不吃不可的殘忍食品

        七點半到場，老闆娘唸住俾現場唯一有空既二人枱。與此同時，街外有兩位客食完埋單，佢即時要我哋坐街外既兩人枱。我問點解唔可以坐舖入面該張？佢話要留位拉大張枱俾九位客，咁我哋為有吸住廢氣嚟食！

        無幾耐該九位客到咗。啊！原來係阿B 哥哥兩公婆同啲朋友嚟食嘢。嘩！B 哥哥真人瘦過上鏡，而阿范姜就後生到成個靚妹咁，一啲都唔似生產過。

       該晚佢哋個個都好好胃口，叫咗六個煲仔飯同十幾個餸。而我哋就叫咗舖頭最出名既豬骨煲同煲仔飯。啊！個豬骨煲湯底鮮甜得嚟又唔肥膩，煲仔飯用料夠新鮮，啲飯食落一粒粒有咬口。不過最出色就係煲飯底既飯焦，平時第間食既飯焦多數黑炭咁，但係呢間嘢啲飯焦完全唔同。挖出嚟該件飯焦好似潮式【兩面黃】咁，外表金金黃黃，齋食落口似食緊【旺旺鮮貝】咁。戲肉就係將豬骨煲既湯加落飯焦一齊食，咁至係我心目中理想既泡飯。

        食完飯我老婆問我：「阿B哥哥幾多年歲」？我唸咗陣然後答：「都唔細啦，我細細個睇温拿已見到佢」。阿老細聽後好驚訝咁講：「我年代都無睇過，聽講温拿好耐個喎。你個死老餅睇吓人哋，佢大你十幾廿年但係睇落重fit同後生過你」！我摸住練得好辛苦該舊肥腩咁答：「車！人哋做娛樂圈既，更係成日keep 住啦」。