人工島變大蛋糕
2018/11/12 04:12:58 網誌分類: 經濟
聯儲公開市場委員會在議息聲明中形容經濟頗為平衡，家庭支出增長強勁，但今年初表現比較強勁的商業固定投資已有所放緩，又指出通脹仍處於2%水平左右，未有對加息造成壓力。聲明有點車前退後，方向唔係咁明顯。由於市場原先預期美國會係12月份加息，儲局無出來放鴿，加息預期維持，咁息口去向就被理解為對港股略為偏淡。
選後中美有機吹和風
美國中期選舉已完，選舉期間大市備受催谷，選後開始出現疲態，投資者轉移對環球經濟放緩憂慮加深；科技股遭拋售，美股連升四日後全線回落，上周五全面下跌，杜指曾跌308點，低見25882點，最後跌201點，收報25989點。納指指一度跌2.4%，低見7349點，收跌123點至7406點。總結本周，標普500指數累升2.1%，道指累升2.8%，納指累升0.7%。
選後市場會將焦點放係利率同中美貿易問題上。係今次中期投票，無出現分析家所講倒向對手民主黨的藍色浪潮，反映特朗普有機會可以做多一屆，估計到時到候，呢位非一般的總統又會大打中國牌，到時又唔知會發生乜事，但呢個已經係後話。目前焦點係月底美國會同中國開會，按牌路睇兩個應有誘因短暫和解，特別係美國即將過聖誕節，為了今大家有舒暢心情，特朗普有機會釋出和緩氣氛。有政經猛人估計，中期選舉後中美若然吹和風，本地經濟明年應該仲可以維持係高位運作。
外圍政經環境會稍為穩定，但猛人仍然認為個市唔係咁易玩。主要係內地經濟畀美國搞搞，放緩跡象浮現。好似上周國乘用車市場信息聯席會公佈10月份廣義乘用車銷量按年減少13.2%，跌幅為年內最大。消息公佈後內地汽車股捱沽，廣汽（2238）急挫6%，收報7.92元；吉利（175）挫3.45%，收報14.56元，為五連跌；長汽（2333）、東風（489）都挫3%。
內地放緩浮現成逆流
今年汽車股大回小漲，久不久就炒中央會有救市措施，但由於內地車市放緩持續，救市消息只係帶來反彈，短炒呢個板塊要眼明手快。嚴格而言，由於放緩係大氣候，唔少生意都面對挑戰性環境，係經濟見底前，撈底入市有相當難度，只能限住注碼，當係保持住市場感覺。
上個星期除咗中選外，中環茶友講得最多就係「明日大嶼」計劃。立法會開咗三日會講《施政報告》，最爭議就係呢個項目。議員擔心起人工島會用光儲備，呢個憂慮而聽落似乎有啲誇張，但過去呢類龐大基建歷史甚長，確係唔能夠排除會出現風險。好似當年政府發展沙田新市鎮，擔心財政壓力太大，所以將項目招標，結果由恒基等四大發展商投得，財團取回三成土地，七成交番畀政府。當項目首期推出反應好好，但之後地產市道就回落，財團要劈價散貨。另一個例子係嘉湖山莊，當年大股東本來係華潤，但因為牽涉財力同風險太大，華潤最終都要將大股讓咗畀長實去完成。
「明日大嶼」發展期要二、三十年，市況更難估計，有人建議將項目拎出來投標，如果真係咁做，相信幾間龍頭地產商長實（1113）、新地（016）、恒地（012）都會有興趣。如果「明日大嶼」容許財團參與，咁就成為惹人垂涎的大蛋糕，相信財團都會力挺。
「明日大嶼」由誰供電
「明日大嶼」商機無限，但點樣分蛋糕都幾考功夫。茶友舉個簡單例子，好以供電咁究竟係畀中電（002）抑或港燈做，還是再畀第三間電力公司，就已經有排玩。現時中電同港燈分別供應九龍新界同香港電力。大嶼山現時由中電供電，其他離島都係，但港燈亦供電畀南丫島，填出來的人工島若然在港島上岸，咁亦有理由畀港燈負責，加上港燈現時缺乏發展機會，若然畀佢參與人工島項目，或者佢願意付出更佳條件。對兩間電力公司而言，人工島愈大，代表商機愈多，邊個能夠爭到，邊個新可以進入另一個增長期。另一方面，由於人工島面積不小，加上係新區，理論上亦可以成立新的電力公司，又或者引進內地電力集團，增加競爭性。
由供電咁簡單一件事，都會睇到當中微妙之處，其他交通運輸，以至各種服務，講緊隨時係上百億以至千億元的生意，可以見到點樣去爭呢件蛋糕，可以係幾激烈。
地運西移 旺正昂坪360
港珠澳大橋通車，搞到東涌逼爆，皆因此橋成為內地市民的新景點，不少人到此一遊。幾乎係東涌唯一景點的昂坪360生意更大幅飆升，可以話時來運轉。
大橋被喻新七大奇蹟基建
港珠澳大橋通車，吸引了大批內地人參觀，有人形容為內熱港冷，內地旅客對這個新建設的興趣明顯大過香港人，主要原因相信係大橋最高難度的部份都由內地承擔，所以內地對大橋的宣傳遠多於香港，好似大橋通車前，內地就拍咗套叫《港珠澳大橋》的紀錄片，仲係電影院放映，搞到好多內地人好有興趣一睇呢個被喻為新七大奇蹟的基建。
雖然香港宣傳大橋無乜用力，不過大批人流湧到，最直接受惠就係本地商號，仲有吊車公司昂坪360。
昂坪360生意過去真係唔易做，因為吊車服務要望天打卦，遇著打風落雨就要叫停，不時又要維修，當年的特首董建華將呢個項目交咗畀港鐵，多少都有叫佢捱義氣啃豬頭骨的味道。為了要撐住呢盤生意，吊車公司仲要不時搞推廣，認真勞心勞力，辛苦咗咁多年，o依家終於可以食正大橋風水，所以話地運西移，真係唔到你唔信。
陸羽仁
回應 (0)
我要發表