原材料股受壓

2018/10/10 09:11:17 網誌分類: 經濟

10 Oct

美股週二下跌。美國國債息週二朝早抽高，美國10年期及30年期國債息分別升上3.25厘及3.43厘的7年高位，令到股市受壓，杜指一度下跌162點，之後跌幅隨著國債息率回順而收窄，收市跌56點，收報26430點，跌幅0.2%；標普500指數微跌0.1%；納指有FANG等科技大股反彈頂住，逆市微升2點。

上週五美國公布的9月非農新增職位雖然遠低過市場預期，但失業率後49年以來最低，平均時薪增長亦後多年以來最快。美國經濟靚仔，通脹預期升溫，而聯儲局主席鮑威爾又話美國短期利率起碼要升到「中性」水平，仍有很大的加息空間。據聯儲局公開的議息紀要，官員認為起碼要達到3.4厘，才會停止加息，較目前2厘至2.25厘的水平，聯儲局還要加息4到5次息。美國國債息率與美國基準利率成正比關係，債息更係基準利率的先行指標，原因係大戶或者基金經理預期聯儲局加息，就會搶先沽出美國國債（債券息率上升，債價就會下跌），推高國債債息。美國10年期國債息7天內上升了20基點。

除了加息預期之外，國債供應大增亦會推低債價，推升債息。美國財政部將於週三拍賣360億美元的3年期國債和230億美元的10年期國債；而週四則會拍賣150億美元30年期國債，債券供應將會大增，債價不跌、債息不升才怪。

美國政府大幅減稅和擴大公共支出，唯有不停發債吸水。美國財政部在其8月份的季度重新融資聲明中表示，在未來的3個月，將會透過2、3和5年短期國債拍賣，增加10億美元的資金。目前，美國國家債務已達到21.6萬億美元，估計單係2018年，已增加了1.1萬億美元。

昨日拖累美股的主要係原材料板塊。標普500指數原材料板塊大跌3.4%，係4月2日以來最低，離52週新低不足1%。美國發動全球貿易戰，鋼鋁等金屬原料更係主要被制裁的商品。原材料股昨日再大插，主要係塗料、玻璃、玻璃纖維及化學品國際供應商PPG工業集團（PPG Industries）警告投資者，因受到需求下跌和原料價格下跌的影響，季度盈利將不及預期。由於PPG一向被視為全球經濟健康及發展方向的寒暑表，令到投資者擔心全球經濟增長前景，賣出材料股，PPG昨日大插超過10%，工業股亦受累，工業板塊跌1.5%，係表現第二差的股類。其中杜邦化工大跌3.8%，Caterpillar跌2.5%，係表現最差的兩隻杜指成份股。

陸羽仁

回應 (24)

我要發表

2018/10/11 07:27:56 回覆

插啦插啦…

SIGH...

2018/10/11 07:16:15 回覆

2018-10-10

Dow Jones Industrial Average (^DJI)

25,598.74 -831.83 (-3.15%)

前收市價	26,430.57
開市	26,441.73
成交量	438,198,279

今日波幅	25,593.65 - 26,441.73
52 週波幅	22,821.13 - 26,951.81
平均成交量	262,964,000

animal666 2018/10/11 06:43:24 回覆

《施政報告》見光地產股即跌
2018年10月11日

　　特首林鄭發表《施政報告》，有200幾項新措施，但股市似乎唔係太興奮，指數上午反彈，臨尾升幅收窄，只係彈咗20點。

　　《施政報告》出籠，商界同中產對福利嘅關注，唔及對房策咁高。唔好以為中產自己有樓唔怕高樓價，我識得好多中產朋友高級專業人士，都等緊買樓畀仔女，等到媽媽聲，等唔到啦，自己本來一家住半山，最後只能到荃灣買樓畀仔女，唔買仲衰，O依家要去屯門買樓啦！

　　外界牛咁眼睇特首林鄭月娥有無重招對付樓市，答案係無乜，有啲雷聲大、雨點小嘅感覺。報告最大搞作係計劃喺東大嶼山填海1700公頃，呢個方案之前董建華嘅團結基金打晒開口牌，所以有水都俾董伯伯抽乾。外界估計有料到嘅公私營合作，即係用發展商農地合作起樓，唔知林鄭係咪驚人話佢官商勾結，所以避重就輕，着墨唔多。

