查開支關卡重重 區議會黑箱作業
講開又講，區議會利益申報黑箱作業，早就唔係新聞，審計署就曾狠批《區議會常規》冇界定何謂「其他可供申報的利益」，變相造成議員自己批自己嘅灰色地帶，可惜言者諄諄，聽者藐藐，除咗少數幾個區議會從善如流補鑊，其他一概意見接受，態度照舊，有咩法子唔出事。 
查開支關卡重重 區議會黑箱作業
有人講過︰一個好嘅制度，可以將壞人變好人；一個壞嘅制度，可以將好人變壞人。好似區議會實報實銷開支津貼制度咁，市民想監察公帑係咪被濫用仲難過登天；最離譜仲係各個區議會各自為政，幾乎搞到「一港十八制」咁滯，透明度低成咁，同引人犯罪冇乜分別嘅咋！ 
家陣區議員每年實報實銷開支津貼達五十一萬元，主席更有額外三萬六千幾酬酢開支津貼，話就話議員填寫嘅申報表上清楚列明可供公眾查閱，之但係實際程序係點根本冇人知，連區議會網頁都語焉不詳，記者試過致電各區議會秘書處查詢，對方唔係十問九唔知，就係問多兩問冇你咁好氣，索性晾起個電話，你吹得佢脹咩。 
即使閣下鍥而不捨，親自踩上秘書處，分分鐘煩到你知難而退。好似荃灣區議會咁吖，全程派出三名職員金睛火眼𥄫到實，十足十防賊咁防；就算肯開恩提供資料，有啲得議員申報表而冇相關單據；有啲搵膠紙遮住簽名同議員助理個名；有啲甚至用釘書機釘起申報表部分內容。事無不可對人言，真係乾乾淨淨嘅，使乜收收埋埋吖？ 
有做過區議員嘅學者就講得啱嘞，十幾年前市民仲可以直接到區議會查數，依家有乜理由不進反退？特別係近年區議員詐騙津貼、偽冒簽名等醜聞不絕，更加有必要將一切攤喺陽光下。 
講開又講，區議會利益申報黑箱作業，早就唔係新聞，審計署就曾狠批《區議會常規》冇界定何謂「其他可供申報的利益」，變相造成議員自己批自己嘅灰色地帶，可惜言者諄諄，聽者藐藐，除咗少數幾個區議會從善如流補鑊，其他一概意見接受，態度照舊，有咩法子唔出事。
呢嗱，唔係杞人憂天o架，立法會議員開支申報係就係透明度較區議會高，公眾隨時可以喺立法會圖書館查閱議員最新申報資料，問題係政棍們蛇有蛇路，鼠有鼠路，舔着數蠱惑招層出不窮，有人利用資訊科技開支津貼，喺辦公室豪買至潮電子產品；有人食得唔好嘥，利用津貼印製八達通卡套、月曆等派街坊，搞另類「蛇齋餅糉」；有人甚至用納稅人公帑喺佔中期間購買反政府物資，區議會無王管咯喎，容乜易淪為腐敗溫床。 
一節見則百節知，香港回歸二十一年，「廉潔之都」金漆招牌已經搖搖欲墜，部分「已完」固然貪得無厭，班高官亦係五十步笑百步，這些年涉貪官員層級一個比一個高，食相一個比一個難睇，香港愈來愈澳門化，兩個特區各有各貪，各有各亂，真係睇見都眼冤！ 
功夫茶