去飲既啓示

2019/01/13 11:51:07 網誌分類: 親情

13 Jan

係親情、管教既啓示, 亦係自我覺醒既啓示。

細個既時候去飲, 好悶架~ 畫畫、摺紙...

表妹出世之後, 同佢地玩, 再教佢地畫畫、摺紙...

大個左去飲... 係女仔都恨嫁架啦。

去同事既飲宴... 唉, 又要俾錢。

去哥哥既飲宴... YEAH, 我有大嫂、二嫂啦！

自己結婚... 我會係世界上獨一無二既公主~ 因為婚禮影片同音樂都一手包辦。

堂妹結婚... 嘩, 無敵海景呀! 玻璃凳呀~

堂細佬結婚啦。呢個時候由於好多人包括我都已成家立室, 坐嚮「平輩」果枱既有:

- 90後既低頭族

- 扮忙既我(唔知同大家有咩話題, 而大家都未必想傾計既樣... 於是我嚮手機打緊投訴信投訴個仔上既PHONICS班).. 扮忙因為坐近上菜位, 想傾計都難! 成日有人突然上菜...

- 照顧小朋友既哥哥同嫂嫂 (我冇帶仔仔去因為佢成日唔食野令我冇得食野- 如果佢食唔野返去有人會覺得個仔/ 個孫餓扁左- 妄想被逼害症)

- 一個好安靜既表妹(如果坐佢隔離應該可傾好多計, 不過座位安排上...坐太遠~ 當一個人長期被規律限制, 明知自己可以坐近表妹都冇走過去~我好似好懦弱...)

未開席既時候, 由於我之前返工返到個仔功課都理唔到, 我媽成日投訴我唔打俾佢~

所以, 呢個時候, 我媽就過黎同我傾計... 但其實我真係冇咩想傾... 可能份工同照顧個仔壓力大啦, 辭左職都仲未平伏到情緒。

係喎, 今日我終於叫左爸爸啦~!

點解今日先叫? 平時見到爸爸我嘻嘻咁笑... 因為... 唔知點解... 有些唔好意思... (喂, 自己爸爸都唔好意思叫?)

如果以前07年左右有追睇我BLOG既人會明白我爸爸係說教式同命令式既管教者, 我細個一直好驚所以好聽話... 聽話到大個都唔識爭取自己想要既野, 直到我20歲左右, 開始想抗爭, 於是有段時間成日同爸爸吵架。

到我同燒餅結婚前, 都仍然有同爸爸吵架...

唔知幾時開始我冇再有膽叫爸爸... 應該補充一句, 我早就懷疑自己係有焦慮症同強逼症, 所以大家覺得冇理由既野絕對會係我任何既反應同感受...

細個同爸爸少講野, 因為佢返工嘛。所以我返工既時候, 我雖然好想同個仔講野同玩, 但我搬堆野返屋企做時, 我好怕面對個仔, 我好想講「媽媽做埋D野大家一齊訓覺」但我明白咁樣係逃避現實...

我同個仔日日都雙思病發作! 明明心裏好愛又不能愛, 因為我要返工、做返工野~

再咁落去咪同我爸爸一樣同小朋友冇計傾囉... 所以我放棄份工, 又唔係唔夠錢用。冇就再揾工囉, 我咁多QUALI...(我恃才傲物係爸爸話「讀書最重要」既一個結果, 我明白咁樣係唔啱同乞人僧) 最重要仔仔開心健康成長。

細個成日同呀媽講野, 不過都係20歲左右, 發現彼此思想差距好大~

我媽好好人, 好善良, 我明白咁樣會好似佢咁俾人恰, 所以我就做一個同佢唔同既人~ 意思唔係做唔善良既人, 而係, 做個黑面人(嚮旺角生存真係要)~ 做黑面人起碼嚮街俾人撞都有人講對唔住, 或至少唔會屈你撞佢~ 除左黑面仲有扮出乞人憎既眉頭眼額, 重點係唔好出聲, 一出聲就輸左把聲啦! 我把聲生出黎係小朋友聲, 對我既防禦構成嚴重威脅(所以由中學開始唔多講野, 太多人笑過我把聲)! 黑面樣、乞人憎既眉頭眼額、唔出聲, 在於我既心好怕被攻擊, 一被攻擊我就起唔返身...(玻璃心呀! 仲有, 其實我有抑鬱症狀)

但偏偏... 每次同呀媽傾計, 電話就打唔通... 次次都係咁。佢揾我, 我電話就唔通, 或我靜音左電話唔想任何人打擾我/ 仔仔... 其實同呀媽揾話題傾都好難, 但佢最肯聽既係我話揾左個仔學校社工同我傾計~ 其實中學時我媽都鼓勵我見社工, 因為當時都有情緒問題。呢D野, 森美有, 李亞男有, SAMMI都有~ 依家好普遍, 唔怕拎出黎講~ 能夠幫到自己就得。

總之, 成晚, 都冇咩點同人傾計, 然後, 督下手機, 食下野, 又一晚。

侍應見到我地枱咁安靜、食咁少野, 都覺得奇怪。

去飲, 唔係應該一班人狂傾計、食野、好HAPPY架咩?

我果枱, 由於俾上菜位隔住, 我同D呀哥傾唔到計呀... 同表妹坐太遠, 好難傾計。隔離係2個低頭族同佢地會打麻雀~ 大家都應該有減肥/ 健康習慣, 真係唔會大魚大肉囉。估唔到本來最應該嘈既後生仔女, 咁安靜咁坐下一晚啦。

家庭既連繫...

我屋企有尊卑分既。即是, 大哥就係大哥, 二哥次於大哥~ 我係冇發言權但佢地係好錫我好幫助我既~ 我永遠係受惠者, 所以一出社會工作就開始唔習慣做施予者。06年出黎返工, 12年啦, 我都學識做施予者, 但仍然嚮職場上唔多敢提出要求/ 爭取應有權益, 所以成日俾人恰... (個樣都易俾人恰啦) 30幾歲俾啱啱出黎做野但高大過自己既一個20幾歲肥妹恰... (我又係細粒D既, 但論資排輩TA唔可以恰老師囉)~

一直以來, 爸爸都仍然係屋企話事人, 但大家聽唔聽就係大個之後既問題。我媽真係冇咩地位, 但大家都好多謝佢識照顧小朋友, 所以姪仔姪女都有揾佢照顧。我都鐘意佢照顧仔仔多過俾其他人照顧。呢個地位就好穩固既~ 但始終, 大家大左, 真係同父母冇咩講...

如果細個太重視學業同乖唔乖, 結果原來係親子關係咁疏離~

我讀書後期係讀幾幾好, 但仍然嚮社交比較弱。好多時就因為太乖啦, 咁大個人仲咁乖, 講笑又唔識講, 玩野又唔識玩~ 唔係話我個人悶呀, 我個人係習慣表現安靜, 習慣嚮父母面前乖, 我自己都覺得咁好悶。

但依家我都係一個媽媽, 唔會再想追溯D咩, 而係開始防止自己個仔第日同自己關係疏離...

仔仔需要擁抱, 我都需要。

仔仔需要盡情玩, 我都需要。

温暖既家, 點樣營造?

中四男生跳樓, 佢果封遺書我上網揾到, 發現有些心事同我都有相似既地方。我冇咁勇敢, 所以我仍然生存...

努力學習做好媽媽!

個仔間學校都有好多家長講座, 聽多D, 好過去EDB既E-SERVICE揾時間聽教師講座啦~ 起碼易好多。

辭工一身輕?

家務一屋係。