外匯閃崩 蘋果唔掂
美股2019年首個交易日，延續近期的大波動走勢，投資者繼續一額冷汗。杜指朝早先跌400點，之後又來一個V彈，收復全部失地，收市微升18點，收23346點；標普500指數微升3點；納指較好，升0.5%。
今早外匯市場出現閃崩，美元今早兌日圓急跌，最低見104.99，跌3.5%，後來反彈，上番107，仍跌1%。踏入新年，全球投資氣氛有點弱。
昨日美股朝早跟外圍急跌，嚇到投資者腳軟，主要受中國和歐元區公佈的製造業資料疲弱不堪，引發市場對全球經濟增長的擔心的拖累。去年12月財新Markit 製造業採購經理指數（PMI）由上月的50.2下滑至49.7，顯示製造業出現萎縮的情況，這是19個月以來首次；與此同時，歐元區公佈同期的IHS Markit PMI亦跌至15個月以來最低，在對未來經濟信心方面，更下滑至6年以來最低。
瑞銀的紐交所地勤交易主管Art Cashin表示，「大家都對全球經濟放慢感到恐懼，而在短短的8個月前，大家還在大談全球經濟的同步增長，但樂觀氣氛現時已經煙消雲散。」
昨日進一步打擊美股的是《紐約時報》報道美國貿易代表萊特希私下對朋友及同事說，要阻止總統特朗普與中國就貿易談判時接受中國「空白的承諾」，又話他已提醒特朗普：可能需要以額外的關稅去向中國拿到有意義的讓步。美國負責與中國談判的主要官員大放鷹派言論，自然嚇怕投資者。
美股止跌回升，最大的功臣係能源股，標普500指數能源板塊昨日升超過2%，係表現最好的板塊。主要受惠於紐約期油昨日回升2.5%至46.54美元一桶。《彭博社》昨日報道，根據追蹤運油輪的出貨量，沙特於12月的出口平均每日下降了50萬桶至725.3萬桶，顯示沙特開始履行此前的減產承諾，OPEC及俄羅斯等產油國此前同意於今年開始每日減產120萬桶。
市場比較留意的美國科技大股，昨日表現不俗，亦提振了市場氣氛，其中Facebook及亞馬遜分別升3.5%及2.5%，Google母公司Alphabet、蘋果及Netflix則靠穩。不過，要得留意的是，由於蘋果公司在昨日收市後下調今年第一季的營收預期，股價在收市後的延長交易時段大插超過7%，其餘的科技大股通通受到拖累，杜指期貨今早更大跌340點。
蘋果公司把今年第一季營收預期由原來的890億至930億美元下調至840億美元，毛利率亦由原來預測的38%至38.5%輕微下調至38%。蘋果總裁庫克話，「公司營收預期下跌，100%來自iPhone銷售，市場則主要是中國市場。」他補充，中國經濟在去年第二季開始明顯地減弱，相信原因係中美貿易關係緊張對經濟造成壓力。另外，iPhone新型號在其他地區的銷售也未如預期的強。消息傳出後，蘋果在收市後中斷交易了廿分鐘，復市後大跌超過7%。其他幾隻龍頭股亦受到拖累，Facebook跌1.5%，亞馬遜跌1.8%，Netflix及Alphabet跌1%。
陸羽仁
2019-01-03
Dow Jones Industrial Average (^DJI)
22,686.22 -660.02 (-2.83%)
孳息掉頭 資金避險
2019年01月04日
港股新年大插，美股隔晚一度跌399點，之後指數反彈到冇乜升跌。美國總統特朗普話美股唞完氣後會回升，不過都冇人信佢，美股只是超跌反彈。
匯市閃崩 澳元急插
全球股市喺舊年12月觸發大跌市，關鍵之一係美國聯儲局不但堅持加息，而且預示今年仲要加兩次息，有華爾街大鱷形容，局方呢個預告係機械式加息，擔心僵化操作會累死街坊，資金紛紛從股市逃離。
