特市難炒 寧信阿爺
2018/11/05 04:13:15 網誌分類: 經濟
總統講法與貿易代表有出入
美股連升三日後，上周五杜指收跌109點，跌幅0.43%，報25270點；標普500指數收跌0.63%，報2723點；納斯達克指數收跌1.04%，報7356點。期間杜指曾升過198點，高位觸及25578點，之後曾急跌301點，回落至低位25078點，全日高、低位點數波幅達到500點，反映美股去到高位出現阻力。
一周計，標普和納指創5月份以來最大單周升幅，杜指創6月份以來最大單周升幅。上周標普500指數累計上升2.4%，杜指累升2.35%，納指累升2.65%。
特朗普認定個市要升先至有利中期選舉，所以係選前佢不斷出招，仲扮埋財經演員，先係公開再向聯儲局施壓，直指局方做法保守。同時明言共和黨勝選有利股市。除了財演外，特朗普仲做埋莊家，自導自演同中國準備破冰的好戲。佢係選前同國家主席習近平通電話，之後放出好消息。佢係推特（Twitter）上爆料說，他和國家主席習近平有一個又長又好的對話，談及的內容很多，而重點在貿易方面，已安排了與習主席在阿根廷的G20峰會上會面。特朗普連日猛吹暖風，公言談判有好大進展，指中國好想達成協議，仲話美國會拿到好協議。不過，白宮經濟顧問庫德洛更否認了官員獲指示要起草對華貿易方案的報道，令人感覺似乎特朗普想有好消息多過大陸。
上周五大市炒「破冰」通電話，推動人民幣飆升，恒指裂口高開564點報25980，隨即愈升愈有，重上26000關，之後特朗普要求美國主要官員開始起草可能和潛在協議，為不斷升級的貿易摩擦中傳出緩和信號，消息進一步提振市場投資信心，恒指爆上高位收市，造26486點，漲1070點或4.2%，為10年最大點數升幅，全周累升1768點，中止五周連跌之走勢，是逾3年最大單一星期升幅；國企指數早段稍為落後，下午出現追升，收造10687，彈408點或4%。成交額增至1703億元，創5個月最高。此外，逾180億元大幅資金流入北上，創歷史新高。
股王騰訊（700）再成大市急漲功臣，股價升穿300元大關，最高見過303.8元，股價收升9.29%，報303.6元，為7年最大升幅，成交近200億，居成交榜榜首，單隻已貢獻恒指214點，三日累升51.4元，其市值迫近2.9萬億元。人民幣急彈，對匯價敏感的航空及紙業股跑贏大市。東航（670）、南航（1055）、國航（753）均升近12%，收報7.32元。呢陣「特朗普亢奮」都認真犀利 ！
薪酬升幅勁加息走唔甩
特朗普選戰現心理戰玩得出神入化，完全佔咗主動，令人不能不佩服佢對選民心理捕捉的準確。佢最先對中國採取強硬態度，成功建立為國民爭取利益的形象。臨近選舉，佢見到美股因為經濟不明朗下滑，開始將焦點轉向非法移民，講到非法入境者若然掟石，隨時會開槍咁，佢呢種強硬路線支持者相當受落。相反，係貿易問題上特朗普見大陸採取堅壁清野，既不大力反擊又不明顯讓步的策略，覺得硬撼落去無着數，於是臨選前改吹和風，借勢谷高股市，呢著變招不能不使人覺得佢真係選戰高手。兩年前大選佢爆冷勝出，好多人覺得係黑天鵝事件，但呢次睇佢中期選舉操盤，四出攻掠又真係畀佢砌到多少成果。不過，股民就俾佢玩到頭擰擰。
特朗普係貿易戰轉玩和緩，表現出佢比中國仲想達成協議，但之後會唔會一帆風順都好難估。正路講，中期選舉已完，特朗普打中國牌的誘因應該減低，就算要玩可能都要等明年中後期部署連任時先玩過，但亦唔排除佢見到大陸唔屈服，美國股市10又跌跌吓，於是向中國示好，過咗骨之後又再玩過。
特朗普開大抑或開細唔易估，好明顯如果月底習特會有成果，咁對全球股市同經濟都有少咗一大不明朗因素，但有兩點不能不留意，最直接係特朗普反來覆去，好多時都估佢唔到，跟佢炒好易左一把、右一把。再者係現時美國經濟表現仍算強勁，看來美息仲未升完，當貿易問題沉靜，可能好快又到息率去向惹起關注。
最新公佈的美國10月非農就業人口大增25萬人，顯著高於市場預期的20萬人，上月為11.8萬人；失業率持平在3.7%，符合預期；平均時薪年比增幅達3.1%，升破3%，是2009年4月來最大。由於數字咁強勁，市場估計年底前美國再加息應該走唔甩。對美債的影響值得留意。
中央頻向民企派定心丸
特市難炒，一個應對方法係學阿爺。由於特朗普策略五時花、六時變，北京不能不同佢交手，但又不能全部信佢，做法係劃定自己底線，先至埋枱傾。按照北京現時想法，無論貿易戰結果如何，大陸產業都會向轉型升級發展，如果貿易戰談得成，中國市場會開放多啲，咁唔係壞事，若然傾唔成，咁就打甩門牙和血吞，低頭拚多幾年。從投資角度睇，中央的政策執行可見性同穩定性高，用內地政策作為研判未來經濟發展的「湯底」就會可靠啲。中央近日頻頻向民企派定心丸，又陸續出招穩定微小企。人民銀行聯同北京銀保監局、北京市發改委及證監局等數個部門，日前就再推出多項措施，增強區內金融機構服務小微企業能力，引導更多資金用於支持民營及小微企業發展，包括將設立70億元人民幣的再貼現額度專項支持這些企業，加上向北資金流向增加和低估值，A股相關或內資股就相對穩陣。
迪士尼「10K WEEKEND」 今年加入綠色元素
迪士尼上星期舉行了一連兩年的「10K WEEKEND」，星期日還請了食物及衛生福利局局長陳肇始教授擔任主禮嘉賓，陳教授身穿粉紅色外套，搶眼兼活力十足。大清早還見到樂園行政總裁劉永基（SAM）和支持機構友邦企業業務、策略及財富管理總經理謝佩蘭。
今年是第三年進行，聽阿SAM說，今年參加賽事的人數，由上屆的一萬人增至萬三人，而且有一成多是來自境外。今年的活動還與「綠色地球」合作，加入了綠色元素，當中包括使用可重用水杯，推動綠色盛事團隊的人數也大增了七成。
名人領袖盃不乏醫學界人士
今年主辦單位同樣舉行了三公里的名人領袖盃，落場人士中不乏醫學界人士，包括醫管局行政總裁梁柏然和傳訊大員葉根銓。另外機管局財務執行總監羅永聰，不要以為幾位平時公務繁忙，沒有時間運動，跑起來順利完成賽事之餘，仲可以沿途不斷同打氣的英雄人物拍照。
陸羽仁
回應 (0)
我要發表