11月尾結算周大龍鳳

成交急降.大龍鳳先兆.靜候下星期結算周爆邊創即月新高

23/11 周五恒指收報25927, 跌91點, 失守10天線, 國指跑輸恒指

本周大鱷牛熊通殺(殺牛3084/熊913), 今日港股收跌屠牛係正路, 一如本周一所說, 要爆頂都要先落山殺牛清場才升得, 恒指通常係月初推高, 回吐消化沽壓, 該月下旬再上, 今年有4個月恒指的即月高位是在26~29號出現, 成交細, 操控易, 任得大鱷點玩,

燈神指標好準, 燈神說今個月已見頂26530(相反指標代表會破頂), 日前燈神梁蛇叫買牛, 當天大市沖高回落, 翌日收跌, 今日燈神又唱淡, 預測下周會向下爆邊, 持倉亦縮減至約37%, 相反指標係下周恒指會突破50天線上沖爆頂, 殺上去屠熊

如果跟慣性走勢月尾3升3跌的話, 下周5天就會變成3升2跌, 但周末習特會或會影響升跌模式, 1/11的50天線在26705, 大鱷用拖字訣, 磨到今日50天線已經大幅下移至26183, 想收復就容易得多, 該水平有BB熊, 最肥熊熊在26400~26700, 具吸引力, 有上攻誘因, 係關鍵阻力位前窒窒步係大鱷一貫養熊引淡的手法, 因為熊熊最鍾意企阻力位附近, 只要淡友入局, 一挾淡港股就會爆升

本周港股跌下彈下, 消化沽壓, 等50天線下移, 等圖表走勢改善(吸引技術派買盤), 終於磨到下星期結算周, 大鱷今日食完牛牛, 熊熊愈養愈肥, 已下移至屠殺範圍, 今個月恒指慣性走勢係只跌一天即彈, 未試過兩連跌, 即係下周一會反彈, 今個月炒港股班大鱷操控手法非常高明, 擅長震倉, 趕走好友引淡友入局就爆升, 部署11月收升呈大陽燭, 下月會續創即月新高

10月恒指收24979, 11月埋單港股收升已是市場共識, 普遍基金經理或技術派都估計今次反彈浪會見26800~28000, 11月目標26800, 12月目標27700~28000, 紛紛部署買上, 所以現水平未到反彈目標沽壓不大, 人人都等上山才走貨, 成交急降至$595億, 創近兩年新低, 大龍鳳先兆, 當成交急增就要小心係見頂訊號

