《是咁的，法官閣下》題材貼地 黃智賢讚王君馨可愛 望再合作
2018/11/12 04:12:35 網誌分類: 生活
由黃智賢（Ben）、王君馨（Grace）和王梓軒主演的TVB劇集《是咁的，法官閣下》，以網絡潮語「是咁的」入題，另亦有別過往的律政劇，透過Ben和死敵關禮傑這對冤家律師，帶領觀眾游走多個改編自近年真實案件的法庭故事，題材夠貼地，再加兩男與Grace的三角關係。Ben稱首與王君馨合作覺得對方可愛，Grace就藉着拍劇請教兩位對手的夫妻相處之道；而王梓軒就飾演新紮律師，他坦言角色是度身訂造，有時都真假難分，故演出時特別迫真。
為了劇集，Ben事前要去法庭聽審，到正式拍攝時因有律師監場，令他了解到上庭的規矩和程序，他笑言變了小專家，「我鍾意拍呢類劇種，一戴咗假髮、着咗件律師袍就好有使命感。」今次他與關禮傑有很多對手戲，他續稱：「大家由大學開始認識，一齊讀law，一齊做大狀，但好冤家路窄，去到邊佢都喺我附近，其實感情好深厚，但我唔想承認同佢好friend，加上有Grace，佢咁多女人唔鍾意係鍾意佢，好篤眼篤鼻，雖則我同佢搞緊離婚，但我都希望佢搵到個好歸屬。」他又大讚Grace拍攝時非常投入，「第一次合作，佢好可愛，希望下年再有機會一齊拍劇。」
與Ben合作舒服
劇中Grace飾演一個在外地出世然後回到香港生活的女子，性格好獨立，事業又好，是一位幾出色的女主播，還嫁到大律師。但故事一開始，就講黃智賢要跟她分居，她坦言：「拍呢套劇時我啱啱結完婚，（Ben哥咁對你係咪令你質疑自己？）我直頭質疑婚姻，所以返到屋企攬住老公話：『好在你唔係咁咋，如果唔係我都唔知點算！』」她覺得一個女人感情有缺失就好似一張枱冇咗隻腳咁會成張翻倒，所以拍劇時遇到有關婚姻的問題，她會即時請教Ben哥和傑哥點解決。她亦大讚今次與Ben哥合作得好舒服，「佢係一個好識得畀空間對手嘅演員，佢會畀唔同嘅提議你，如果你試呢個方法會有咁嘅效果，你自己揀啦！佢會幫你分析，令你好健康咁成長。」
演出真假難分
由於今次劇中角色大多是為演員度身訂造，令王梓軒非常欣賞：「Ben哥飾演嘅范大狀入面有好多佢嘅特質，你一睇到Ben哥個樣，或者佢講嘢某一啲互動你就覺得入型入格，Grace一樣，我都一樣。」原來王梓軒飾演的新紮律師董大狀，與現實中的他同樣熱愛音樂，他笑言：「但劇中爸爸想我從商，咁點解我要做律師呢？因為我唔想從商，但我要塞住佢把口就去讀法律，我唔敢講個角色100%似我，但有少少似我嘅心路歷程。因為喺我嘅娛樂事業上，大家認識我係通過一啲新聞，但有啲新聞要取巧吸眼球，有時我覺得係講笑唔使交代咁多，但累積得多人哋會對你有誤會，今次編審反而用劇本借咗個角色幫我解釋咗好多嘢，真係好感激！亦因為咁，佢將一啲可以觸動我嘅嘢擺咗入去，令我演出時好迫真，因為真同假都分唔到。」
主持：黃柏高 統籌：林永匡 協力：李佩儀
攝影：袁東亮、謝民光 場地：重慶劉一手火鍋店
■（左起）黃智賢、王君馨和王梓軒大談新劇拍攝時的點滴。
■劇中黃智賢（左二）和關禮傑（右三）飾演一對冤家律師，亦敵亦友。
■今次三人合作得好愉快，尤其是黃智賢和王君馨演夫妻擦出好多火花。
■黃智賢稱喜歡拍律政劇，一着起律師袍就有使命感。
■王君馨表示拍此劇時曾質疑婚姻，並藉着拍劇請教對手夫妻相處之道。
回應 (0)
我要發表
