議息前插插
中美貿易戰有停戰跡象,但未能緩減投資者對全球經濟增長放慢的憂慮,再加上杜指成份股強生(Johnson & Johnson)爆出醜聞,股價大跌,蘋果公司又急插,上週五美股認真肉酸,杜指低開低走,一度低見24033點,大跌563點,於收市前稍為反彈,但仍跌496點,收24100點,跌幅2%;標普500指數跌1.9%,納指挫2.3%。
中國政府上週五宣佈,將從明年1月1日開始,暫停對美國輸華汽車加徵關稅三個月,又同意將美國生產的汽車和汽車零部件關稅從目前的40%大降至15%;在此之前,中國已開始重新購買美國大豆,中美貿易戰緩解。
不過,這個利好消息,卻被中國及歐洲公佈的不如理想的經濟數據所掩蓋。上週五,中國公佈的11月工業生產同比增長5.4%,較上月跌0.5個百分點,係三年以來最慢,而中國11月零售銷售同比增長8.1%,較10月份下降0.5個百分點,低過市場預期的8.8%,更係2003年以來增長最慢,貿易戰不止影響工業生產,連零售都影響埋。
歐洲的情況亦不好,在差不多時間公佈的IHS Makit歐元區PMI指數10月份跌至51.7,是四年以來最低水平。。投資者擔心全球經濟前景不濟,就把資金由股市轉移到較安全的債市,上週五美國長短期國債都走高、債息下跌。
雪上加霜的是,被稱為地表最強的蘋果分析師、天風證券(TF International Securities)分析師郭明錤上週五大削iPhone在2019年首季的出貨量預期20%至3800萬部到4200萬部,又表示2019年的出貨會較今年減少5%至10%,大約有1.88億部至1.94億部。受到消息拖累,蘋果上週五大跌3.2%,收報165美元,在過去的三個月,蘋果股價大插了24%,以一隻大股計,非常恐怖。受到蘋果大跌拖累,FANG等科技龍頭股亦無運行,其中Netflix跌3.3%,亞馬遜更大跌4%,標普500指數科技指數跌2.5%。
不過,最差的還是醫療板塊,大跌3.4%。累街坊的元兇係杜指成份股強生。上週五,路透社爆料,話強生的嬰兒爽身粉原材料滑石粉含有致癌的石棉(Asbestos)。更大鑊的是路透社報道,查核過一些包括沉澱物和試驗見證,起碼由1971年至2000年初,已顯示強生所用的滑石粉含有石棉,言下之意係強生公司明知產品有致癌物質,照賣可也,而且還賣了近半個世紀。
強生即時作出回應,指報道是陰謀論,所用的滑石粉不含石棉或致癌物。受到消息影響,強生股價上週五一度大插12%,收市略為反彈,仍跌10%,報133美元。創2002年7月19日以來最大單日跌幅。2002年當天,強生股價大插16%,主要係爆出美國監管部門正調查一名強生前員工,有關因錯誤記錄資料,造成所生產的治療貧血藥物出現嚴重副作用的指控。
美股在聯儲局開會前係咁插,似在做定個勢等聯儲局18至19日(本周二周三)議息時唔好咁鷹。
陸羽仁
將軍,好嘢!一早就講咗好友大難臨頭 (只係唔知大撼大,係邊個累低咗?)