屠牛熊大鱷今早食完177隻牛牛趙完鬆, 尾市例牌又踢高大市, 收窄跌幅, 下星期係結算周, 冇得再磨, 以周波幅計, 20及50天線困局, 收窄三角形下周要爆邊喇! 只要權重QQ上破並企穩50天線$294.5, 恒指就會上50天線(約26183), 跟住就會挑戰前頂26530, 因為月尾例牌創即月新高, 不過上証急瀉66點失守2600, 收2579, 連跌兩天, 弱到冇朋友, 皆因老外繼續丟A股, 要等阿爺救市, 否則就會拖低港股

~~~~~~~~~~~~~~~~~~~~~~~~~~~~~~~~~~~~~~~

11月力守20天線向上推進

今日港股回吐, 當大市完成調整, 等熊熊下移大鱷又可以踢番大市上去屠熊, 今個月劇本係無論點震, 埋單都會係收升呈陽燭, 震住上格局, 到月中為止11月高低位25092~26530, 波幅只得1438點, 只係勉強達標(今年有5個月波幅係1330~1900點), 仍有上升空間, 以大鱷的胃納, 要爆邊才能食飽飽, 通常要做夠月波幅或者熊熊死得七七八八才會轉勢向下,

今個月港股低位承接力強, 未試過兩連跌, 往往係跌1天即彈再連升, 又或者係早市跌, 午後買番上去, 反映有買盤趁回吐低吸, 亦有可能係大鱷為了屠熊及結算力撐, 大鱷一直力守20天線, 就算插穿都會彈番上去收, 推升態度明顯, 進一步確認11月份好友已奪回主導權

唔少分析(大行/基金)都認為24540是今年低位，但明年或會再創新低, 肥青沈大屍看18000~23000, 因貿易戰遺禍深遠, 不會這麼易解決, 其實以年波幅來說, 今次可能係抽高來擴大及預留明年的波動空間, 美國經濟放緩加息機會下降, 資金追捧地產股, 係一直保得住港股20天線的功臣之一, 唔少基金經理認為反彈浪未完(11月短線上望26800, 12月攻上28000), 正部署呢兩個月推高大市獲利, 希望12月埋年結可減輕或追回今年中美股災的損失, 因為唔少基金經理都今年都輸到嘔白泡, 按此推算, 11月份月結, 12月份全年結前都會有獲利沽壓

恒指通常走1300~2000點就轉向, 恒指由30/10低位24540彈1990點上7/11高位26530, 一達標就反艇, 再度下試25000大關, 守得住彈上26397再挫, 底部上移, 低見25494即彈, 換句話說, 如果又作出大反彈, 今次升浪就會由13/11低位25092加1300~2000點, 即係11月份上望26392~27092, 而12月會再有新高, 重上27000不是夢

港股高開高收呈大陽燭, 爆邊大舉屠熊, 推高部署結算位, 向前頂26530進發

26/11 周一恒指收報26376, 升448點(最多上升486點), 收復10.50及60天線

國指收報10521, 升133點(最多上升160點), 收復50及60天線, 國指大幅跑輸恒指

老外掃A股.大媽走港股.港股底頂上移續尋頂.月尾結算周.創新高時間窗口

港股跟足劇本向上爆邊, 以為今早會震多一棍屠牛才上攻50天線屠熊, 但大鱷唔想放生熊熊, 所以高開高走, 一升到尾, 大舉屠熊1183張, 超和味, 權重QQ上企50天線$294.5(下一站阻力大位$300, 熊證重貨區$310附近), 推動恒指收復50天線(約26183), 今個月恒指慣性走勢係只跌一天即彈, 上周五跌, 回氣及震倉, 今日果然彈高, 一如日前所說, 現時基金經理都買上, 所以今個月港股表現比中美股市強, 就係因為有基金水喉支持, 抵消了大媽的沽壓, 當基金經理食胡, 大市就未必頂得住大媽的沽壓

上周燈神梁蛇話今個月已見頂26530(相反指標係會破頂而上), 並預測本周會向下爆邊, 持倉亦已縮減, 相反指標係今日恒指向上爆邊突破50天線屠熊, 今日高見26413, 係26400附近游走係想引貼價牛熊入局, 燈神看淡就升, 看好就跌, 好準咖! 梁蛇見港股今日爆升就轉口風唱好, 話淡友已收兵, 相反指標就要小心大市會回吐

本周港股爆邊係跟足圖表走勢, 但今日升這麼多就係意料之外, 因為周四才結算, 周三出手推升就唔使花子彈托幾日, 今日急於爆升有乜陰謀呢? 上周五美股續瀉, 道指連跌4日, 連上証今日都反艇, 連跌3日, 但道期彈高, 大鱷亦博阿爺會救市, 加上大鱷一直力守的20天線已上移至25958, 不進則退, 結算前一定要保住20天線, 所以今日大鱷就偷步推升, 踢港股上50天線屠熊及部署周四結算位, 港匯轉強, 人民幣回穩, 美國10年期債息回落, 亦利好港股,

今日港股急升但成交萎縮, 只得$741億, 並不配合升勢, 雖然係乾升, 但未必係壞事, 因為大成交沖頂冇好下場, 細成交就代表持貨者認為未見頂, 惜貨未沽, 而冇貨者觀望唔想高追, 淡友仍未全面投降回補空倉, 導致成交減少, 見超大成交就要小心係見頂訊號喇! 按此推算, 今日高位26413不會是反彈浪頂, 往後會升穿26413向上推進, 大鱷通常要挾死淡友港股才轉勢向下,

如果跟慣性走勢, 未來4日恒指就會係2升2跌, 或者係1升3跌(因為有習特會避險沽壓), 當出現見頂訊號大市就會急回, 如有調整, 向下20天線非常關鍵, 因為今個月自從收復20天線後, 就算即市插穿, 但收市一直守住20天線(目前在25958), 只要能守穩, 代表反彈浪未完，當結算完就要留神，好友未必會再托市

如果今次港股爆升係只為了挾淡屠熊及部署結算位, 大鱷就會趙完鬆, 唔好凈係向上望, BB牛已上移至26000附近, 愈來愈貼價, 只要上移至屠殺範圍, 大鱷或會牛熊通殺, 順帶一提, 以往恒指上企50天線多數企唔穩, 如果受「習特會」影響, 未來幾日沖頂打回頭, 大鱷或會留力下月才闖高峰, 數浪派指如能守住50天線確認真突破, 就會殺上28800, 目前27000熊不多, 爆上未係時喉, 要拖多幾日等熊熊養肥及有利好消息才會借勢向上突破