　　房策有啲唔湯唔水

　　1997年的《施政報告》，阿董推出八萬五大增供應大計，搞到樓市大跌，地產商苦不堪言。今次提出嘅措施都係長遠大計劃，短期無加辣，又無乜大增推地，甚至仲話增加公營房屋減少私樓，公營房屋加到七成。從呢個角度講，今次報告冇重招出台，甚至可以話係對樓市友善，可以當冇消息係好消息。之不過，地產股喺之前大市回落時無乜跌，似乎係希望有刺激，O依家公私營合作睇唔到有明顯進展，市場有啲失望，對地產股焦點又落番喺利率之上。

　　地產股好似新地(016) 逆市跌1%，收報108.4元；會德豐(020) 跌2.1%，收報44.1元；恒地(012) 跌1.8%，報38.2元，創52周新低；長實集團(1113) 農地唔多本來期望唔大，只跌0.8%，報56.15元。房策冇乜亮點，既唔敢打擊樓市，又唔敢同發展商大力合作，有啲唔湯唔水，加埋冇乜其他好大力提振經濟嘅方案，只有派福利政策，對股市整體而言係中性偏淡。

　　恒指昨日終止六連跌，但走勢唔算靚仔。恒指早段曾漲326點，但美國總統特朗普再威脅北京，若然中國採取報復措施，華府將對另外2670億美元中國進口商品加徵關稅，又話美國盤算列中國為匯率操縱國。消息令A股反覆走軟，其中滬指僅升4點，以2700關樓上收市；港股隨A股步伐升幅收窄，最後力守26000點關，收報26193點，微升20點；國指收報10442點，升22點，市場成交862億元。

　　基建股見近年高位

　　股王騰訊(700) 走勢繼續嚇人，跌穿300元大關後反覆尋底，續創一年低，低見285.6元，收跌2.5%，報286.4元，拖低恒指61點，成交96.83億元，單日市值蒸發逾700億元。騰訊由今年最高位475.72元計，跌幅達40%，市值蒸發逾1.8萬億元。若果唔係中移動(941) 見逾八個月高位，收升3%，報80.75元，個市隨時七連跌。

　　另外，國務院辦公廳印發《推進運輸結構調整三年行動計劃(2018-2020年)》，增加鐵路運輸量，鐵路基建股靠穩，中鐵建(1186) 創14個月高位，收升3.5%，報10.76元；中鐵(390) 高見8.01元，創逾三年高，收升1.4%，報7.96元。

　　大市以外，市場熱話之一係呢排恒大健康(708) 入股賈躍亭嘅電動車公司Faraday Future(FF，法拉第未來)，並成為大股東，雙方最近出現糾紛，要對簿公堂，搞到恒大健康股價急跌。綜合不同消息來源，似乎O依家恒大老闆許家印同賈躍亭都想掌控公司管理權，FF全球目前由賈躍亭掌控，FF中國由恒大掌控，但FF花錢速度非常驚人。恒大健康公告話，賈躍亭提出恒大的八億美元基本用完，要求恒大再提前支付七億美元。恒大為最大限度支持合資公司發展，同賈躍亭簽訂補充協定，同意喺滿足支付條件下，提前支付七億美元。本來，FF已走出最困難階段，以恒大作風咁強勢，自然要加強管控，對中國業務進行薪酬改革同人員調整。

　　賈躍亭O依家反面，多少有啲鋌而走險味道，原因係唔願意失去對FF控制權。O依家勝負關鍵係賈躍亭能否引入新投資者，將恒大股份攤薄，甚至踢出局，否則又要面對僵持之局，呢個係資本市場上，有錢有辦法、無錢無辦法的局面。

　　陸羽仁

2018/10/11 06:38:52 回覆

睇錯市添，今次真係只可以坐了

2018/10/11 04:44:22 回覆

@大戶終結者 ( 等人齊 )...

大戶兄，勿慌。召喚跟好友大將軍上黎 ${#iconb_22}$