彈唔起

2018/11/22 09:00:56 網誌分類: 經濟

22 Nov

週三美股反彈，標普500指數收市升0.3%；納指收升0.9%，杜指則微跌不足1點。美股近幾日弱得非常交關，昨日雖然反彈，但代表性不大，因為週四、週五係美國感恩節假期，好多大戶同交易員都放了假，股市異常淡靜。

睇追蹤標普500交易的標普500的股票基金信托（SPDR S&P 500 ETF Trust）昨日成交只有7100萬股，遠低於最近30日平均的1.3億股就知道。

杜指昨日盤中最高曾升過204點，但受到蘋果公司反彈2.1%之後倒跌0.1%的影響，收市打回原形。美國5大科技龍頭股近日嚴重挨沽，齊齊跌入了熊市區域。市場目前比較關注蘋果的表現，T3live.com的合夥人 Scott Redler表示，蘋果近日的表現惹起市場人士的疑慮，本週五係美國的瘋狂購物日「黑色星期五」，大家都很關注蘋果股價在下週一會否企穩週二的低位175.5美元，如果守不住的話，將對美股，尤其係科技股帶來逆風。蘋果昨日彈不起，收176.8美元，形勢有點危。

昨日表現最好的股份係能源股，標普500指數中的能源板塊升1.6%，領漲大市，主要係受惠於油價反彈，紐約期油昨日反彈2.3%，收報54.64美元。

美國總統特朗普繼週二說就算《華盛頓郵報》記者卡舒吉的被殺害與沙特皇儲有關，仍然支持沙特之後，昨日再加強他對沙特支持的誠意，在Twitter上感謝沙特近日拉低油價的所作出的努力。話油價由82美元大跌至54美元，就像美國和世界的大稅改一樣偉大！多謝沙特，讓油價繼續走下去！

不過，分析普遍認為特朗普此舉，無疑會惹來國會山的民主和共和兩黨的人的怒火。因為這顯示了特朗普只顧追求美國經濟增長，而罔顧人權受到侵犯，即使一名像卡舒吉的美國居民被謀殺，也無動於衷。而他對油價的評論，只是任意而為。

美國昨日公布的經濟數字有點肉酸，美國10月耐用品訂單下跌4.4%，多過市場預期，亦係過去四個月內第三次下跌；另外，最近一週的申領失業救濟人數上升至四個月以來最高。

美股最近狂插，又見到經濟數字有點不堪，有分析開始憂心，隨著美國減稅效應逐漸消退，美國經濟衰退最快可能會在2020年出現。不過，高盛的首席環球證券策略師Peter Oppenheimer睇得比較樂觀，他認為美國經濟衰退不會那麼快會到來，股市近日的確沽壓嚴重，而原因係受到環球貿易糾紛，利息不斷向上，令到美國企業盈利增長及經濟活動正在放緩所致。

不過，經濟放慢又未至於會出現經濟衰退這樣嚴重，他預計美國經濟在2020年仍會有1.6%的增長，又預期股市仍會向上，不會倒退，但大家要預了回報相對會較低。

陸羽仁

回應 (11)

我要發表

animal666 2018/11/23 06:13:48 回覆

金融High Tea——一個殺人局油價犧牲了

金融High Tea - 陸羽仁 2018-11-23 列印文字大小

仲細D都得
大小小啦唔該...
仲未夠？
起碼咁大啦！
已經最大。

美股呢排載浮載沉，慢慢回調，整體有小小向下。比較之下，油價呢輪跌勢先至凶狠，點解油價會係咁跌，美國總統特朗普出嚟解開謎團，表明歡迎油價回落，又感謝沙特幫忙降低油價。

　　特朗普對於油價立場，有時都幾矛盾。共和黨係油商之友，加上佢係老派人，自然有傾向支持高油價。但油價高影響選民感覺，壓抑經濟，刺激通脹，亦都不利執政。

　　喺上世紀70年代，油價一升股市就散，白宮亦大為緊張。隨著新經濟興起，傳統製造業角色淡化，股市對油價上升敏感度下降，無論儲局同總統對油價都無咁擔心，令油價一度升至過百美元一桶。

　　現時能源成本對經濟影響，雖然主要體現喺中國等工業生產國，但政客開始關注能源消費對民生影響。美國係汽車國家，又需要燃油取暖，所以對基層來說，能源支出佔生活比重唔細，特別係進入冬天，相關消費大增，特朗普見油價低跳出嚟領功。佢喺社交平台上發文，形容油價下跌就好似係對美國及全球大幅減稅，仲強調油價要進一步下調。呢個說法聽落誇張，但如果知道美國人、特別係特朗普支持者嘅消費模式，就知距離事實不遠。

卡舒吉之死成特朗普籌碼

　　特朗普想討好油商，但想油價低，兩者點平衡？佢絕對唔係傻仔，美國喺換總統後即刻退出巴黎協議，等同美國可以開大引擎燒油，咁油商可「以量補價」。以美國頁岩油生產成本，油價喺50至60元水平，美國頁岩油商已經有錢賺。有咗呢招，特朗普喺有需要時，就可以撳低油價討好選民，撳完慢慢可放。佢喺中期選舉前宣佈放寬對伊朗制裁限制，容許多個國家購買該國石油，咁大嘅政治妥協，說明佢對壓低油價可以「無所不用其極」。

　　伊朗對原油供應有重要作用，市場上另一話事人係油組。美國想推低油價，但油組中嘅大哥沙特就想將國營石油公司上市，咁兩國利益點擺平呢？本來，沙特向美國購買1000億美元武器，對白宮都有討價還價本錢，正當大家爭持，突然有兩個男人走上國際舞台，幫咗特朗普一把。這兩個男人，一個係美國《華盛頓郵報》記者卡舒吉，另一個係沙特皇儲穆罕默德。

　　本身係沙特人嘅卡舒吉，因為尖銳批評沙特政府，成為皇儲嘅眼中釘，月前佢喺沙特駐土耳其大使館俾人有計劃地「生劏」。事件本來以為神不知、鬼不覺，無諗到土耳其政府一早監控，喺國際間爆大鑊，沙特嘅凶殘做法令全世界嘩然，皇儲被指係指使行兇主謀，歐洲政客即刻對沙特劃清界線，特朗普要繼續賣軍火畀沙特，本來好被動，但一向敢作敢為嘅特朗普就打險牌，硬挺沙特皇儲。

　　皇儲本來想推行經濟改革，將國家石油公司沙特阿美上市，但O依家火燒眼眉，首先就唔好倒台，特朗普一躍成為佢嘅最大保家，喺美國中期選舉前，恐怕佢都只能用推低油價回報特朗普，結果油價跌開有條路，過完中選仍未止瀉。從呢個角度講，殺害卡舒吉事件曝光，對特朗普來說，由一個危機，變成一個天跌下來的餡餅，但只有佢先有膽識同本事食落肚。

皇儲與特朗普隔空對唱

　　過去一段時間油價大跌，特朗普近日無乜成功劇本，惟有再借壓低油價來賣。同一時間，沙特皇儲穆罕默德就出嚟放話，叫人唔使旨意推佢下台。美國總統同沙特皇儲隔空唱戲，當肢解卡舒吉呢件事無發生過，直情當全世界人透明。卡舒吉嘅死亡成為特朗普推低油價最有力籌碼，令美國消費者有平油可用，亦紓緩美國通脹壓力，希望可以減慢加息。

　　特朗普不斷要搵好料滿足選民，下場戲碼係月底嘅「習特會」。

陸羽仁