上星期五數浪派已經數出呢張美股圖,不過嗰時袋鼠都有啲保留 - 似乎而家確認鳥 (今日已經穿咗條紅線)
2018-12-17
Dow Jones Industrial Average (^DJI)
23,592.98 -507.53 (-2.11%)
疑似「火雞股」唔算平
2018年12月18日
美股上周五大插,有點聯儲局議息前大戶逼官員放鴿的味道。港息雖然連升15日,香港銀行界一早放定聲氣,本地仍然水浸,兼且港元匯價輕微強勢,所以美國就算加息,港息頂多只會跟加0.125厘,或者甚至唔加,港股上周跌完之後,昨日低開後好快企穩,指數只係輕微低收,大抵淡友驚美國議息後會有挾倉,所以唔敢太過進取做淡。大市觀望氣氛極為濃厚,交投跌到去只有554億元。
市場靜待美國本周議息,恒指全日上落唔大,收報26087點,僅跌6點;國企指數收報10351點,跌7點,成交554億元,沽空金額有73.8億元,平保(2318) 沽空3.94億元,排第二位,佔5.3%。平保收跌0.95%,收報73.35元。
平保上周五公佈,公司在執行委員會現行「執行官負責制」基礎上,增設三個聯席首席執行官崗位,由李源祥、謝永林、陳心穎擔任,雖然公司話董事長馬明哲所負責的工作和職責不變,但安排仍然惹起外界猜測馬明哲動向,咁啱呢排平保股價走勢疲弱,新安排就變成敏感消息。
對於新安排是否代表馬明哲角色有變,外資大行摩根士丹利認為,新委任的三名聯席CEO均來自現有執行委員會,預期平保整體策略方向上,將不會有重大轉變。然而,新聯席CEO角色及職責,可能顯示平保進一步進行業務重組,使公司成為全面綜合由科技推動之金融集團,所以唔覺得係負面消息。不過,大行有時會玩兵不厭詐,平保走勢仲係有待觀察。
從市場對消息的反應,可見淡市下人心膽弱,資金寧願買穩陣但唔「性感」的股份。中電(002) 收升1.7%,報89.55元;港燈(2638) 升1.6%,收報7.77元;電能(006) 漲1%,收報54.9元;煤氣(003) 升0.62%,收報16.16元。
美息今年向上,全球股市整體回軟,本地細價股更受到壞消息打擊,變得非常低殘。中環茶友話,掀起細價股洗倉潮的「股壇長毛」David Webb,自己都係細價股擁躉,早前他透過筆克(752) 通告,披露自己擁有5%股權。過去「股壇長毛」喺聖誕前都會介紹火雞股,外界就好奇呢隻筆克算唔算火雞股。
筆克上市多年,大股東係新加坡資金,集團主要係做展覽業務。上市以來公司業務穩定,派息不俗,加上集團喺本地寫字樓市低迷時,買入灣仔筆克大廈作自用及收租,變成公司資產。股壇長毛買股喜歡買有收入之餘,仲有資產偏低股份,所以筆克啱佢口味都唔稀奇。
股壇長毛揀股幾穩陣,鍾情有息派、有資產公司,但有時佢計數計得太盡都會燒鬚,其中一次係王氏港建(532) 多年前倡議私有化,股壇長毛計過數覺得偏低,同大股東拗數,最後計劃拉倒。私有化失敗後,王氏港建股價基本上無上過建議價格。論資產,集團單係觀塘幢寫字樓已高過市值好多倍,而且派息都算穩定,可惜股價唔太反映,所以股壇長毛搞到私有化失敗,其他小股東多年來都有點怨言。
三、四線股股價唔反映資產,以折讓計,筆克昨日收報2.87元,升0.02仙,現價市盈率12.6倍,資產1.6元,雖然派息6.5厘相當唔錯,但公司估計未來增長較平淡,估值唔算太低,相當程度反映公司派息政策同資產質素,作為火雞股都唔算特別肥美,特別係股壇長毛買了5%後,又減持番去毋須公佈的水平,所以唔係咁容易捉路。
細價股靜市有異動就易搶眼球,另一隻有話題的是經營759阿信屋的CEC國際(759) 股價異動,收報0.63元,飆升17%。市場估計CEC炒作,可能係同連鎖零食店優品360°趕搭2018年開招尾班車有關。
優品將於本月底至下月初招股,如果優品可以集資兩至三億元,咁市值四億幾的CEC國際估值咪係偏低?茶友就坦言,做生意條數唔係咁計,皆因做同一類生意,有人賺、有人蝕。阿信屋最新業績蝕緊幾千萬元,優品能夠招股上市,條數點都靚啲,唔可以簡單就咁做比較囉!
陸羽仁
叮噹....全日大市跌7點, 成交554億.......
勝誕節
666兄: 聖誕節.....人人有禮物
將軍幾時出來派錢呢?
SIGH...
大戶兄: 如老美停止加息; 貿易戰現大和解; 大英順利脫歐; 阿爺暫停去槓桿. 嘩....不得了....
三萬點!
紅易
大戶兄: 大市重上3萬點好嗎?
將軍,
公牛定公紅?
叮噹....半日大市升7點, 成交311億......
已沽揸揸了沽…
SIGH...
攻呀攻 快搶攻
早