用家大叫「中伏」 網購煎蛋模具成品似外星人
2019/01/11 04:12:21 網誌分類: 生活
最近有網民喺社交平台分享，佢買咗一個骷髏骨頭形狀嘅煎蛋模具，由模具嘅宣傳圖片可見，需要用到兩隻雞蛋，利用蛋黃做出骷髏骨頭雙眼，煎出嚟嘅成品非常「靚仔」，令人垂涎三尺！點知佢跟住做，煎出嚟嘅成品居然差天共地，好似「煮熟咗嘅外星生物」，Kelly睇見都覺得有啲恐怖，網民忍唔住話「中伏了」。
帖文引嚟大批網民留言，好多網民都表示「笑死」、「真係好恐怖」、「第一次見到蛋會驚」。但亦有唔少網民話「冇伏喎，比起來更迫真！」、「另有一番風味」。
原來網上有好多唔同款嘅煎蛋模具，Kelly忍唔住上網尋寶，除咗熱門嘅骷髏骨頭形狀，仲發現咗貓頭鷹、兔仔、男仔頭、太陽等等嘅形狀，網站仲有成品嘅相，雖然唔係全部都好成功，但做出嚟都非常「盞鬼」！啱晒做畀小朋友當早餐！
Kelly Chu
■嘩！個骷髏骨模具煎出嚟嘅蛋，真係好嚇人喎！
■不同造型嘅煎蛋模具。
回應 (0)
我要發表