~~~~~~~~~~~~~~~~~~~~~~~~~~~~~~~~~~~~~~~

向上擴大周及月波幅

以周波幅及月波幅計, 大鱷點都要踢大市上去26500, 普遍分析短線目標見26800, 12月會挑戰27700~28000, 但要習特會有好消息才能成事, 但現時正處水星逆行期間, 市況會大幅波動, 震到失暈, 好友淡友都要死

權重A股走弱拖低H股, 今日國指大幅跑輸恒指, 10700一直壓住國指, 港股能走多遠關鍵在國指能否轉強, 上証能否止瀉, QQ能否上企$300, 恒指如沖上26500後能否企穩並進一步上破26800關鍵阻力位, 抑或係高位一瞬即逝, 因為29/11(周四)期指結算, 30/11(周五)基金月結+MSCI調動, 於30/11~1/12  G-20峰會及「習特會」前或會有避險沽壓, 大鱷托埋結算會否縮手亦要考慮, 因為大鱷亦要預留下個月的波動空間

11月港股的反彈浪並不獲北水支持, 只係乾升, 今日港股高開後愈升愈有, 而大媽就趁反彈一路沽貨, 沽到收市, 唔係好現象, 近日大媽走內銀內險油股亦壓住H股, 由於今日大媽沽盤金額不算大, 所以無礙港股升勢, 當大媽大手沽貨就要小心, 而老外就趁上証下跌低吸, 一反過去兩日走鬼的勢頭, 連老外都玩高沽低吸炒波幅

11月下旬恒指升浪目標: 13/11低位25092 + 1300~2000點月波幅 = 26392~27092

港股關鍵位100天線,   恒指阻力位: 27000      國指阻力位: 10700 

騰訊蟹貨阻力區: $320樓上

收市如能上企阻力位, 代表向上突破, 會有一波上升行情

港股即市完成調整, 守50天線, 繼續尋頂屠熊之旅, 向26530.26800.27000進發

27/11 周二恒指收報26332, 跌44點, 11月震住上, 部署高位結算

昨日港股爆升, 如果今日再升, 就要花子彈托兩日才結算, 所以今日大鱷忍忍手, 消化沽壓, 係26400關口扮乏力再進, 詐死引熊熊淡友入局, 拖多一日, 等結算前夕(明日)才出手, 既可慳子彈, 亦可大舉屠熊追數, 後日(周四)就可確保在高位結算, 只要急升就可逼淡友補空倉幫手推高大市, 企穩50天線就可吸引技術性買盤及散戶進場

普遍分析睇今個月目標在26800, 要等熊熊養肥才會上27000(100天線阻力大位), 當港股爆上, 燈神梁蛇非常樂觀看好後市就要小心大市會反艇, 近日港股成交縮, 如見成交急增就係見短頂訊號

昨日高位26413, 今日高位26417, 底頂上移尋頂格, 繼續向11月目標26530~27092進發, 部署高位結算, 貼價肥熊命危, QQ係港股升跌火車頭, QQ公布業績後已轉勢向上, 推動港股展開反彈浪, QQ上企$300, 就會推恒指上26500, QQ重倉熊在$310附近, 蟹貨區在$320樓上, QQ通常和港股同步見底頂, 當QQ見頂, 港股就要回, 消化沽壓後才能再上,

港股今個月大漲, 仍未有見頂跡象, 一如早前所說, 今年有4個月恒指的即月高位是在26~29號出現, 即係未來兩日(28~29號)會有新高, 結算日(29號)係出現11月高位的最後機會, 按照慣性走勢每月最後一天(30或31號)不會創新高, 預留多些空間俾下個月破頂, 以月波幅計, 下個月要在10及20天線穿梭

恒指30/10創今年新低24540後展開反彈浪, 升穿26000後多咗分析認為今次係熊二大反彈, 普遍基金經理看12月會上破27000創反彈新高點(100天線阻力大位), 樂觀派看12月會見27700~28000, 係9月及10月頂部所在, 阻力非輕

悲觀派認為會再下試25800, 淡友話如果習特會冇好消息, 就會再落25000/24500, 上升是為了下跌鋪路, 睇勢頭12月基金粉飾櫥窗會升穿11月高位, 會一路升一路食胡減磅，基金黃蛇港股買上, 美元做淡, 代表港股升勢未完，推上去才可擴大下跌空間

11月尾肥青.沈大屍.石石都係大淡友(石石4/12變左好友), 有散戶埋怨肥青QQ落$260時大大聲唱淡, 說會插落去$220, 嚇到佢唔敢入貨, 但結果係QQ升到彭彭聲重上$300仍未有見頂跡象, 肥青不但唔認睇錯QQ走勢, 仲笑住罵散戶不應捕捉短線波幅, 其實唔好怪肥青, 大媽大鱷亂港, 畫圖引好友淡友入局, 好淡通殺, 技術分析的可信性已下降, QQ係大鱷大媽操控港股上落的棋子, 估QQ升跌係高難度動作