聯儲局喺加息同作出利息展望後俾人鬧爆，雖然局方至今未明確表示轉軚，但隨著全球前景轉暗，市場利息開始掉頭。港股新年開局大跌，誘因係內地生產數據跌穿盛衰線，市場擔心經濟放緩，之後嘅歐洲生產物價指數公佈，同樣跌至2016年以來低位。由於經濟麻麻，利息自然好難再上，加上避險情緒濃烈，所以美國國債出現價升息跌走勢，被視為最大代表性的10年期國庫債券收益率跌至2.677厘。喺其他地區前景惡化下，匯市出現閃崩，日圓更加急升，兌美元昨早一度升3.5%，另外澳元暴跌至近10年低位，曾跌穿68美仙，跌至2009年3月以來最低水平，澳元兌日圓跌幅更大，曾經跌超過7%，反映資金避險情緒高漲，部份有回流避險資產跡象，呢個現象值得留意。
本來市場最擔心係美國總統特朗普同聯儲局爭拗，令局方進退失據，現在市場因為擔心前景先行回落，正好畀咗儲局一個方向，同時為放慢甚至減息提供下台階，呢點對美股可能有支撐作用。
喺美息回軟下，恒指昨日收報25064點，跌65點；國企指數收報9835點，升1點，成交金額684億元。個別藍籌股出現急跌情況，吉利汽車(175)
一度插逾8%，收報11.92元。蘋果公司下調業績預測，股價上日大跌超過8%，令「股神」巴菲特的旗下投資旗艦巴郡投資組合帳面損失達27.7億美元(約216億港元)。本地手機股舜宇光學(2382) 
則急挫6.8%，收報61.4元。瑞聲(2018) 
創逾三年低位，低見40.2元，收挫5.4%，報41.05元；比亞迪電子(285) 
收跌3.8%，報9.04元。
喺利息低企下，一個明顯跡象係本地地產股表現硬朗，幾隻龍頭股份不跌反升，恒地(012)
報38.7元，升0.45元；新地(016) 
報112元，大升3.2元；大盤暢銷的信置(083) 
收升4.4%，報13.74元。睇番地產股表現，自去年12月起好過大市，恒指昨日一度跌穿25000點，向一年低位進發，但新地距離一年低位100元仲有好大差距，恒基表現亦都相若。
本地地產股呢浸企硬，除了美息開始軟化外，周初剛公佈的覓地小組報告無料到都有關。覓地小組花咗一年時間，以千萬元計的公帑，整咗八個阿媽係女人的建議，倡議填海、發展棕地、設機制公私營合作，以至局部發展高爾夫球場。呢啲建議好多人都講過，大家都知說易行難，現在再講一次，根本等如無講。覓地小組雷聲大，結果連一滴雨都無，實際效果除咗告訴市民香港土地嚴重不足，甚至比估計更嚴重，根本一幅地都無覓到。你話發展商是否要同他們講聲多謝？
代理手瓜夠硬敢拗數
講開信和，集團喺去年尾賣觀塘大盤，反應不俗，點知賣咗千幾個單位後，忽然同兩大地產代理就佣金拗數，只願畀1.7%。從發展商角度，個盤去得咁快，皆因願意低開吸客，喺呢個環境代理賣樓都容易，都好應該「共渡時艱」。代理就認為行規唔係咁樣，公司養一大班人，燈油火蠟樣樣要錢，無理由要減佣。
有中環茶友話，這個情況公說公有理，婆說婆有理，商業社會拗數就要睇邊個手瓜硬，過去發展商倚賴代理賣樓，覺得咁樣慳番養人，又可慳番宣傳，賣到幾多樓先畀佣，長久形成發展商有十幾個，大代理實際只有兩間。從今次兩大代理公開反面，足見佢哋對自己議價能力有信心。經過今次拗佣事件，相信大地產都要諗諗點樣應對，皆因花佣事小，客源被人控制呢個至係關鍵問題。
陸羽仁
老尾繼續有小故障, 生果又爛爛地.....
