 只係大鱷夾硬托住來結算, 今日港股雖然收升, 但上次港股彈得好地地但當美元一急彈港股即刻反艇, 持好倉/牛過夜要承受的風險就係匯市的變化，因為意大利財政預算案拖低歐元, 美國加息及經濟數據強勁推動美元守住94再度重上95, 港匯及人民幣亦轉弱, 不過日圓弱雞跌至今年新低, 游資熱炒, 日股創27年新高,

唔好見近日港股反彈就以為會單邊向上, 其實下周港股上落大鱷都有得開餐, 今日收27788, 向上可攻上60天線, 如果外圍回吐或匯債利淡, 落去食27000~27500肥牛亦得, 如收市跌穿20天線27300不妙, 代表今次反彈浪或已結束, 又要落去尋底, 向26219進發

大鱷操控大市如入無人之境, 連收市水平都在掌握之中, 畫圖能力真係出神入化, 港股後市隱憂係美元及美國10年期債息仍高企, 港匯及人民幣再度轉弱壓住港股, 內房.地產股及QQ沽壓未除亦會拖低大市, 以往美債息上企3%港股必死, 但卻被港股結算所扭曲, 夾硬托住, 結算完下周就會見真章

過去3日港股底部上移(27589/27638/27672), 大鱷守住27500, 吸引大量牛牛聚集在27000~27500, 往後如想上破60天線及28000整數大位必定要出大陽燭才能逼退淡友, 同樣, 想落去屠牛亦要出大陰燭才能逼到好友投降, 程式沽盤湧現就會加速跌勢, 以月波幅計, 10月就要測試10及20天線的支持力(27300~27550), 向上亦要再攻28000, 不過如果10月插穿前底26219創新低來擴大月波幅, 想再上28000機會就更渺茫, 中港股市通常係同步見底頂, 只要上証企2700樓上, AH股牽引下, 就可穩住港股

估計下周會有大龍鳳上演, 因為今個星期恒指只得607點超細周波幅, 極為罕見, 創半年以來最細周波幅, 成交或波幅突然急降都係大龍鳳先兆, 大鱷可能會趁下周內地休市才發癲, 根據大鱷的習性, 下周會有閒閒地千點的大波幅, 下周二復市係破日呀!

