PACO名人會
PACO名人會
PACO名人會

拗得精采 搞笑爆料 陳志雲葛民輝做主持夠晒Fun

2018/12/03 05:12:33 網誌分類: 生活
03 Dec
          陳志雲(Steven)與葛民輝近日為「香港開電視」分別主持開台節目《志雲拆局》和《兒嬉立法會》,他們笑稱均被有線高層王喜O氹入局,不過做落又幾Fun。因志雲大師會邀請兩方不同意見的嘉賓,討論很多社會爭議性的話題,「拗」得精采;而跟阿葛一齊做節目的「小議員」,有時畀意見又不經意爆父母的私隱,十分搞笑,夠晒真情流露。

         講番志雲大師和阿葛點解會為「香港開電視」做節目,他們直指被王喜O氹入局,志雲大師稱:「佢同我講有邊個邊個做,但個個對我都唔重要,我淨係聽到葛民輝三個字,我話葛民輝真係做?跟住王喜仲話:『葛民輝收得好平,佢真係好錫我。』言下之意係,如果我收得貴就係唔錫佢。」阿葛即回應:「呢啲真係識講嘢,果然係電台出身;其實佢講畀我聽嘅故仔係已經齊晒腳,人才濟濟,當然仲有志雲大師,仲話你已經開緊工,又同邊個邊個傾嘢,點樣拆局,講到似層層咁。」志雲大師笑言應該搵埋王喜一齊做訪問,當面對質拆穿他的詭計,阿葛再接着說:「真係志雲拆局喎!」

        王喜O氹入局

          提到《志雲拆局》,志雲大師坦言最初的想法是單對單的嘉賓訪問,後來跟王喜再商量,變成現在嘉賓雙方對立的局面,他笑言:「我都覺得好玩嘅,特別係兩邊唔同意見,我只係好似一種催化劑咁,因為兩邊都唔覺得我有攻擊力;而最重要係我自己做得冇咁辛苦,既然大家係對立,我唔係好使講嘢;不過中間啲反應shot,要等佢哋傾完晒,我就跟住拍番唔同嘅表情。」

        談性解放

          而節目的議題都好廣泛,很多是關於道德和社會價值觀的問題,反而冇乜政治議題。志雲大師續稱:「其中一集講『驅魔』,究竟你係咪信就驅到魔呢?我哋搵咗兩個組織代表,各自講心目中嘅鬼係點,邊個驅魔叻啲?又有講『同性戀者可唔可以有個家呢?』、『安樂死』同『自己性別係咪自己揀?』,啱啱錄咗輯係講『性解放』添,今次兩方都係女仔,一個守貞操守到40歲先解放;另一位十年來有十個拖友,個個都發生性關係,墮過兩次胎,但O依家變得好保守,跟住大家又拗,都幾好玩!」

        小朋友 真情流露

          至於阿葛的《兒嬉立法會》,最初是王喜構思了一個有關小朋友的節目,又想到阿葛未跟小朋友合作過,就問他有冇興趣。他最初以為個節目要講時事,但他不看新聞又不問世事,後來才知道背後真締是要跟小朋友傾偈,讓他們發言、發表自己的意見。而阿葛最愛不是節目本身,而是喜歡看幕後花絮,他笑言:「每次都有唔同議題,最開心係『撻着』啲O靚仔,可能有件事問佢唔要阿媽一齊做,但加番daddy畀佢好唔好?佢哋取捨完我會問點解,一講點解就正喇,因為我安排咗啲細路仔坐喺前面做議員,後面觀眾席係佢哋嘅daddy或媽咪,當個O靚仔俾我『撻着』咗,就會爆老竇點樣衰、點解唔要老竇,佢老竇坐喺後面即刻滴汗、面青同吞口水。而且一個爆得興起,隔籬嗰個又諗原來講得喎,跟住又講,我反而鍾意睇呢啲,夠真情流露!」

        人細鬼大

          還有一件趣事令阿葛來不及反應,事緣現今父母生小朋友都是一個起兩個止,有次他問:「點解你唔叫爸爸追個妹妹畀你?問問吓講起我哋以前嗰代,好興問阿媽我哋點生出嚟?我話我係石頭爆出嚟,跟住有家長話喺坑渠邊執返嚟,有啲又話喺山邊。」當他與家長吹水吹得興起,一個六歲的男孩子突然搭訕:「係陰道吖。」全場人靜咗,阿葛即接着說:「彌敦道我聽過,佐敦道我聽過,道道道非常道,黃霑首歌係咁唱,小朋友呢條路喺邊度O架?佢講得出咩子同咩巢,我哋細個邊知,所以有時啲O靚仔你都估佢唔到,但無啦啦插嘴幾好笑。」

        主持:黃柏高 統籌:林永匡

        協力:李佩儀 攝影:袁東亮、謝民光

        場地:Cubus 28

        黃柏高
■(左起)陳志雲和葛民輝最近為「香港開電視」主持節目,樂趣無窮。
 ■(左起)陳志雲和葛民輝最近為「香港開電視」主持節目,樂趣無窮。 
■早前(左起)葛民輝和陳志雲分別以律師和法官打扮出席「香港開電視」的開台記者會。
 ■早前(左起)葛民輝和陳志雲分別以律師和法官打扮出席「香港開電視」的開台記者會。 
■(左起)導演歐文傑和洪祖星曾上陳志雲節目《志雲拆局》談港產片前景。
 ■(左起)導演歐文傑和洪祖星曾上陳志雲節目《志雲拆局》談港產片前景。 
■葛民輝稱為遷就小朋友的開學時間,四天拍晒15集節目。
 ■葛民輝稱為遷就小朋友的開學時間,四天拍晒15集節目。 
■陳志雲原本以為可以跟葛民輝一齊做節目,最後才知是「騙局」。
 ■陳志雲原本以為可以跟葛民輝一齊做節目,最後才知是「騙局」。 
回應 (0)
我要發表
user