強勢股開始被拋售
2019年01月03日
港股2019年首個交易日先來個驚嚇，大市藉內地經濟數據反映有收縮風險大插，全日喺低位浮沉，收市跌715點，跌幅達2.8%，以點數計為有史以來最差新年開局。
雖然美國總統特朗普喺中美貿易同美墨圍牆上擺出溫和姿態，但對港股支持力度唔大。特朗普因為興建墨西哥圍牆邊個埋單，同國會爭拗搞到政府停擺，市場原本擔心增長有放緩風險，若然停擺得耐必然影響經濟活動。由民主黨主導嘅美國眾議院，現時有點氣急我不急，堅持同總統抬槓，特朗普無奈之下，發文表示願意同民主黨埋枱傾。股市習性係喜好穩定，所以講求和氣生財，特朗普去年四出攻伐，搞中國又搞墨西哥牆，搞完外面又搞聯儲局，現在開始嘗到惡果。
美股老牛本來唔係咁易撐，畀佢搞兩搞仲冧埋，O依家有人話老牛已經死亡，正式踏入熊市；有人就話係深度調整，無論老牛死未，總之都有排唞，所以好多美股專家都小心翼翼，唔敢過份樂觀。港股市況就反映咗呢個態度，睇番英法開市，都係偏軟向下。喺噚日香港黃昏時段，美股杜指期貨都跌緊371點，所以外圍環境唔好，不過港股跌得多啲。
財新PMI穿50意料中事
恒指首個交易日收報25130點，挫715點；國企指數收報9833點，插291點，成交僅680億元。由於跌市藉口係內地數據，12月財新中國製造業採購經理人指數(PMI)為49.7，比11月下滑0.5個百分點，是自2017年6月以來首次跌至50以下的衰退區間，不過上周末中國官方12月PMI已經公佈咗，都係差過市場預期，按道理財新PMI跌穿50都唔應該太意外。
昨日中資股份沽壓較大，建行(939)
、工行(1398) 
齊跌2.9%；招行(3968) 
跌3.5%，收報27.7元。
科網股繼續受壓，市傳歐盟加強對中國網絡安全審查，科技及5G股下行，舜宇(2382)
收插5.4%，報65.85元；小米集團(1810) 
收插5.6%，報12.2元；比亞迪電子(285) 
收挫4.5%，報9.4元。5G概念股受挫，中國鐵塔(788) 
收挫5.41%，報1.4元；中興通訊(763) 
收跌2.3%，報14.46元；長飛光纖光纜(6869) 
收跌3%，報20.75元；華虹半導體(1347) 
收挫5.52%，報13.7元；中芯(981) 
收挫4%，報6.58元。
醫藥股再度捱沽，復星醫藥(2196)
收插8.7%，報21元；三生製藥(1530) 
收瀉8.67%，報9.17元；石藥(1093) 
收插5.49%，報10.68元。
平保(2318)
再下滑2.3%，收報67.55元，再創一年低位。創一年低位嘅藍籌仲有另外10隻，分別係長和(001) 
、恒生(011) 
、旺旺(151) 
、聯通(751) 
、中石油(857) 
、石藥(1093) 
、中國生物制藥(1177) 
、九龍倉置業(1097) 
、瑞聲科技(2318) 
同中銀香港(2388) 
。
呢11隻創一年低位嘅股份中，瑞聲係去年嘅弱勢股，再跌只能話係低處未算低，皆因之前股份炒到偏高水平，本來已經幾貴，加上手機市場進入調整期，大環境惡劣，所以傷上加傷，撈底輸到阿媽都唔認得。呢類強勢轉弱兼前景不明朗的股份，10樓跌落嚟固然會跌死人，但喺3樓跌落嚟都可以好傷，甚至一樣跌得死。
11藍籌創一年新低
平保相對其他10兄弟本來係強勢股，但舊年最後兩個月明顯轉弱，陸羽仁之前講過，呢個表現好有機會同管理層更換惹起關注，大家唔知將來馬明哲去向如何。平保本身業務相對穩定，呢類人事不明朗好易惹起猜測，好難判斷幾時可以消散。
至於其他幾隻股份基本上都喺之前大市下跌時撐住，現在回落有點強勢股被拋售味道。當中恒生、九龍倉置業、中銀香港業務都集中本地，而且根深葉茂，抗跌能力強，O依家被拋售，反映有投資者離場，連一些優質股份都減持，通常新年最先幾個交易日，大市形勢會反映基金投資部署，所以傳統有1月升市，全年上升機會較大說法。去年年初股市好景，可惜最後無以為繼。O依家基金經理開局審慎，主要係承接去年不明朗因素，加上美股12月喺低位徘徊，暫時未知支持位喺邊，所以交投稀疏，連靚股都下挫。
陸羽仁
特朗普個電話有小故障 - 唔知係咪華為手機
大市有小故障 .....
大市玩完了…
…
SIGH...
早