下個星期阿爺休市, 港股自由行, 過去幾年黃金周港股的慣性走勢係開局彈高, 全周埋單都係收升, 如果歷史重演, 即喺下周五(5/10)會收高過今日(28/9)的收市位27788, 但亦有可能打破慣性走勢低開低收, 全周收跌(5/10收低過27788), 因為今年不同過去幾年, 如今係熊市, 而且美國持續加息, 香港12年以來首度加息, 正式展開加息週期, 變天喇! 貿易戰亦愈演愈烈, 狂人日日發癲, 新興市場股匯債危機, 都係利淡,

~~~~~~~~~~~~~~~~~~~~~~~~~~~~~~~~~

溫水煮蛙式派貨

上証2700 = 恒指27000, 自從上証收復2700就推動恒指一路沖向28000, 因為過去9個月恒指月波幅多數係1500~2200點, 如果大鱷咬住27000~27500唔放, 1500~2200點月波幅就要再上28000, 但28300樓上熊養極都唔肥, 所以大鱷遲遲唔殺上去, 相反, 大鱷一直扮守得住27500就引左唔少牛入局, 27000~27500牛愈養愈肥, 加上全城看好就要逆向思維, 要慎防大鱷落山屠牛,

10月開新局如果連27000都失守, 向下擴大10月的波幅, 就要下試26800.26500, 甚至再試底26219做多隻腳, 今次熊市有分析師說會見23000.22000, 真係嚇屎人, 希望明年才見啦! 因為過去幾年最大年波幅約8300點, 如果第四季落到25170已平了去年的年波幅, 如插穿就超標喇!

我成日話港股俾大鱷操控, 明明升得好地地, 翌日都可變天, 過夜係高危, 過長周末就更加危, 不要忘記上周連升4天但本周一(24/9)開局恒指突然大插454點/國指亦插199點, 大鱷乜都做得出咖! 雖然近日港股反覆上升企10及20天線之上, 但大鱷唔會咁順灘俾股民捉到路, 連基金界高手黃國英都對港股心淡, 石石亦早已死心離場, 散戶.基金成手蟹貨, 俾大鱷蠶食了老本, 蝕到喊

一如早前所說，9月彈到上28031月波幅有1812點夠皮喇! 所以今日冇再上28000, 大鱷在27000~28000困局中游走殺貼價牛熊, 耐不耐爆邊震走遠牛熊, 回顧12/9見底26219後作出反彈, 兩次恒指沖頂回落分別回吐541/691點, 但結算前夕(26/9)高見28031後碌落27589, 到目前為止只係嘔左442點, 跌幅少過前兩次調整吐541/691點, 即係未跌夠, 仍有下跌空間

按照前兩次沖頂回落的幅度: 28031短頂 - 541~691點 = 27490~27340, 如插穿27300, 即係跌幅多過前兩次回吐, 就代表港股可能反彈完, 要落去尋底, 13/9有上升裂口26469~26648未回補, 小心大鱷殺完淡友殺好友

中港股市通常係同步見底頂, 今日上証高見2821(前頂在2827), QQ亦早已見頂回落, 所以今日港股亦跟隨上証及QQ冇得創新高, 下周阿爺休市, 冇左內地股市制肘, 失去A股的指標, 大鱷想抽升殺跌來開餐都得, 10月開局不進則退, 非生即死

10月港股開局係內地國慶黃金周長假期(1~5/10)

1/10公佈內地PMI經濟數據, 受貿易戰拖累, 數據唔慌好

10月份傳統上是股災高危月

行政長官林鄭月娥星期三(10月10日)發表《施政報告》

息魔來襲.匯市起風雲.金融危機重臨.10月傳統股災月港股出師不利.一開即插

2/10周二收市~美元急彈.港匯轉弱.人幣下跌.港股暴跌662點收27126.大舉屠牛.形勢不妙

當人人以為10月開局會伸一腳上去屠熊, 然後才落去屠牛, 結果係低開低走, 一跌到尾, 唔俾機會好友逃生, 大舉屠牛, 港股暴跌走勢超樣衰, 觸發止蝕盤產生骨牌效應, 愈跌愈急, 跌市元兇係新興市場貨幣危機, 內地最新公佈的官方及財新製造業PMI均遜預期, 數據疲弱, 反映貿易戰拖累經濟下行壓力加劇, 中美關係惡化, 人民幣下跌, 加上港股已累積龐大升幅, 觸發拋售壓力, 沽空比率急升至17.47%, 

美墨加達成貿易協議, 狂人得勢不饒人, 形勢不利中國, 利淡消息湧現, 大鱷借勢營造10月的恒指波幅, 趁匯市波動以及內地休市, 冇左A股撐, 港股通關閉, 大市成交細操控就更容易, 所以就乘機隊港股落山, 由於未做夠月波幅, 今日低位27073不會是10月的底部, 明日要落山繼續擴大月波幅, 27000.26800.26500.26300.26219....

過去幾次港股反彈以今次幅度最大, 高達1812點, 有分析指熊二彈完就會再瀉, 如果今次真係熊二大反彈結束, 即係會再下試前底26219, QQ係港股升跌火車頭, 要留意QQ會否插穿前底$305.2拉住港股落山,

港股9月收針, 技術上利好10月, 可惜10月係傳統股災月, 加上剛好11月係美國中期選舉, 狂人勢必繼續打壓中國, 其實阿爺已陸續推出穩經濟及撐股市的措施, 甚至會在國慶期間降準放水來救市, 但以往阿爺出招中港股市都係彈散, 有分析指熊市好難連升兩個月, 國指9月收升報11017, 如國指彈完, 亦會拖低恒指

9月尾大鱷畫靚幅港股走勢圖, 向上推進來屠熊及結算, 當人人向上望就突然變臉向下殺牛, 繼續玩好淡通殺的死亡遊戲, 上周大鱷咬住27700來養牛熊, 結果27000~27500有近4000張肥牛, 但28000關口只得約1400張熊, 要破頂才能開餐, 結算後大鱷唔想冒風險夾硬推升, 如果今日殺上28000屠熊亦會放生肥牛, 得不償失, 所以就大插插落去殺肥牛, 那麼唔使破頂都有得開大餐, 跟住貼價牛熊又會再湧入, 大鱷如意算盤打得好響

新興市場貨幣再瀉, 匯市郁.好友縮，加上剛公佈的內地9月PMI差劣，恒指一舉失守10及20天線，不問價沽貨走鬼，在沒有北水的日子成交額仍高達$910億, 可想而知沽壓有多沉重, 好友不敵敗退

今日港股收大陰燭, 呢種見頂轉勢向下的形態通常不會只得一棍, 冇咁快見底, 大跌市通常都隊五六棍才彈, 27000有肥牛, 大量BB牛湧入26800~27000區間博反彈, 真係沙膽, 如失27000, 500點一級都要見26500啦!

大鱷9月尾推高結算任務完成, 食飽肥熊就轉口味落去食牛扒, 好淡通殺係大鱷的習性, 要向26800關鍵大位進發, 13/9有上升裂口26469~26648未回補是後患, 上次回吐落到裂口頂26648就拗腰重上27000皆因當時要推高部署結算位, 但如今結算完, 就失去撐市誘因, 回補裂口機會大, 不過現時26800樓下牛唔夠肥, 通常會扮守得住來養牛, 磨多一陣才會插穿, 要向26500.26219.26000進發,

3/10周三收27091, V彈僅跌35點, 養牛引好友

中美貿易關係惡化 + 內地經濟增長放緩 + 意大利債務危機 + 新興市場貨幣危機 + 美元及債息急升 ==> 港股反艇

現貨雖企27000樓上, 但期指已率先失守27000, 形勢進一步惡化, 向26500.26219.26000.....進發, 今日港股成交只得$674億, 創今年第三低, 成交急降, 大龍鳳先兆, 明日冇眼睇, 新興市場股匯債立立亂, 印度10年期債息彈升6個基點, 印度盧比跌勢未止, 續創記錄新低

今日港股V彈, 開市位26840已是全日低位, 扮守得住26800關鍵大位係引好友入局, 因為月波幅遠遠未達標, 即係未見底, 今日開市一插即彈上27000樓上收, 目的係誤導BB牛牛好倉入局, 26800樓下的貼價老牛以為仲有得彈, 亦繼續坐倉不逃, 大鱷奸計得逞, 正部署日後的殺戮,

後市不妙, 牛牛命危, 因為港股見頂回落, 上兩次都插了1800~2400點, 如今只係跌了約1200點, 仍有下跌空間, 大方向要向前底26219進發, 希望不要太快破底, 因為而家才是月初第一個星期

未來兩日最好喺秒殺肥牛即彈，收市守住26500，9月中最低收市位喺26422及26345，下周港股究竟係潛水抑或死貓彈就要睇內地股市表現