內地股市跌到殘, 具吸引力, 今個月老外經港股通(滬深)密密趁低吸納A股收貨, 港股通(滬深)出現資金凈流入居多, 相反, 自從13/11恒指創11月新低25092大媽掃貨後, 其後港股一路彈, 大媽就一路走港股, 滬港通出現資金凈流出居多, 為後市隱憂

內地水緊, 大媽要班資回朝, 好明顯今次反彈浪並不獲北水支持, 只係踢高派貨, 而基金經理及大鱷就以習特會做藉口短線炒上, 好友大鱷亦要推高結算, 所以形成大反彈浪, 上周燈神經仔通梁蛇唱淡預測本周初向下, 認為26530已見頂, 結果港股爆升, 恒指一舉收復10.50.60天線, 升勢凌厲, 未來幾日創即月新高毫無難度

~~~~~~~~~~~~~~~~~~~~~~~~~~~~~~~~~~~~~~~

月尾6天恒指多數係3升3跌, 11月恒指例牌跌1天即彈, 未試過連跌兩天, 今次月尾升跌係梅花間竹.日升日跌

23/11  跌

26/11  升

27/11  跌

28/11  升

29/11  跌 ???? (結算日)

30/11  升 ???? (基金月結+黑期結算+MSCI 明晟季檢+畫月線日)

習特會

港股升跌模式或會受「習特會」影響, 整個11月好友都力守20天線, 收市未失過, 可作為12月走勢的指標, 只要守26000, 1300~2000點一般月波幅就會挑戰基金黃所說的28000, 如受制於27500或28000, 就要再下試26000.25800.25500, 有基金經理估計, 如果11月尾習特會前夕係升市, 多數會有好消息, 或會有春江鴨收到風做定部署, 有基金經理認為萬一習特不歡而散, 阿爺亦會加碼救市, 所以對後市樂觀

按照常理推斷，雖然貿易戰不可能擺平, 但兩巨頭1/12正式會面前已不斷派員密密商討，一定會有些好消息, 或者係好壞各半, 不可能反檯, 否則習特二人都好難下台

近來基金及大鱷推高大市買上亦喺估有好消息, 基金經理為了埋年結短線擺明係好友, 亦係今次反彈浪的動力來源之一, 其實自從6/11美國中期選舉, 塵埃落定後, 特朗普頻頻釋出善意, 強硬口風已有所改變, 阿爺亦識趣不再刺激狂人, 中美雙方都肯略為放下身段, 港股於13/11創即月新低後就向上走, 早已有啟示, 亦吻合基金經理的買上部署, 不過要小心基金經理會趁反彈沽貨獲利埋年結, 因為要追回今年股災的損失,

~~~~~~~~~~~~~~~~~~~~~~~~~~~~~~~~~~~~~~~

11月下旬由好友主導，12月初好淡角力, 非生即死見真章

美股及油價已入熊, 但港股挾淡爆上26530破頂, 部署高位結算及屠熊

2018年水星逆行 : 17/11 ~ 7/12 代表消息混亂, 金融市場會大幅波動

聯儲局將會在美國時間周四公布上一次議息會議紀要, 聯儲局主席鮑威爾及幾位主要官員將發表演講, 受加息週期接近尾聲的好消息推動下, 地產股見買盤, 地產股強.港股好

30/11~1/12  G-20峰會及全球焦點1/12的「習特會」

29/11(周四)期指結算

30/11(周五)基金月結+MSCI明晟季檢，23間企業被納入中國小型股指數，57間股份被剔除, 每逢有調動, 成交例牌急增

特朗普將5/12(周三)定為前總統老布殊的全國哀悼日, 當日美股休市一天, 特朗普總結20國集團(G20)領導人峰會行程的記者會將會在喪禮後才舉行, 下周初港股大鱷自由行, 小心大鱷會好淡通殺

石油輸出國組織將在12月6-7日在維也納舉行會議，市場普遍預期或每日減產100萬桶, 油價連番急挫後油股見趁低吸納買盤

聯儲局議息: 18~19/12, 市場預期加息機會大

溫馨提示: 冬天元帥要早睡, 亦要準備12月中放大假及工作上的交接, 不會日日寫文分析市況, 近期幾篇網誌已詳細分析港股短中線的方向, 每日收市後重溫網誌, 印證大市是否跟劇本走, 然後定買賣策略, 不要再找元帥, 有空就會現身